Nahali Bible
मिका 2
गेरब्या पोर अत्याचार केरनारान चिहटा
हाय ता पोर जा आथरोणा माय लोटीन केल्पना केरतेह, एने खाराब कामान आसा केरतेह, एने तेगड़ा हेते केरीन वेगाच दिह उगताच ता ताह पुरा केरतेह। ता खेतान लालुच केरीन ताह सांडाड़ लेतेह; एने गेरान लालुच केरीन ताह बी सांडाड़ लेतेह, एने तान आहेंल्या माणहाह ठेग खातेह, एने तान डायडायान मालदेन लुट लेतेह।
केरीन बोगवान इह केरीन किथे; “मी ज्या गेराणा पोर ओहली पिढ़ा टाकणे माय हे, जान बुंदे रेन तुमू वोस नाय सिकहो, एने नायते तुमरा मुंडाह उचा केरीन चाल सिकहो; काहाकाय ती पिड़ान टेम रेय। ती टेम माय ज्य जुलूम दुखान गीत किस्सान रिती माय गावाय जाय,”
आमरो आखो नुकसान एय गीयो; तो मारा माणहान बाग बिगाड़ेह, हाय,
तो ताह मार हिऱ्यो रेन कुलोक सिटो केर दिथे;
तो आमरा खेते दुको देणारान आथाम आप दिथे।
बोगवानान मोंडली माय चिट्ठी टाकीन एने बुय दोयड़ी केरीन मापीन वाटणार कुण नाह एनो, एने तुमूह बुयीन टुकड़ो बी नाय जुड़ी।
तान जाणकार केतेह, “जाणाव मा किरो, ज्यु वातुन बाराम जाणाव मा किरो, काहाकाय एगदो आपमान वेठणे नाय पोड़ी। एय याकुबान गेराणा, काय ज्य केवाय जाय काय बोगवानान जीव माय दिर नाह रेनी? काय ज्य काम ताच ने किरेल हे? काय मारा वचना केरीन तान बोलो नाह ईत, जो हुतरो चालेह?”
पुण कालीन वात हे काय मारी पोरजा दुसमोन बोणीन मार विरूद उठेल हे; तुमू ठावका एने बोलाबाला वाट चालु माणहान डिला पोर रेन चादरो सांडाड़ लेतेह, जा राड़ीन विचार नाह केरीन ठावकाच जात रेतेह। मारी पोरजान बायकुह तुमू त्युन हुकेह रेणेन गेराम रेन काड़ देतेह, एने त्युन आतल्या सोराह आपेल मारी हाजाल्यु वोस्तु, जेलेम तुमू सांडाड़ लेतेह। उठो जात रिवो; काहाकाय ज्यो तुमरो विहेवणेन जागो नाह सुतो; केरीन तो एठो हे जो केठीण दुखा माय तुमरो नास केरी।
केदी एगदो जुठी जीव माय चालते लेन जुठी एने फालतुक वातु केय, एने केय काय मी तुमूह जेलेम अंगुरान रूह एने दारान केरता पारचार होमलाड़ती रेय, ते तोच न्या माणहान केरता जाणकार बोणी।
एय याकुब, मी खेरीच तुमू सोबाह टुलो केरूह; मी इस्राएल ने वुचेल माणहाह एकठा केरूह, जीह केरीन मेंड्रा बोकड्या वाड़ाम एकठा केरनु, ता एक टोलान गेत हेते जा हाजा चारावाली बुय रेणे, ता माणहान गेरदीन कारेण कापाली केरती। तान ओंगाण ओंगाण वाड़ाह वेसेड़नार जाईल हे, केरीन ता बी ताह वेसड़ने बाज रेनाह, एने तान फाटकीम लागता निकेलने बाज रेनाह, तान राजा तान ओंगाण ओंगाण गीयो, मतलब बोगवाना तान अगुवा हे।
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.