मत्ती 21

यरूशलेम माय जिकीन रिगणो

(मरकुस 11:1-11; लुका 19:28-40; योहान 12:12-19)

1जेवी ता यरूशलेम ने आहने पोचना, एने जेतुन बोयड़ा पोर बेथफगेन आहने आवा, तेवी यीशु दुय चेलाह ज्य केयीन मुकल्यो। 2तुमू सोमोरल्या गावा माय जावो, ता पोचताच तुमूह ताहरी एक गेदड़ो बांद मिलेल, एने ती हेऱ्यो पाठड़ो सापड़ी; ताह सोड़ीन मार फाय लीयावज्यो। 3केदी तुमूह इखेह काह फुसी, ताहार किज्यो, मालीकाह ज्यान गिरेज हे, ते तो जालुस मोकली देय। 4ज्यो ज्यानकेरता एनो काय ज्यो वचन जाणकारान द्‍वारे केवाय जायेल एतो, तो पुरो एय:

5सियोन ने बेटीह किवो1,

“देख, तार राजा तुवा फाय आवीह;

तो बुलो हे, एने गेदड़ा पोर बोह रिनोह;

मतलब गेदड़ान पाठड़ा पोर।”

6तेवी चेला जायीन यीशु जीहे कियेल एतो तिहेच केऱ्या। 7गेदड़ान पाठड़ाह लावा, एने ता पोर तान फाड़का टाक्या; यीशु ता पोर बोह गीयो। 8एने मोकतास माणहे जान तान फाड़का वाटी पोर आथऱ्या, एने थोड़ाक माणहे जाड़ा पोर रेन डालख्या काटीन वाटी पोर आथऱ्या। 9जी गेरदी ओंगाण ओंगाण जाताली एने पासाण पासाण चालताली आयड़ी आयड़ीन केताली, “दाऊदान बेटाख ने होसन्‍ना”2 मतलब आमुह तु सुटकारो आप बोरकेतवालो हे तो जो मालीक ने नाव से आवीह, हेरगा माय होसन्‍ना!

10जेवी यीशु यरूशलेम माय पोचनो, ते आखा हेयराम पुकार एय गीयो; एने माणहे केणे बाज गीया, “ज्यो कुण हे?”

11माणहे केणे बाज गीया, “ज्यो गेलीलान नासरत मायवालो जाणकार यीशु हे।”

मोंदिर माय रेन वेपारीह निकालनो

(मरकुस 11:15-19; लुका 19:45-48; योहान 2:13-22)

12उवतो यीशु मोंदिर माय गीयो, एने ता आखाह, जा लेन देन केरताला, ताह बाहेर काड़ दिनो, एने पेरवाह वेचणारान पाटला उलटाव दिनो। 13एने ताह केयो, “वचन माय लिखेल हे, मारो गेर विन्तान गेर केवाय, पुण तुमू ताह डाकुन पाड़ावो बाणाव मेल्याह!3”

14ओवता आंदला एने लेंगड़ा मोंदिरा माय यीशु फाय आवा, एने ताह तो हुदाऱ्यो। 15पुण जेवी मुखी चाकऱ्या एने देरेमगुरू ज्या कामाह, जा तो किरेल हे, एने सोराह मोंदिर माय दाऊदान बेटाख ने होसन्‍ना आयेड़ताला देख्या, ते रागा माय बोराय गीया, 16यीशु ताह केयो, “होव,” 4

काय तुमू ज्य केदीच पुस्तेक माय नाह वाच्‍या? सोरा एने दुद पिताला सोरान मुयाम रेन तो बोड़ाय केरायेल हे?

17तेवी यीशु ताह सोड़ीन हेयरान बाहेर बेतनिया माय गीयो, एने ता रात हुवनो।

यीशु अंजीरान जाड़ाह हाराप देणे

(मरकुस 11:12-14,20-24)

18जेवी विगोस यीशु हेयराम आवतालो, तेवी यीशुह बुख लागी। 19एने वाटीन दिड़े एक अंजीरान जाड़ देखीन तो तान आहने गीयो, पुण ताह पांटा सोड़ीन कायच नाह देखीन केयो, “एवी रेन तार पोर केदीच फोल नाय लागी।” एने अंजीरान जाड़ तुलेचबुखे हुक गीयो।

20ज्यो देखीन चेला बोंगला गीया एने केया, “ज्यो अंजीरान जाड़ चालोच किहीक हुक गीयो?” 215

यीशु ताह केयो, “मी तुमूह खेरीच केथु, केदी तुमू बुरहो किरहो, एने सेंका दिरहो नाय, ते नाह ज्य ओलोस किरहो, जो ज्या अंजीरान जाड़ा हेऱ्यो किरेल हे; पुण केदी ज्या बोयड़ाह बी किहो, काय उखेल जा, एने देरीयाम जाय पोड़, ते ज्यो एय जाय। 22एने जो काय तुमू विन्ता माय बुरहो केरीन मांगहो तो सोब तुमूह जुड़ी।”

यीशुन आदिकार पोर सावाल

(मरकुस 11:27-33; लुका 20:1-8)

23यीशु मोंदिर माय जायीन हिक आपतालो, तेवी मुखी चाकऱ्या एने डायला माणहे तान जागे आवीन फुशा, “तु ज्य काम कुणीन आदिकार माय किरेह? एने तुवाह ज्यो आदिकार कुण आपेल?”

