मरकुस 4

दाणा पेरनारान बाराम किस्सो

(मत्ती 13:1-9; लुका 8:4-8)

11

यीशु पुशो गेलीलान देरीयान मीरे हिकाड़ने बाज गीयो। एने ओली होवटाली माणहान गेरदी तान जागे टोलवाय गियी केरीन तो देरीया माय एक डोंडह्या पोर चेड़ीन बोह गीयो। एने माणहान गेरदी बुई पोर मेराम उबरियेल एती। 2एने यीशु ताह किस्सा माय जुलूम वातु हिकाड़ने बाज गीयो, एने ताह केयो,

3“हासकेरीन हुमलो! एक एदमी ईतो जो दाणा पेरनेन केरता गीयो। 4एने पेरनेन टेम माय थोड़ाक दाणा वाटीन दिड़े पोड़ना, तेवी चीड़ा आवीन ताह खाय गीया। 5एने थोड़ाक दाणा सापराट्या जागा माय पोड़ना, ताहरी दाणाह होवटो माटड्यो नाह जुड़नो, केरीन दाणा तुरुत उग गीया, 6जेवी दिह उगीन दोप लागो, तेवी हुका हेलगी गीया; काहाकाय मुल उपरूस एता, केरीन हुक गीया। 7थोड़ाक दाणा काटाल्या जुरखील्या माय पोड़ना, एने जुरखील्या वोदीन ताह दाब देना, एने ताह फोल नाह लागा। 8पुण थोड़ाक दाणा हाजाली बुई माय पोड़ना, एने ता उगना एने वोदीन फोलना: काल्लाह तीस मोण, काल्लाह साठ मोण, एने काल्लाह होव मोण कामाय पाकनी।”

9एने यीशु केयो, “जा फाय होमेलनेन केरता कान एती, ता होमली लेय!”

किस्सान मतलब

(मत्ती 13:10-17; लुका 8:9,10)

10जेवी यीशु एखालोच रेय गीयो, तेवी तान हाती एने ता बारा जाणे मिलीन यीशुह ज्या किस्सान बाराम फुशा। 11यीशु ताह जापाप आप्यो, “तुमूह ते बोगवानान राज ने मालमात ने सोमेज आपेल हे, पुण बाहेरवाला माणहाह सोब वातु किस्सा माय ईथे, 12काहाकाय,

“ता देखतेह ते खोरा,

पुण ताह कायच नाह देखात;

एने ता होमेलतेह ते खोरा,

पुण कायच सोमेजते नाह,

केदी ता ओहलो केरता, ते बोगवानान उगे वोलता,

एने तो ताह माफ केर दितो।”

दाणा पेरनारान किस्सान मतलब

(मत्ती 13:18-23; लुका 8:11-15)

13यीशु ताह फुशो, “काय तुमू ज्या किस्साह नाह सोमेजते? ते ओवता तुमू न्या आखा किस्साह किहीक सोमेजहो? 14पेरनार बोगवानान वचन पिरेह। 15थोड़ाक माणहे वाटी पोर पुड़ेल दाणान गेत हेते; ता वचन ते होमेलतेह, पुण सैतान आवीन ता माय जो पेरायेल वचन एतो, ताह निकाल लिथे। 16थोड़ाक माणहे सापऱ्याटी बुई पोर पुड़ेल दाणान गेत हेते। जा वचन होमेलताच खुसी माय वचन मान लेतेह। 17पुण ता माय मुल नाह रेणेन कारेण ता थोड़ास दिह्यान केरता रेतेह। जेवी ता पोर वचनान कारेण दुख एने तेकलीत आवीह, तेवी ता चालोच पासाण एय जातेह। 18थोड़ाक माणहे काटाल्या जुरखील्या माय पेरायेल दाणान गेत हेते। जा वचनाह होमेलतेह, 19पुण ज्यी दुनियान बाराम चिन्ता, मालदेनाह मोंग केरने, एने दिहऱ्यु वोस्तुन लालुच ता माय रिगीन वोदता वचनाह दाब लिथे, एने तो विणफोल्योस रेय जाथे। 20पुण थोड़ाक माणहे हाजाली बुई माय पुड़ेल दाणान गेत हेते। ता वचन होमलीन स्वीकार लेतेह एने फोल लावतेह: काल्लाह तीस मोण, काल्लाह साठ मोण, एने काल्लाह होव मोण लावतेह।”

दिवान बाराम किस्सो

(लुका 8:16-18)

