Nahali Bible
लेव्य 2
एन बेटीन नेम
जेवी एगदो माणुह यहोवान केरता एन बेट चेड़ावी, ताहार तो मोयदो चेड़ावे; एने ता माय तेल रोचवीन तान उपेर हालयान ढिक मेली; तेवी तो ताह हारूनान बेटाख फाय जा चाकऱ्या हेते लावे। एने तो तेल एने एन बेट एने हालयान ढिक माय बेचकायेल एक मुठ बोर मोयदो निकाले, तेवी चाकर्यो वेदी पोर एर केरावणेन रूप माय फिटाह आक्ठाम हेलगाड़े काय यहोवान केरता हाजी गेंदाणी बेट रेय। एने वोचेल एन बेट हारून एने तान सोरान केरता रेय; ज्यी बेट यहोवाह आक्ठा केरीन आपाण्यी बेटी माय आखाम रेन चोखाली रेय।
जेवी तुमू चुलाम रांदेल एन बेट लावे ताहार ज्य अखमीरी मोयदान रोटा नाहते उपेर रेन तेल टाकेल अखमीरी रोटा रेणे जुवे। एने केदी तारी बेट तावा पोर चुड़ायेल एन बेट रेय, ताहार तो तेल बेचकायेल अखमीरी मोयदान फिटान रेणे जुवे। तीह टुकड़ा टुकड़ा केरीन ता पोर तेल टाकज्यो, तेवी ती एन बेट एय जाय। केदी तुमू एन बेट तेलनेन केड़ाय माय रेन लावतेह, ताहार तो तेल बेचकायेल मोयदान फिटान एणे जुवे। एने जी एन बेट ज्यी चिजीम रेन एगदान बोणेल एय, ताह यहोवान आहने ली जाजे; जेवी ती चाकऱ्या फाय लावाय जाय, तेवी चाकर्यो ताह वेदीन आहने ली जाय। एने चाकर्यो एन बेट माय रेन एर केरावणार ईसो निकालीन वेदी पोर हेलगाड़े काय ज्यान हाजी गेंद केरीन यहोवान केरता बेट रेय। वोचेल एन बेट हारून एने तान सोरान रेय; ज्यी बेट यहोवान आख्यु बेटी माय रेन जुलूम चोखाली रेय।
एगदी एन बेट तुमू यहोवान केरता चेड़ावहो, ताहार खमीर बेचकीन मा बाणावहो, तुमू केदी बी यहोवान केरता वेदीन आक्ठाम बेटीन रूप माय खमीर एने मोवाल हेलगाड़हो मा। तुमू न्याह पेल्ली मेर ने चेड़ावो केरीन यहोवान केरता बेट चेड़ावज्यो, पुण खमीर एने मोवाल हाजाली गेंदीन रूप माय वेदीन आक्ठाम हेलगाड़हो मा। तुमू तुमरी लायेल एकेक एन बेट माय मिठ टाकज्यो; एने तुमरी एगदी एन बेट तुमरा बोगवाना हेऱ्यी बांदायेल वाचान मिठा बिगेर एणे मा दिहो; तुमरी आखी बेटी हेऱ्या मिठ लावणे जुवे।
केदी तु यहोवान केरता पेल्ली मेरीन एन बेट चेड़ावे, ताहार तारी पेल्ली मेरीन एन बेटीन केरता आक्ठा माय बुंजेल निल्यु निल्यु उंब्यु, मतलब उंब्युह मोलीन दाणाह निकाल लिज्यो, ओवता एन बेटीन रूप चेड़ावज्यो। एने ता माय तेल टाकज्यो, एने तान उपेर हालयान ढिक मिलज्यो; तेवी ती एन बेट एय जाय। एने चाकर्यो चोलीन निकालेल दाणाह, एने तेलाह, एने आखा हालयान ढिक एर केरावणार ईसो केरीन हेलगाड़ दे; ज्यी यहोवाह वेदीन आक्ठा केरीन चेड़ायेल बेट हे।
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.