Nahali Bible
रोमीयो 16
पौलुसान दोस्तीदाराह नमस्कार
मी तुमूह आमरी बोणीख फीबेन केरता विन्ता केरथु, जी किंख्रियान मोंडलीन सेविका हे, काय तुमू मालीक माय ताह इहकेरीन स्वीकार किरो जीहे चोखाला माणहाह केरतेह, एने केदी एगदा कामा माय ताह तुमरी जोरेवरी एय ताहार तान मोदेक किरो, काहाकाय ता सोता जुलूम जाणाह एने मारो बी मोदेक केरनार इहकेरीन ईयेल हे। 1
प्रिस्का एने अक्विलाह ज्या मसी यीशु माय मारा सहकर्मी हेते, नमस्कार। ता मारा जीवान केरता सोतान जीव दोका माय टाक दियेल एता, एने फोक्तो मीच नाह, पुण बिगेर यहुदिन आखी मोंडली बी तान दन्यवाद किरेह। ती मोंडलीह बी नमस्कार जी तान गेरा माय हे। मारा मोंगाल्ला इपेनीतुसाह, जो मसीन केरता आसीयान पेल्लो फोल हे, नमस्कार। मरीयम, जी तुमरी केरता जुलूम मेहनेत किरेल हे, नमस्कार। 2मारा गेरल्या अन्द्रनीकुस एने युनियास जा मार हेऱ्या जेली माय एता, एने प्रेरिता माय नाव लायेल हेते, एने माहु रेन पेल मसी माय एता, नमस्कार। मालीक माय मारो मोंगाल्लो अम्पलीयातुसाह नमस्कार। मसी माय आमरो सहकर्मी उरबानुसाह एने मारा मोंगाल्लो इस्तखुसाह नमस्कार। अपुल्लोसाह जो मसीम खेरलो निकेलनो, नमस्कार। अरीस्तुबुलूसान गेराणाह नमस्कार। मारा गेरल्याह हेरोदियोनाह नमस्कार। नरकिसुस ने गेराणान जा माणहे मालीक माय हेते, ताह नमस्कार। मालीक माय मेहनेत केरनारी त्रुफेना एने त्रुफोसाह नमस्कार। मोंगाल्लो पिरसीसाह, जो मालीक माय केठीण मेहनेत किरेल हे, नमस्कार। 3मालीक माय निवड़ायेल रूफुसाह एने तान आईख, जी मारी बी आहख हे, नमस्कार। असुंक्रितुस, फिलेगोन, हिरमेस, पत्रुबास, हिरमास न्याह एने ता हेऱ्या जा मसी बाहख हेते ताह नमस्कार। फिलुलूगुस, युलिया, नेर्युस एने तान बोणीख उलुम्पास न्याह एने ता हेऱ्या जा बोगवानान माणहे हेते, ता आखाह नमस्कार। गेले मिलीन एकमेकाह नमस्कार किरो। तुमूह मसीन आखी मोंडलीन उगे रेन नमस्कार।
सेवल्यो ईसारो
एवी एय बाय बोणहा, मी तुमूह विन्ता केरथु, काय जा माणहे ती हिकवोणीन विरोद, जी तुमू सापड़ायेल हेते, ता माय जा माणहे फुट एने ठोकेर खावाड़नेन कारेण बोणतेह, ता पोर नेजेर मीलो एने ताह रेन सेटा रिवो। काहाकाय ओहला माणहे आपणा मालीक मसीन नाह, पुण सोतान पेटान सेवा केरतेह; एने मोट मोठ्यु वातु से सीदा सादा मोनान माणहाह बोटकाव देतेह। तुमरे उकुम मान्नेन चेरचा आखा माणहा माय पोसीर जायेल हे, तानकेरता मी तुमरे बाराम खुसी केरथु, पुण मी ज्यो होदथु काय तुमू बोलायीन केरता एकलीदार एने बुरायीन केरता बोला बोणीन रिवो। 4सान्तीन बोगवान बुतड़ाह तुमरा पाया बुंद उतवाल्योच केच्या वालाव देय। आपणा मालीक यीशु मसीन गीण तुमरी पोर ईती रेय। 5
मारो सहकर्मी तीमुथीयुस एने मारा यहुदि गेरल्या लुकियुस, यासोन एने सोसीपत्रुसान तुमूह नमस्कार।
ज्या पोत्राह लेखणार मी तीरतीयुसान, मालीक माय तुमूह नमस्कार। 6
गयुसान जो मारो एने मोंडलीन पावणाय केरनार हे, तान तुमूह नमस्कार। इरास्तुस जो हेयरान बण्डारी हे, एने बाहख क्वारतुसान तुमूह नमस्कार। आपणो मालीक यीशु मसीन गीण तुमरे आखा हेऱ्यी रेय। आमेन।7
बोगवानान बोड़ाय
ता बोगवानान बोड़ाय एय जो ता बोरहान गेत तुमूह मारी हाजाली खुबेर मतलब यीशु मसीन हिकवोणीन पारचारान गेत स्थिर केर सिकेह, ता बेदान उजालान गेत जो जेलेमक्योस लिकायेल ईतो। पुण एवी देखीन जेलेमक्या बोगवानान उकुमा केरीन जाणकारान पुस्तेक ने द्वारा आख्यु जात्युह कियेल हे काय ता बुरहो केरीन उकुम मान्नारे एय जाय, 8
तास एकुस एकलीदार बोगवानान यीशु मसीन द्वारा जेलेम बोड़ाय ईती रेय। आमेन।
Source notes (8)
- Cross-reference प्रेरितान काम 18:2
- Footnote युनिया; नाहते युनियास; थोड़ाक लेख माय युलिया।
- Cross-reference मरकुस 15:21
- Footnote थोड़ाक लेख माय ज्यो वाक्य नाह जुड़ेत
- Cross-reference प्रेरितान काम 16:1
- Cross-reference प्रेरितान काम 19:29; 1 कुरिंथीयो 1:14; 2 तीमुथीयुस 4:20
- Footnote दिहरा लेख माय ज्यो वचन नाह जुड़ेत; थोड़ाक लेख माय 27 ने पासाण ज्यो वचन टाकेल हे।
- Footnote थोड़ाक लेख माय वचन 25-27 न्या एने 14:23 ने पासाण लिखेल हे; दिहरा लेख माय निस्तो 14:23 ने पासाण लिखेल हे; एक लेख माय 15:33 ने पासाण लिखेल हे।
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.