Nahali Bible
प्रकाशितवाक्य 9
जेवी पाचवो हेरोगदुत तान पावलीह फुक्यो, ते मी हेरगाम रेन एक तारो देरती पोर पोड़तालो दिख्यो, एने ताह नेरेग कुंड ने कुची आपाय गियी।1 ओवतो तो हेरोगदुत नेरेग कुंडाह ती कुची केरीन उगाड़ दिनो, एने ता कुंड माय रेन ओहलो दुवाड़ो निकेलने बाजरियेल एतो, जिहकेरीन काय एक मोटली बाठी माय रेन दुवाड़ो निकेलने; एने ता कुंड माय रेन निकलेल दुवाड़ा केरीन दिह एने वारो कालो एय गीयो। ता दुवाड़ा माय रेन टिड्या देरती पोर आवा, एने ता टिड्याह देरतीन विचान गेत ताकेत आपाय गियी। ताह इहकेरीन कियेल एतो काय देरतीन खेड़; जाड़ाह एने काल्ली बी निल्ली वोस्तुह नुकसान नाय केरी, पुण ताच माणहान नुकसान किरज्यो जान निंडालो पोर बोगवानान साप नाह सोती। टिड्याह निसाण आपेल एतो काय माणहाह नाय मारी, पुण पाच मोयना वोर तेकलीत देणेन आदिकार आपेल एतो। ज्यी तेकलीत विचान चावणेन गेत एती। ता पाच मोयना माय माणहे मोत होद्ती, पुण मोत ताह जुड़ी नाय; एने ता मोरने होद्ती, पुण मोत ताह रेन सेटी नाही।
ता टिड्या लेड़ायीन केरता तियार किरेल गोड़ान गेत एता; तान मुंडी पोर होनान मुकूट एता, एने तान मुय माणहान मुयान गेत एतो। तान लेट्या बायकुन लेट्यान गेत, एने दात सिहान दातान गेत एता। तान साती कवच से ढापायेल ने गेत देखाताली, एने तान फाकान आवाज लेड़ायीन केरता जाताला जुलूम होवटा गोड़ान तांगा से पायदा ईयेल आवाज ने गेत एती। तान सेमटी विचान सेमटीन होस एती, एने ता माय पाच मोयना वोर माणहान नुकसान केरनेन ताकेत एती। एक नेरेग कुंड ने हेरोगदुत ता पोर राजा ईतो। इब्रानी बाषा माय तान नाव अबदोन2; एने युनानी बाषा माय अपोलीयोन3 हे, तान मतलब “खेतेम केरनार।”
पेल्ली मोटली पिड़ा जात रेनी: एने दिखो, ज्यु सोब वातुन पासाण दुय उंजु मोटल्यु पिड़ा आवण्यो हेत्यु।
जेवी साहवो हेरोगदुताह तान पावलीह फुक्यो। मी बोगवानान ओंगाणली होनान वेदीन चार हिंगा माय रेन एक आवाज होमल्यो। जा साहवा हेरोगदुताह फाय पावली एती ताह केयो, “ता चार हेरोगदुताह जा फरात नेदी हेऱ्या बांदाय रेनाह, ताह सोड़ दे!” ता चार हेरोगदुताह सोड़ देणेम आवो; ता तास दिह ने, एने तास मोयनान एने तास साल ने केरता तियार केराय जायेल एता, ताकाय ता एक बाग माणहाह मार टाकी। मी गोड़ा पोर बोहणारा सेनान गेणती होमलेल, ता विस करोड़ एता। माहु ज्या देरसेन माय गोड़ा पोर बोहणारान सातीन कवच आक्ठो, गंदक ने गेत देखानो, एने ता गोड़ान मुंड सिहान मुंडान गेत एतो। एने तान मुया माय रेन आक्ठो, दुवाड़ो एने गंदक निकेलतालो। न्या तीन पिड़ा से मतलब गोड़ान मुया माय रेन निकेलनार आक्ठो, दुवाड़ो एने गंदक से एक बाग माणहे माराय गीया। ता गोड़ान ताकेत तान मुयाम एने सेमटा माय एती। काहाकाय तान सेमटी गेड़हान गेत एती, एने ती सेमटी माय मुंडे बी एता, ज्यान वोजेसे ता माणहाह नुकसान पोचाड़ताला।
ज्यो देखीन बाकीन माणहे जा त्यु पिड़ा माय रेन वोचेल माणहे जा माराय नाह जायेल एता, ता तान आथा केरीन बाणायेल वोस्तु से मोन नाह फिराया। बुतड़ान एने होना चांदीन डेगड़ान, एने लाकड़ान पुजा केरने नाह सोड्या, ती मुरती नाह देख सिकेत, नाह होमेल सिकेह, नाह चाल सिकेत। ता खुन, जादु जादुटोणा, सिनालो एने चोरी केरने से मोन नाह फिराया।
Source notes (3)
- Footnote उंडालो खाडो; जान बुय नाय देखाय उहलो खाडो, मापाय नाय उहलो खाडो। ओहलो मानतेह काय आखरी डेंड एणे वोर खाराब जीव देरतीन उंडाले जागे बांदाय जाताली।
- Footnote अबदोन ज्याह थोड़ाक माणहे सैतान एय केतेह।
- Footnote अपोलीयोन ज्याह थोड़ाक माणहे सैतान एय केतेह।
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.