Nahali Bible
लेव्य 4
पापबोलीन नेम
उवतो यहोवा मुसाह केयो, इस्राएल ने माणहाह ज्य के काय केदी इखेह माणुह ता कामाम रेन जाह यहोवा नाह केरने कियेल हे, एगदा एक कामाह बुल माय केरीन पापी बोण जाय।
एने केदी अबिषिक्त चाकऱ्यो ओहलो काम केरी, जान वोजेसे पोरजा दोसी ठेराय, ताहार ताह तान किरेल पापान केरता एक हाजा बोयलाह यहोवाह पापबोली केरीन चेड़ावणे जुवे। तो ता बोयलाह मिलापवाला तोम्बुन बायणा पोर यहोवान ओंगाण ली जायीन तान मुंडी पोर आथ मेली, एने ता बोयलाह यहोवान सामने बोली किरे। एने अबिषिक्त चाकर्यो बोयलान लुयीम रेन थोड़ोक लेन मिलापवाला तोम्बुम ली जाय; एने चाकर्यो तान आंगली लुयीम बुड़ावी बुड़ावीन एने ताम रेन थोड़ीक लेन चोखाला जागान विचीवाला पोड़दान ओंगाण यहोवान सामने हात वार सिड़के। एने चाकर्यो ती लुयीम रेन थोड़ीक हाजी गेंदाणी दुणी वेदीन हिंगा पोर जो मिलापवाला तोम्बु माय हे, यहोवान सामने लागाड़े; ओवतो बोयलान आखी लुयीह होमबोलीन वेदीन पाया पोर जो मिलापवाला तोम्बुन बायणा पोर हे रोचीव देय। ओवतो तो पापबोलीन बोयलान आखी चेरबीह ताह रेन आलेग किरे, मतलब जी चेरबी केरीन आतड्या डापायेल रेतेह, एने जोली चेरबी ताम लेटकेल रिथे, एने दुयू बुका एने तान उपेरवाली चेरबी जी कोमरा हेऱ्यी रिथे, एने बुका बेल कालजाह डापण्यी कातली, ज्या आखाह तो इह केरीन आलेग किरे। जीहे मेल मिलाप बोलीवाला चेड़ावान बोयलाह रेन आलेग केराय जातेह, एने चाकर्यो न्याह होमबोलीन वेदी पोर हेलगाड़े। पुण ता बोयलान चामड़ो, पाय, मुंड, आतड्या, साण, एने बोयलान आखो माह, मतलब आखा बोयलाह पाड़ावान बाहेर चोखाला जागाम, जाहरी रोखड़ो टाकाय जाथे, ले जायीन लाकड़ा पोर मेलीन आक्ठा केरीन हेलगाड़े, जाहरी रोखड़ो टाकाय जाथे, तो ताहरीस हेलगाड़ाय जाय।
केदी इस्राएल ने आखी मोंडली बुल माय पाप केरी, एने ज्यी वात मोंडलीन नेजरी माय लिकायेल हे, जाह नाह केरनेन आदेस बोगवान आपेल हे, केदी ओहलो ईथे ताहार ता दोसी ठेराती। ते जेवी तान किरेल पाप देखाय जाय, तेवी मोंडली एक बोयलाह पापबोली केरीन चेड़ावे। ता ताह मिलापवाला तोम्बुन ओंगाण ली जाय; एने मोंडलीन डावाला माणहे आप आपणा आथाह यहोवान ओंगाण बोयलान मुंडी पोर मेली, एने तो बुयेल यहोवान सामने बोली केराय जाय। तेवी अबिषिक्त चाकर्यो बोयलान लुयीम रेन थोड़ीक मिलापवाला तोम्बु माय ली जाय, एने चाकर्यो तान आंगली लुयीम बुड़ावीन तीह विचीवाला पोरदान ओंगाण हात वार यहोवान सामने सिड़के। एने तीस लुयीम रेन वेदीन हिंगा पोर जो यहोवान ओंगाण मिलापवाला तोम्बुम हे लागाड़े; एने वोचेल आखी लुय होमबोलीन वेदीन पाया पोर जो मिलापवाला तोम्बुन बायणा पोर हे रोचीव देय। एने चाकर्यो वासड़ान आखी चेरबी निकालीन वेदी पोर हेलगाड़े। जीहे पापबोलीन बोयला हेऱ्या किरेल एता तिहेच केरीन न्या हेऱ्या बी किरे; इह केरीन चाकर्यो इस्राएली माणहान पाप डापे, ज्या केरीन यहोवा इस्राएल ने माणहाह माफ केर देय। एने चाकर्यो बोयलाह पाड़ावान बाहेर ली जायीन तिहेच केरीन हेलगाड़े, जिहकेरीन पेल तो बोयलाह हेलगाड़ेल इतो; ज्य पुरी मोंडलीन केरता पापबोली ठेराय।
