Nahali Bible
प्रकाशितवाक्य 2
इफिसुस ने मोंडलीह खुबेर
इफिसुस मायवाली मोंडलीह खुबेर पोचाड़नार हेरोगदुताह ज्यो लिख:
“जो तान जेवड्या आथा माय हात ताराह लीय रिनोह, एने होनान हात दिवान विची माय फिरेह तो ज्यो किथे काय। जो तु किरेल एने तार मेहनेतीन कामाह एने दिराह मी जाणथु; एने ज्यो बी काय तु खाराब माणहाह देख नाह सिकेत। एने जा सोताह प्रेरित केतेह, पुण ता नाह सोता, तु ताह होदिन जुठा सापड़ायेल हे। तु दिर दिरेह, एने मार नावान केरता दुख वेठ वेठीन थाकील नाह, एने नाह पासाण फिरनु। पुण माहु तार विरोद ज्यो केणु हे: तु तारो पेल्लो मोंग सोड़ दियेल हे। तानकेरता तु कारीन पुड़ेल हे तान ईर किर, एने पाप केरने सोड़ीन पेल ने गेत काम किर। केदी तु पापा माय रेन मोन नाय फिरावहे, ताहार मी तुवा फाय आवीन तार दिवाह तान जागे रेन सिटो केर देह। पुण होव, तुवा माय ज्यी वात हे काय नीकुलय ने कामाह तु नफरत किरेह, जाह मी बी नफरत केरथु।” 1
जान कान एय ता होमली लेय काय जीव मोंडलीह काय किथे!
जा जीत हासील केरी, ताह मी जीवणान जाड़ा माय रेन फोल खाणेन केरता पारवांगी आपुह, जो हेरगा माय बोगवानान बोगीचा माय हे।
समुरनान मोंडलीह खुबेर
समुरना मायवाली मोंडलीह खुबेर पोचाड़नार हेरोगदुताह ज्यो लिख:
“जो पिल्लो एने सीवल्यो हे, एने जो मोर जायेल ईतो, एवी जीवतालो एय जायेल हे, तान केणु ज्यो हे। मी तार दुखाह एने गेरीबीह जाणथु; पुण तु मालदार हे! एने जा माणहे सोताह यहुदि केतेह, पुण ता हेते नाह; एने तार विरोद माय जा खाराब वातु ता केरतेह ताह बी मी जाणथु; पुण सैतान ने सबा हेते! जो दुख तुमूह वेठण्यो हे, ताहसे मा बिहो। हुमलो! सैतान तुमू माय रेन थोड़ाक माणहाह जेलीम कोंडणो हे, ताकाय तुमू पारखाय जाय एने तुमूह दोह दिह वोर दुख वेठणे पोड़ी। एने तुवाह मोरने पोड़ी तीबी बोरहा माय मोजबुत रे, ते मी तुवाह जित ने ईनाम जीवाय आपुह। 3
“जान कान एय ता होमली लेय काय जीव मोंडलीह काय किथे!
“जा जीत हासील केरी, ताह दुसरी मोती से नुकसान नाय पोची।”
पिरगमुन ने मोंडलीह खुबेर
पिरगमुन मायवाली मोंडलीह खुबेर पोचाड़नार हेरोगदुताह ज्यो लिख:
जा फाय दुय दारान तेज तालवार हे, तो ज्यो किथे। मी ज्यो जाणथु काय तुमू ता रेतेह जाहरो सैतान ने राजगादि हे। तुमू मार हेऱ्या खेरला हेते एने मार बुरहो केरने ता दिह्या माय पासाण नाह ईनो, जा माय मार विश्वासयोग्य गोवाह अन्तिपास तुमरी विचीम माराय गीयो, जा सैतान रिथे, तेवी बी तुमू माहु नाकार्या नाह। पुण माहु तुमरी विरोद माय थोड्युक वातु केणु हे: तुमरी विची माय थोड़ाक माणहे ओहला हेते जा बिलाम ने हिकवोणान गेत चालतेह, जो बालाक राजाह ज्यो हिकाड़ेल ईतो काय इस्राएली माणहाह मुरतीह चेड़ावो चेड़ायेल खाणो खाय, एने सिनालो केरनेन द्वारा ताह पाप माय पाड़नेन आगवाय केरी। तिहेस केरीन तुमरी विची माय थोड़ाक माणहे हेते जा नीकुलय ने हिकवोणा पोर चालतेह। केरीन एवी तुमरा पापा माय रेन मोन फिरावो! नाहते मी जेल्दी आवीन मार मुयाम रेन निकेलनार तालवार केरीन ता हिऱ्यो लेड़ाय केरूह। 4
जान कान एय ता होमली लेय काय जीव मोंडलीह काय किथे!