24यीशु ताह जापाप आप्यो, “मी बी तुमूह एक वात फुसथो, केदी तो माहु किहो, ताहार मी बी केह काय ज्य काम कुणीन आदिकार माय केरथु। 25योहानान बपतीस्मा का रेन एतो? हेरगा उगे रेन काय माणहा उगे रेन?”

तेवी ता तान तान विचार केरने बाज गीया काय, केदी आपु केहु “हेरगान उगे रेन।” ताहार ज्‍यु आपुह केय काय, ओवता तुमू तान बुरहो काहा नाह केऱ्या? 26एने केदी केहु माणहान उगे रेन, ताहार आपुह माणहान बिय हे, काहाकाय ता आखा योहानाह जाणकार मानतेह। 27तेवी ता यीशुह केया, “आमुह नाह मालुम।”

यीशु बी ताह केयो, ते ओवतो काल्ला आदिकार माय मी ज्य केरथु तो मी बी तुमूह केत नाह।

दुय सोरान किस्सो

28तुमूह काय सोमेजतेह, एक माणहान दुय सोरा एता; तु पेल्ला फाय जायीन किथे, “एय बेटा, आज तु अंगुरान वाड़ीम काम केर।” 29तो जापाप आप्यो, “मी नाह जाण्यो” पुण पासाण रेन ताह पासतावो आवो एने तो गीयो। 30पुशो दिहरा बेटाख फाय जायीन तो तिहेस केयो, तो जापाप आप्यो, “होव जाथु,” पुण नाह गीयो। 31ज्या दुया माय रेन कुण आबाख ने मोरजी पुरी किऱ्यो?

ता केया, “पिल्लो बिटोख।” मी तुमूह खेरीच केथु काय फालो लेणार, एने खाराब बायकु तुमूह रेन पेल बोगवानान राज माय आवतेह। 32काहाकाय योहान खेरायीन वाटे रेन तुमरे फाय आयेल इतो, एने तुमू ता पोर बुरहो नाह केऱ्या, पुण फालो लेणार एने खाराब बायकु न्या ता पोर बुरहो केऱ्या, एने तुमू ज्य देखीन पासाण रेन बी नाह पासताना काय तान बुरहो केर लेता।6

खाराब किरसाणान किस्सो

(मरकुस 12:1-12; लुका 20:9-19)

33यीशु केयो, “उंजु एक किस्सो हुमलो, एक खेतान मालीक इतो, तो अंगुरान वाड़ी लागाड्यो, तान कावदेन वाड़ जेठी, एने ता माय रूहान केरता कुंडण्यो बाणायो; एने मालो बांद्यो, एने किरसाणाह तान ठिको आपीन दिहरा देसा माय जात रिनो।7 34जेवी फोले पाक गीया तेवी तो फोल लेणेन केरता तान पावराह किरसाणा फाय मुकल्यो। 35पुण किरसाण तान पावराह देरीन, थोड़ाक जाणाह देना, एने थोड़ाक जाणाह मार देना; एने थोड़ाक जाणाह देगड़ा केरीन देना। 36तो पुशो जास्ती पावराह मुकल्यो, एने ता ता हेऱ्या बी तिहेस केऱ्या। 37सेवली बुखेत तो तान बेटाख ता फाय ज्य किन मुकल्यो, काय ता मार बेटाख ने मान मेलती। 38पुण किरसाण बेटाख देखीन तान तान केया ज्‍यु ते वोस हे, आवो, ज्याह मार देता एने ज्यान आखो मालदेन लेय लेता। 39एने ता ताह देऱ्या एने अंगुरान वाड़ीम रेन बाहेर काड़ीन मार देना।”

40केरीन यीशु ताह फुशो, “जुलबुखे अंगुरान वाड़ीन मालीक आवी, ते ता किरसाणा हिऱ्यो काय केरी।”

41तो खाराब माणहाह खेतेम केर देय, “एने अंगुरान वाड़ीन ठिको दिहरा किरसाणाह आप देय, जा टेम पोर कामाय आपती रेती।”

42यीशु ताह केयो, तुमू केदी पुस्तेक माय ज्यो नाह वाच्‍या?8

“जा देगड़ाह मिस्तऱ्या खाराब बिगेर कामान सोमजेल एता,

तोस दिगोड़ कोपरान देड़ान दिगोड़ बोण गीयो?

ज्य मालीकान उगे रेन एनो, एने आमरी नेजरी माय जुलूम मोठो हे।”

43केरीन मी तुमूह केथु, “बोगवानान राज तुमू फाय रेन विसाय जाय; एने ओहली जातीह जी तान फोल आपी, तीह तो आप देय। 44जो ज्या देगड़ा पोर पोड़ी, तो चुरा चुरा वोल जाय; एने जा पोर पोड़ी, ताह देल देय।”9

45मुखी चाकऱ्या एने फरिसी तान किस्साह होमलीन सोमजी गीया काय ज्‍यु आमरास बाराम किथे। 46एने ता ताह देरणे होदताला, पुण माणहाह देखीन बिय गीया; काहाकाय माणहे ताह जाणकार सोमेजताला।