जेवी एगदो मुखी एदमी पाप केरी, मतलब आपणो बोगवान यहोवान एगदा उकुमान विरूद बुल माय काह केरीन दोसी एय जाय, एने तान पाप आखाह मालुम पोड़ जाय, ताहार तो एक हाजो बुकोड़ बोली केरनेन केरता ली जाय। एने बोकड़ान मुंडी पोर तान आथ मेली, एने बोकड़ाह ता जागा पोर बोली किरे, जाहरी होमबोली यहोवान ओंगाण बोली केराय जातेह; ज्य पापबोली ठेराय। तेवी चाकर्यो तान आंगली केरीन पापबोली जेनवेरान लुयीम रेन थोड़ीक लेन होमबोलीन वेदीन हिंगा पोर लागाड़े, एने तान लुय होमबोलीन वेदीन पाया पोर रोचीव देय। एने चाकर्यो तान आखी चेरबीह मेल मिलाप बोलीन चेरबीन गेत वेदी पोर हेलगाड़े; एने चाकऱ्यो मुखीन पापाह डापे, तेवी यहोवा ताह माफ केरी। 1
केदी सादा माणहाम रेन एगदो बुल माय पाप किरे, ता कामा माय रेन एगदो काम किरेह, जाह केरनेन यहोवा मोना किरेल हे, ते तो दोसी ठेराथी, ताहार तो माणुह ता पापान वोजेसे एक हाजी बोकड़ी बोलीन केरता ली यावे; तो तान आथ पापबोली चेड़ावण्या जेनवेरान मुंडी पोर मेली, एने होमबोलीन जागा पोर ताह मारे। एने चाकर्यो तान लुयीम रेन तान आंगली केरीन थोड़ीक लुय लेन होमबोलीन वेदीन हिंगा पोर लागाड़े, एने तान आखी लुयीह तीस वेदीन पाया पोर रोचीव देय। एने तान आखी चेरबीह मेल मिलाप बोलीन जेनवारान चेरबीन गेत आलेग किरो, तेवी चाकऱ्यो ताह यहोवान केरता होमबोलीन वेदी पोर हाजी गेंदीन केरता हेलगाड़ने जुवे, इह केरीन चाकर्यो ता माणहान पापाह डाप देय, एने यहोवा ता माणहाह माफ केर देय।
केदी तो माणुह पापबोलीन केरता एक मेंड्रान पिलो लावी, ताहार ती हाजी बोकड़ी रेय, एने तो तान आथ पापबोलीन मुंडी पोर मेलने जुवे, एने ताह ता जागा पोर पापबोलीन रूप माय मारने जुवे, जाहरी ता होमबोलीन जेनवेराह मारतेह। तेवी चाकर्यो तान आंगली केरीन पापबोलीन लुयीम रेन थोड़ीक लेन होमबोलीन वेदीन हिंगा पोर लागाड़े, एने तान आखी लुयीह वेदीन पाया पोर रोचीव देय। एने चाकऱ्याह तान आखी चेरबीह मेल मिलाप बोलीन मेंड्रान पिलान चेरबीन आलेग केरी, एने चाकऱ्यो यहोवान केरता आक्ठान द्वारा केराण्यी बेटीन गेतुस वेदी पोर हेलगाड़े, इह केरीन चाकर्यो ता माणहान पापाह डाप देय, एने यहोवा ता माणहाह माफ केर देय।
Source notes (1)
- Cross-reference गिनती 15:27-28
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.