Nahali Bible
लेव्य 22
बेट चेड़ावणेन चोखापोणा
यहोवा मुसाह केयो, हारून एने तान सोराह के, “इस्राएल ने माणहान चोखाली केरायेल वोस्तु से ज्यीह ता मार केरता चोखी केरतेह आलेग मेली, एने मारा चोखाला नावाह एठो मा किरहो, मी यहोवा हे। एने ताह के काय तुमरी पिढ़ी माय रेन आख्यु वोस माय रेन इखेह तान एठापोणान देशा माय त्यु चोख्यु किरेल वोस्तुह आथले, ज्युह यहोवान केरता चोखी केरतेह, तो माणुह मार सामने रेन खेतेम केराय जाय; मी यहोवा हे।”
हारूनान वोचीम रेन काहा नाय एय जो कोढ़ी एय, नाहते तान सफेदपाणी वोयणार एय, तो माणुह जाह वोर चोखो नाय एय जाय, ताह वोर चोखी किरेल चिजीम रेन काय नाय खाय। एने जो देड़ान वोजेसे एठो इयेल एय, नाहते जान अमरपाणी पुड़ेल एय, ओहला माणहाह जो कुण आथले, एने जो कुण एगदा ओहला लोलनारे जेन्तुह आथले जा केरीन माणहे एठा एय जातेह, नाहते एगदा ओहला माणहाह आथले जा माय एगदी बातीन एठोपोणा एय, जी ताह बी लाग सिकेह, केदी इखेह माणुह त्यु चिजुह आथले ताहार तो हांज पोर वोर एठो रेय, एने जाह वोर पाण्या केरीन उंगले नाय ताह वोर चोखाली चिजीम रेन काय नाय खाय। तो दिह बुड़ने बुकेत चोखो ठेराय; एने तेवी तो चोखाली चिजीम रेन खाय सेकी, काहाकाय तान खाणो तोस हे। केदी चाकर्यो इखेह मुरेल जेनवाराह नाहते एगदा दिहरा जेनवारान द्वारा माराय जायेल हे, ताह खाएन तो सोताह एठो नाय केरी; मी यहोवा हे। केरीन चाकऱ्या माणहे मारा नेमान पालेन किरे, ओहलो नाय एय काय ता तीह एठी केरीन पापान बार विसे, एने न्युन वोजेसे मोरी बी जाय; मी त्युह चोखो केरनार यहोवा हे।
“दिहरा गेराणान माणुह एगदी चोखाली वोस्तुह नाय खाणे जुवे, केदी तो चाकऱ्या हेऱ्यो रेणार पारायो एय नाहते मोजुर एय, तीबी नाय खाय। केदी चाकर्यो एगदा माणहाह तान पोयशा आपीन वेचातो लेय, ताहार तो पावोर चोखाल्यु चिजीम रेन खाय सिकेह; एने जा पावोर चाकर्यान गेर पायदा इयेल हेते, ता बी तान चोखाला खाणाम रेन खाय सेकतेह। केदी चाकर्यान बेटीख एगदा पाराया गेराणा हेऱ्यी वाराड़ केरी जो चाकर्यो निह एय, ताहार ती बेट किरेल चोखाली चिजीम रेन काय नाय खाय। केदी चाकर्यान बेटीख रांडायेल नाहते गेराम रेन काड़ायेल एय, एने तीन सोरा निह एती, एने ती सोरान रितीन गेत तीन आबाख ने गेराम रेती एय, ताहार ती तीन आबाख ने खाणाम रेन खाय; पुण पाराया गेराणान कुण ताम रेन नाय खाय। एने केदी इखेह माणुह एगदी चोखाली चिजीम रेन काह बुल माय खाय लेय, ताहार तो माणुह चोखाल्यु चिज पाचवो ईसो वोड़ावीन चाकऱ्याह बोर देय। चाकर्यो इस्राएल ने माणहान चोखी किरेल चिजुह, ज्युह ता यहोवान केरता चेड़ावती, एठ्यु नाय केरी। ता ताह तान चोखाल्यु चिजीम रेन खावाड़ीन ताह गुनान दोस नाय विसाड़े; मी तान चोखो केरनार यहोवा हे।”