212

यीशु ताह केयो, “काय दिवाह पायला एने खाटलान बुंदे मेलनेन केरता पेटाड़नु नाह? पुण दिवाह कोठी पोर मेलनेन केरता पेटाड़नु? 223काहाकाय बोगवानान राज तुमूह लिकायेल लागेह, पुण ज्यानकेरता हे काय आखो उगड़ी जाय; एने काईस बी लिकायेल नाह सोतो, जो उजाला माय नाय आवी। 23जान होमेलनेन केरता कान एती, ता होमली लिवो!” 244

पुशो यीशु ताह केयो, “तुमू जो होमेलतेह ता पोर खास केरीन द्यान मीलो! जिहकेरीन तुमू दिहरा हेऱ्या वेवारो केरतेह, तिहेस केरीन बोगवान बी तुमरे हिऱ्यो वेवार केरी, पुण ताह रेन बी वोदार केरी। 255काहाकाय जा फाय काह हे ताह उंजु आपाय जाय, एने जा फाय काय नाह सोतो, ता फाय जो काय थोड़ोक हे, तो बी लेवाय जाय।”

उगणारा दाणान बाराम किस्सो

26यीशु पुशो केयो, “बोगवानान राज ता माणहान गेत हे, जो तान खेता माय दाणा पिरेह। 27तो राती जाईन हुव गीयो, एने विगोस जाग जाथे, जेवी दाणा फुटीन हुका निकेलना एने वोदेह। तीबी तो माणुह नाह जाणेत काय ज्य किहीक ईथे। 28बुय आपाप फोल आपेह पेल हुका उगणु; एने ओवता केणहे आवणु, एने तान पासाण केणहा माय बोरायेल दाणा। 29जेवी दाणा पाक जातेह, तेवी तो माणुह दातला केरीन काटणेन सुरवात किर दिथे, काहाकाय काटणेन टेम आव लागेल हे।”

राईन दाणान किस्सो

(मत्ती 13:31,32,34; लुका 13:18,19)

30यीशु फुशो, “आपु बोगवानान राज ने गेणती कायता हेऱ्या केरने, एने काल्ला किस्सा हेऱ्या तान तोल केरने? 31बोगवानान राज राईन दाणान गेत हे, जो पेराणे तुलबूखे तो बुईन आखा दाणाह रेन आत्यो रीथे। 32थोड़ीक वार माय तो उगीन मोठो एय जाथे एने बाजी पालाह रेन मोठो एय जाथे। एने ताह ओहला मोट मोटला डालख्यु फुटणु काय चीड़ा बी तान डालीन सावला माय पांजरो बाणावीन रेय सेकतेह।”

33यीशु न्यान गेत जुलूम दिहरा किस्सान वापेर केरीन माणहाह वचन होमलाड्यो, तो ताह तोलोस केयो जोला ता सोमेज सेकताला। 34एने यीशु बिगेर किस्सान वापेर केरीन ताह कायच नाह हिकाड़तालो, पुण जेवी तो चेला हिऱ्यो एखालोच रेतालो, तेवी आखी वातुन मतलब तान खास चेलाह केय आपतालो।

यीशु वादोणाह ठावको केरने

(मत्ती 8:23-27; लुका 8:22-25)

35तेदिस हांज पोर यीशु तान चेलाह केयो, “चाला आपु देरीयान ती मीरे जाता।” 36केरीन ता गेरदीह सोड़ देना; एने जा डोंडह्या माय यीशु बोह रियेल ईतो, चेला बी ता डोंडह्या माय बोहीन ताह ली गीया। एने ता हेऱ्या दिहरा जुलूम होवटा डोंडह्या बी एता। 37तेवी उचकाहुच एक मोटलो वादोण आवो, एने जेलखा डोंडह्या हेऱ्या ठोकाणे बाज गीया, न्या वोर काय पाणी डोंडह्या माय बोराणे बाज गीयो। 38एने यीशु डोंडह्यान पासाणल्या पुड़ाम उहत्या पोर मुंड मेलीन हुवणे बाजरियेल ईतो। एने ता जाईन यीशुह जागाड्या एने केया, “एय गुरू, काय तुवाह फिकेर नाह सोती आमु मोरने पोर हेते?”

39तेवी यीशु उठीन वादोणाह उकुम आप्यो, एने जेलखाह केयो, “ठावको रे! एने थोब जा!” ओवतो वारो थोब गीयो, एने आखी उगे ठावको एय गीयो।

40तेवी यीशु चेलाह केयो, “तुमू काहा ओला बितेह? काय तुमूह एवी वोर बुरहो नाय मीले?”

41पुण ता जुलूम बिय गीया एने एका दिहराह केणे बाज गीया, “ज्यो एदमी कुण हे? वादोण एने जेलखा बी ज्यान उकुम मान्तेह!”