Nahali Bible
रोमीयो 6:23
Verse 23 is marked below, with the whole chapter around it. Read from the start
पापान केरता मोरीन मसी माय जीवतालो
ते एवी आपु काय किज्यो? काय आपु पाप केरती रिज्यो काय बोगवानान गीण होवटी एय? केदिस नाह! आपु जा पापान केरता मोर गीया ते ओवता ज्यान ओंगाण ता माय किहीक जीवणो जीवहु? काय तुमू नाह जाणते काय आपु आखा जा मसी यीशुन बपतीस्मा लेदा, तान मोतीन बपतीस्मा लेदा। 1तानकेरता आपु बपतीस्मान द्वारा यीशुन मोती माय बेचकाएन ता हेऱ्या बुजाय जायेल हेते, जाकेरीन काय आबाख ने बोड़ायीन द्वारा जीहे मसी जीवाड़ाय जायेल ईतो, तिहेच केरीन आपु बी नोवाला जीवणान चाल चाले।
काहाकाय केदी आपु यीशु हेऱ्या तान मोतीन समानता माय एक एय जायेल हेते, ते जोरवरीस तान जीव उठणेन समानता माय बी एक एय जाहु। आमु जाणतेह काय आमरो जुनालो पापान काबावालो सेरीर यीशु हेऱ्यो खुरूसखाम पोर चेड़ाय गीयो, काहाकाय आपणो पापान सेरीर काईस कामान नाह बोण जाय एने आपु ओंगाण पापान गुलाम माय नाय रिज्यो। काहाकाय जो मोर गीयो, तो पापाह रेन सुटीन देरमी ठेरानो। तानकेरता केदी आपु मसी हेऱ्या मोर गीया, ते आमु बुरहो केरतेह काय ता हेऱ्या जीवताला बी रेहु। काहाकाय आमु ज्य जाणतेह काय मसी मुरेल माय रेन जीव उठीन पोशो मोरन्यो नाह; ता पोर पोशी मोतीन राज नाह एण्यी। एने तो मोर गीयो ता पोर पापान बोंदेन नाह सोतो एने काहाकाय जेवी तो मोरनो, ते पापान केरता कायेम ने केरता मोरनो; पुण बोगवाना हेऱ्या यीशु मसीन द्वारा जीवताला सोमजो। इहीचकेरीन केरीन तुमू बी सोताह पापान केरता ते मुरेल, पुण बोगवानान केरता मसी यीशु माय जीवताला सोमजो।
तानकेरता पापाह तुमरा खेतेम एण्या सेरीर माय राज मा केरने दिवो, काय तुमू तान आसान काबाम रिवो; एने तुमरा सेरीरान अंगाह पापान गुनाह आथ्यार बाणावीन पापाह होपो, पुण आपणे आपाह मुरेल माय रेन जीवतालो सोमजीन तुमरा अंगाह देरमीपोणान सादेनान रूपाम आथ्यार एणेन केरता बोगवानाह होप दिवो। तेवी पाप तुमरे पोर राज नाय केर सेकी, काहाकाय तुमू नेमान काबाम नाह, पुण बोगवानान गीणीन काबाम हेते।
देरमीपोणान गुलाम
ते ओवतो काय? आपु ज्यानकेरता पाप केरी काय आपु नेमान काबाम नाह पुण बोगवानान गीणीन काबाम हेते? केदिस नाह! काय तुमू नाह जाणते काय एगदान उकुम मान्नेन केरता तुमू सोताह पावरान गेत होप देतेह, ते जान उकुम मानतेह तास ने पावोर बोण जातेह चाहे पापान, जान परिणाम मोत हे, चाहे उकुम मान्नारान, जान परिणाम देरमी पोण हे? पुण बोगवानान दन्यवाद एय काय एक टेम तुमू गुलाम एता पुरा मोना केरीन ग्रहण केऱ्या जा माय खेराय जुड़ेह एय काय तुमू जा पापान गुलाम एता एवी मोना केरीन ता हिकवोणाह मान्नारे एय गीया, जान केरता तुमू होपायेल एता, एने तुमू पापाह रेन सुटीन देरमीपोणान गुलाम एय जायेल हेते। मी तुमरी सेरीरान कोमजोरीन वोजेसे माणहान रितीन गेत केथु। जिहकेरीन तुमू तुमरा अंगाह खाराबपोणा एने नेमाह टालनारान गुलाम केरीन होपेल ईतो, तिहेच केरीन एवी तुमरा अंगाह चोखा पोणान केरता देरमीपोणान गुलाम एणेन केरता होप दिवो।
काहाकाय जेवी तुमू पापान गुलाम एता ते देरमीपोणान उगे रेन सुटांग एता। ज्यु वातु केरीन एवी तुमू लाजवातेह ता हेऱ्या ती टेम पोर काय फायदो सापड़ावताला? काहाकाय तान परिणाम ते मोत हे। पुण एवी पापाह रेन सुटीन एने बोगवानान गुलाम बोणीन तुमूह ज्य फोल जुड़नो जाकेरीन चोखा पोण सापड़ेह, एने तान सेवेट जेलेमक्यी जीवाय हे। काहाकाय पापान मोंजरी ते मोत हे, पुण बोगवानान गीणीन वरदान आपणो मालीक मसी यीशु माय जेलेमक्यी जीवाय हे।
Source notes (1)
- Cross-reference कुलीसियो 2:12
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.