ओवतो यहोवा मुसाह केयो, “हारून एने तान सोराह, एने इस्राएल ने आखा माणहाह सोमजाड़ीन के काय इस्राएलवाला माणहे, नाहते इस्राएल माय रेणारे पाराया माणहाम रेन कुण बी काहा नाय रेय, जो मानता मानेल एय नाहते खुसीनबोली केरनेन केरता यहोवाह एगदी होमबोली चेड़ावे। ताह स्वीकार केरनेन केरता हाजो पालन्यो जेनवार एने मेंडो नाहते बुकोड़ चेड़ावणे जुवे। जा जेनवारा माय दोस एय, ताह मा चेड़ावहो, काहाकाय बोगवान ताह स्वीकार नाय केरी। एगदो माणुह यहोवाह मेल मिलाप बोली चेड़ावी, ती मेल मिलाप बोली ता माणहान द्वारा आपेल मानता एय, नाहते ज्यी सोतान मोरजी से किरेल एय, जीह तो माणुह यहोवाह चेड़ावेह, तो पालन्यो जेनवार, मेंडो, नाहते बुकोड़ एय, पुण तो हाजालो एय, ता माय कायच दोस नाय रेय। तुमू यहोवाह ओहला एगदा जेनवारे नाय चेड़ावणे जुवे जा आंदला, मुड़ायेल, लेंगड़ो, फुड़ावालो, खुवड़ो एने दादवालो, तुमू यहोवान वेदीन आक्ठा पोर ता दुखाऱ्या जेनवेरान बेट मा चेड़ावहो। जा एगदा पालन्या जेनवार, मेंडान नाहते बोकड़ान एगदो पाय लांबो नाहते सोटो एय, ताह सोतान मोरजी केरीन चेड़ाव सेकतेह, पुण मानता पुरी केरनेन केरता तो स्वीकार नाय एय। केदी जेनवारान आंड जेखमी, कुटेल नाहते चिरायेल एय, ताहार तुमू ता जेनवेरान बेट यहोवाह मा चेड़ावहो। न्या माय रेन एगदाह तुमू आपणा यहोवान खाणो जाणीन एगदा पाराया देसावाला फाय ओहला जेनवाराह नाय लेणे जुवे, काहाकाय न्या जेनवाराम दोस हे, केरीन ता स्वीकार नाय एती।”
ओवतो यहोवा मुसाह केयो, “जेवी एगदो बुयेल नाहते मेंडो नाहते बोकड़ीन पिलो वियाय, ताहार तान आईख हेऱ्यो ताह हात दिह रेणे दिवो, ओवता आठवे दिह रेन तान बाद ज्या पिलाह यहोवाह आक्ठान द्वारा एण्यी बोलीन वेहाम स्वीकार केराय जाय। पुण तुमू तेदिहस पालन्यो जेनवार, मेंड्री नाहते बोकड़ी एय, तीह एने तीन पिलाह बोली मा किरहो। एने जेवी तुमू यहोवान केरता दन्यवाद ने मेल मिलाप बोली चेड़ावहो, ताहार तीह इह केरीन किरज्यो काय तीह बोगवान स्वीकार किरे। माह तेदिहस खावाय जाय, ताम रेन कायच बी वेगोस वोर रेणे नाय जुवे; मी यहोवा हे।”
“तानकेरता तुमू मारा उकुमाह मानज्यो एने तान पालेन किरज्यो; मी यहोवा हे। एने मारा चोखाला नावान आदार किरज्यो, काहाकाय मी इस्राएल ने माणहान केरता जोरेवरीस चोखो मानाय जाह; काहाकाय मी तुमरो चोखो केरनार यहोवा हे, जो तुमूह मिस्र देसाम रेन निकाल लावो, जान वोजेसे मी तुमरो बोगवान बोणनो; मी यहोवा हे।”
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.