Nahali Bible
लेव्य 18
सारिरीक समंद ने बाराम नेम
ओवतो यहोवा मुसाह केयो, इस्राएल ने माणहाह के काय मी तुमरो बोगवान यहोवा हे। न्या आवणेन पेल तुमू मिस्र देसाम एता, तुमू तो मा किरहो; जो ता एतालो, मी तुमूह कनान देस ली जाथु; तुमूह तो नाह केरनु सोतो, जो ता देसाम ईथे! तुमू मारोस नेम मानज्यो, एने मारास नेमाह मानते लेन ता पोर चालज्यो। मी तुमरो बोगवान यहोवा हे। तानकेरता तुमू मारा नेमाह एने मारा निर्णयाह कायेम मानज्यो; जो माणुह तान पालेन किरेह, ताहार तो जीवतालो रेय! मी यहोवा हे।
तुमरे माय रेन एगदो तुमरा एगदा आहेंल्या गेरल्यान सेरीर उगाड़नेन ता फाय नाय जाय! मी यहोवा हे। तुमरी आईख ने सेरीर, जो तुमरा आबाख ने सेरीर हे, मा उगाड़हो; ती ते तुमरी आहख हे, केरीन तुमू तीन सेरीर मा उगाड़हो। तुमरी जिजीक ने बी सेरीर मा उगाड़हो; ती ते तुमरा आबाख ने सेरीर हे। तुमरी खास बोणीख एय नाहते जातहेगी एय, नाहते ती तुमरा गेराम पायदा इयेल एय, केदी दिहरे जागे, तीन सेरीर मा उगाड़हो। तुमरी बोतेरजीख नाहते तुमरी नातणीख ने सेरीर मा उगाड़हो, त्युन सेरीर ते सोमजो तुमरोस हे। तुमरी बोणीख जी तुमरा आबाख केरीन पायदा इयेल हे, ती तुमरी बोणीख हे, केरीन तीन सेरीर मा उगाड़हो। तुमरी फुयीख ने सेरीर मा उगाड़हो; ती ते तुमरा आबाख ने बोणीख हे। तुमरी जिजीक ने सेरीर मा उगाड़हो; काहाकाय ती तुमरी आईख ने गेरल्यी हे। तुमरा आजालाख ने सेरीर मा उगाड़हो, मतलब तान बायकुन आहने मा जाहो; ती ते तुमरी आजालीख हे। तुमरी वोवड़ीख ने सेरीर मा उगाड़हो; ती ते तुमरा बेटाख ने बायकु हे, केरीन तुमू तीन सेरीर मा उगाड़हो। तुमरी बाबीख ने सेरीर मा उगाड़हो; ती ते तुमरा बायाख ने सेरीर हे। एगदी बायकु एने तीन बेटीख दुयून सेरीर मा उगाड़हो, एने तीन बोतेरजीख नाहते तीन नातणीख तारी बायकु केरीन त्युन सेरीर मा उगाड़हे, त्यु ते आहेंल्यु गेरल्यु हेत्यु; इह केरीन केरने मोटलो पाप हे। जाह वोर तुमरी बायकु जीवताली हे, तुमू तीन बोणीख दिहरी बायकु मा बाणावहो, काय पेल्ली जीवताली रेते लेन तीन सेरीर बी उगाड़े।
जाह वोर एगदी बायकु तीन फाड़को आवणेन वोजेसे एठी रेय, ताह वोर ती फाय तीन सेरीर उगाड़नेन मा जाहो। तुमू तुमरा बायबांडलान बायकु फाय जायीन एठा मा इहो। तुमू तुमरा एगदा सोराह आक्ठान द्वारा मोलेक देवान बोली केरीन मा चेड़ावहो, केदी तुमू इह केरीन केरतेह ताहार तुमू ज्योस देखाड़तेह काय तुमू तुमरा यहोवान नावाह आदार नाह केरते! मी यहोवा हे। तुमू एगदा एदम्या हेऱ्या तोहलोस सेरीर मा उगाड़हो, जीहे एगदी बायकु हेऱ्या केरतेह; ज्यो जुलूम खाराब काम हे। तुमू एगदा जेनवारा हेऱ्या खाराब काम केरीन एठा मा इहो, बायकु बी एगदा जेनवारा हेऱ्यी खाराब काम नाय किरे; ज्य ते बाणावटीन विरूद हे।
ओहलो काल्लो बी काम केरीन एठा मा एय जाहो, काहाकाय जा देसान माणहाह मी तुमरे ओंगाण रेन निकालन्यो हे, ता ओहला काम केरीन एठा एय जायेल हेते; एने तान देस बी एठो एय जायेल हे, केरीन मी ता पोर तान खाराब कामान डेन्ड आपथु, एने तो देस ता माय रेणाराह बाहेर निकाल दिथे। तानकेरता तुमू मारा नेमाह एने निर्णयान पालेन किरज्यो, तुमूह ताम रेन काल्लो बी खाराब काम नाय केरने जुवे; ज्यो नेम इस्राएल ने माणहाह एने जा तुमरी विचीम पाराया रेतेह, तान केरता हे। जा माणहे तुमूह रेन पेल ता देसाम रेना, ता आखा माणहे जुलूम खाराब काम केऱ्या, जा केरीन तो देस एठो एय जायेल हे। केदी तुमू बी तोस काम किरहो, ताहार तुमू देरतीह खाराब किरहो; जी तुमूह तिहेस केरीन बाहेर उगाल देय, जीहे तुमूह रेन पेल रेणारा माणहाह उगाल दियेल। केदी इखेह माणुह ओहलो खाराब काम किरे, ताहार ता माणहाह तान माणहा माय रेन खेतेम केराय जाय।
ज्यो उकुम जो मी तुमूह मान्नेन आपेल हे, ताह तुमू मान्नु हे, एने जा खाराब काम तुमूह रेन पेल इयेल हेते, ता पोर मा चालहो, एने ताह केरीन एठा मा इहो। मी तुमरो बोगवान यहोवा हे।
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.