जा जीत हासील केरी, ताह मी लिकायेल मन्ना माय रेन खाणेन आपुह। एने ता माय रेन एकेकाह एक दुवल्यो दिगोड़ बी आपुह एने ता देगड़ा पोर एक नोवालो नाव लिखेल रेय, ता देगड़ाह लेणारा सिवाय कुणीस नाय जाणी।
थुआतीर ने मोंडलीह खुबेर
थुआतीरा मायवाली मोंडलीन खुबेर पोचाड़नार हेरोगदुताह ज्यो लिख:
बोगवानान बिटोख जान डोला आक्ठान आसीन गेत हेते, एने जान पाय हाजा पितलान गेत चोमेकता हेते, तो ज्यो किथे। मी तुमरा काम, मोंग, बोरहाह, सेवा चाकरी एने दिराह जाणथु। एने मी ज्यो बी जाणथु काय तुमरा एवीन कामे जुनाला कामाह रेन वोड़ीन हेते। पुण माहु तुमरी विरोद ज्यो केणु हे: तुमू इजेबेल नावान ती बायकुन वेठथे, जी सोताह बोगवानान खुबेर पोचाड़नार हे किथे। ती सोतान हिकवोण ने द्वारे मार सेवकाह सिनालो केरने एने मुरतीह चेड़ावो चेड़ायेल खाणो खाणेन केरता गेलेत आगवाय किरेह। मी तीह पापा माय रेन मोन फिरावणेन केरता मुको आपेल, पुण ती सोता सिनालो केरने से मोन फिरावणे नाह हुदीत। एने मी तीह पिड़ान खाटला पोर टाकण्यो हे। एने ताह बी जा ती हेऱ्या सिनाला माय बागी हेते, ताकाय ता ती टेम वोर पिड़ाह जेलती रेती; जाह वोर ता ती हेऱ्या किरेल तान खाराब कामान केरता मोन नाय फिरावे। एने मी तीन आखा अनुयायीह मार देह, तेवी आखी मोंडली जाण जाय काय दिल एने मोनाह पारेखणार मीच हे। एने मी तुमू माय रेन एकेकाह तान कामान गेत बुदलो आपुह।
पुण मी थुआतीरान बाकी माणहाह, जा ज्यी खाराब हिकवोणाह नाह मानते एने ती वातुह जीह सैतानान उंडाल्यु वातु केतेह त्युह नाह हिकेल सोता। ज्यो केथु काय मी तुमू पोर उंजु होवटो वोजो नाय टाकुह। पुण जो काय तुमू फाय हे, ताह मार पोशो आवणे वोर देरीन रिवो। जा जीत हासील केरी, एने मार कामान गेतुच आखरी वोर केरतीच रेय, मी ताह तोच आदिकार आपुह, जो माहु मार आबाख फाय रेन जुड़ेल हे: मी ताह देसा पोर आदिकार आपुह, ता लोखंडान राजडिंगो लेन राज केरती, एने माटड्यान ठामला गेत टुकड़ा केरीन तोड़ देय। एने मी ताह विगोस ने तारो बी आपुह।
जान कान एय, ता होमली लेय काय जीव मोंडलीह काय किथे!
Source notes (4)
- Cross-reference प्रकाशितवाक्य 22:2
- Cross-reference प्रकाशितवाक्य 1:17; 22:13
- Cross-reference प्रकाशितवाक्य 20:14; 21:8
- Cross-reference योहान 6:48-50
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.