Nahali Bible
मिका 7:18
Verse 18 is marked below, with the whole chapter around it. Read from the start
इस्राएलान वेवारान नास
हाय मार पोर! काहाकाय मी ता माणहान गेत एय जाईल हे जो उनालाम फोल तोड़ने माय, नाहते रियेल अंगुर तोड़नेन टेमीन सेवोट आव जाय, माहु ते पाकेल अंजीरान आसा एती, पुण खाणेन केरता काल्लो गुमसो नाह रिनो। बोकत्या माणहे देरती पोर रेन खेतेम एय जायेल हेते, एने माणहा माय एक बी हुतरो माणुह नाह रेनो; ता आखान आखा मारनेन केरता फांदो टाकतेह, एने जाल मांडीन जीव जीवान बायाख ने सिकार केरतेह। तान दुयू आथा केरीन मोन लागाड़ीन बुराय केरतेह; आदिकारी पोयशा मांगेह, एने नियाव केरनार पोयशा लेणेन केरता तियार रिथे, एने मोटला माणहे तान मोनान खाराबी देखाड़ेह; इहकेरीन ता आखा मिलीन चालबाजी केरतेह।
ता माय रेन जो आखाम रेन हाजो हे, तो काटाल्या जुरखेल्यान गेत पिड़ावालो हे, जो आखाम रेन हुतरो हे, तो काटावाला वाड़ाह रेन बी खाराब हे। तारा राखवाल्यान कियेल दिह, मतलब तारा देन्डान दिह आहने आव लागेल हे। एवी ता जेल्दीच बोटकी जाती। तारा आहेंल्यान बी बुरहो मा किरो, एने तारा जोड़ीदारा पोर बुरहो मा मिलो; पुण तारी बायकुह होमालीन बुलज्ये।
काहाकाय बिटोख आबाख ने आपमान किरेह, एने बेटीख आईख ने, एने वोवड़ीख हाहवोक ने विरूद उठेह; माणहान दुसमोन तान गेरल्याच माणहे रेतेह।
पुण मी बोगवानान उगे देखते रेह, मी मारा सोड़ेवणार बोगवानान वाट जोवती रेह; मारो बोगवान मारी होमली।
सुटकारो बोगवाना उगेच रेन
एय मारी दुसमोन, मार दुखान कारेण से खुस मा एय; काहाकाय जीहे मी पोडुह तिहेच उठुह; जीहे मी आंदारलाम पोडुह तिहेच बोगवान मार केरता उजालान काम देय। मी बोगवानान विरूद पाप किरेल हे, केरीन मी ती टेम वोर तान राग विठती रेह, जाह वोर काय तोच मारो मुकदमो लेड़ीन मारो फिसलो नाय केरी, ती टेम माय तो माहु उजाला माय काड़ीन लेन आवी, एने मी तान हाजाला कामाह देखुह। तेवी मारी दुसमोन जी माहु इही किथे, “तारो बोगवान यहोवा काहरी रिनो?” ती बी ताह देखी एने लाजवायीन तीन मुय डापी। मी मारा डोला केरीन तीह देखुह; तेवी ती वाटीन गारान गेत रोंहदलाय जाय।
एय यरूशलेम जेवी तारा हेयरान बितड़ो बांदणेन दिह आवी, ते दिह तारी एद्दी वोदाड़ाय जाय। ते दिह अश्शुर रेन, एने मिस्र देसान हेयराम रेन, एने मिस्र एने फरात नेदीन विचीम रेन एने देरीया, देरीया एने बोयड़ा बोयड़ान विचीम रेन देसान माणहे तार फाय आवती। तीबी देरती पोर रेणारान कारेण एने तान खाराब कामान वोजेसे उजाड़लीच रेय।
इस्राएल पोर बोगवानान गीण
तारा माणहान राखवाली एने तारा आदिकार माय जुड़ेल मेंड्रान टोलान राखवाली तारी डेंगी केरीन किरज्ये, जी खेरबाटी बुय माय एने हाजी बुईन चारान विची माय एखाला रेतेह, ताह जुलूम पेल ने टेमान गेत बाशान एने गिलाद ने ईलाका माय चेरने दिवो।
जीहे काय मिस्र देसाम रेन तारा निकलीन आवणेन दिह्याम, तिहेच केरीन एवी मी ताह मोटला कामे देखाडुह। दिहरा देसान माणहे देखीन तान आखा बाहदुरीन कामान बाराम लाजवाती; ता तान मुयाह आथा केरीन लिकाड़ती, एने तान काने बेयरा एय जाती। त्यु गेड़हान गेत माटड्यो चाटती, एने बुय पोर लोलनार जेन्तुन गेत तान देराम रेन कापतेन निकेलती; ता आपणा बोगवाना फाय थेर थेर कापतेन आवती, एने ता तुवाह बिती।
तार गेत ओहलो बोगवान काहरी हे जो पापे माफ केरी, एने तान सोतान पोरजान वुचेल माणहान गुना डाप देय? तो तान राग जेलेम मेल नाह रेत, काहाकाय तो गीणी पोर मोंग मिलेह। तो पुशो आमु पोर गीण केरी, एने आमरा पापाह पाया बुंद रोंहदेल देय, एने आपणा गुनान कामाह उंडाला देरीया माय जुगार देय। तु याकुबान बाराम ती खेराय, एने अब्राहमान बाराम ती गीण पुरी केरी, ज्यान वायदो तु वेगाला कालान दिह्याम रेन एवी वोर आमरा डायडाया हिऱ्यो किरती आयेल हे।
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.