Nahali Bible
लेव्य 16
पाप डापणेन दिह
जेवी हारूनान दुय सोरा यहोवान सामने आहने जायीन एठी बोली चेड़ाया एने मोर गीया, तान बाद यहोवा मुसा हिऱ्यो वातु किऱ्यो; एने यहोवा मुसाह केयो, तारा बाहख हारूनाह के काय वायदान पेटीन उपेर पाप डापणेवालो ढापण्यान ओंगाण, विचीवाला पोड़दा माय चोखाला जागाम ताल ताल नाय रिगे नाहते मोर जाहे; काहाकाय मी पाप डापणेन ढापण्यान उपेर वादलाम देखाह। जेवी हारून चोखाला जागाम रिगी तेवी इह केरीन रिगे, मतलब पापबोलीन केरता एक बुयेल एने होमबोलीन केरता एक मेंडाह लेन आवी। हारून होणीन फाड़कान चोखालो चोगो, एने तान सेरीरा पोर होणीन खुसटो पेरीन, एने होणीन फाड़कान पुट्टो एने होणीन फाड़कान पागड़ी बी बांदिन रिगे; ज्या चोखाला फाड़का हेते एने तो पाण्या केरीन उंगलीन न्याह पेरी। एने हारूनाह इस्राएली मोंडली फाय रेन पापबोलीन केरता दुय बुकोड़ एने होमबोलीन केरता एक मेंडो लेय। एने हारून ता पापबोलीन बोयलाह जो तास ने केरता रेय चेड़ावीन तान एने तान गेराणान पाप डापे। एने ता दुयु बोकड़ाह लेन मिलापवाला तोम्बुन बायणा पोर यहोवान सामने उबराखाड़े। एने हारून दुयू बोकड़ा पोर चिट्ठ्यु टाके, एक चिट्ठी यहोवान केरता एने दिहरी जेंगलाम सोड़नेन 1 केरता रेय। एने जा बोकड़ा पोर यहोवान नावान चिट्ठी निकले, ताह हारून पापबोलीन केरता चेड़ावे; पुण जा बोकड़ा पोर सोड़नेन केरता चिट्ठी निकले, तो यहोवान सामने जीवतालो उबराखाड़ाय जाय काय ता केरीन पाप डापाय जाय, एने तो सोड़नेन केरता जेंगलाम सोड़ाय जाय।
हारून ती पापबोलीन बोयलाह जो तास ने केरता एय आहने लेन आवी, एने ताह बोली केरीन तान एने तान गेराणान केरता पाप डापे। एने जी वेदी यहोवान सामने हे, ता पोर वाला हेलेगताला कोल्या केरीन बुरेल आरतीन तेलीह लेन, एने हारून तान दुय मुठूह कुटेल हाजी गेंदाणी आरतीन तेलीह बोरीन, विचीवाला पोड़दान माय लियावीन; ता हाजी गेंदाणी वोस्तुह यहोवान सामने आक्ठाम टाके, जा केरीन दुणीन दुवाड़ो गोवाय पोत्रान उपेरवाला पाप ढापणेन ढापण्यान उपेर सावाय जाय, नाह ते तो मोर जाय; तेवी हारून बोयलान लुयीम रेन थोड़ीक लेन पुर्वान उगे पाप ढापणेन ढापणान उपेर तान आंगली केरीन सिड़के, एने ओवतो ती लुयीम रेन थोड़ीक आंगलीन द्वारा ता ढापणान सामने बी हात वार सेड़की देय। ओवतो हारून ता पापबोलीन बोकड़ाह जो सादा माणहान केरता रेय, बोली केरीन तान लुयीह विचीवाला पोड़दा माय लियावो, एने जिह केरीन बोयलान लुयी केरीन हारून किरेल इतो, तिहेच केरीन हारून बोकड़ान लुयी केरीन बी किरे, मतलब ताह पाप ढापणेन ढापणान उपेर एने तान सामने सिड़के। एने तो इस्राएल माणहान एठोपोणा एने गुना, एने तान आखा पापान वोजेसे चोखाला जागान केरता बोली किरे; एने मिलापवालो तोम्बु जो ता हेऱ्यो तान बात बातीन एठोपोणान विचीम रिथे, तान केरता बी हारून तिहेच किरे। जेवी हारून पाप डापणेन केरता चोखाला जागाम रिगे, तुलबुखे रेन जाह वोर तो तान एने तान गेराणो एने इस्राएल ने आखी मोंडलीन पाप डापेन बाहेर नाय निकले ताह वोर कुण बी माणुह मिलापवाला तोम्बुम नाय रेय। ओवतो हारून निकलीन ती वेदी हेऱ्यो जो यहोवान सामने हे जाय एने तान केरता पाप डापे, मतलब बोयलान लुय एने बोकड़ान लुय दुयूम रेन थोड़ीक लेन ती वेदीन चारू खुणान हिंगा पोर लागाड़े। एने ती लुयीम रेन थोड़ीक तान आंगलीन द्वारा तीह सात वार ता पोर सिड़के, इह केरीन हारून इस्राएल ने माणहान आखा पापा से एठापोणा से चोखो केरी।
बोलीन बुकोड़
जेवी हारून चोखाले जागे एने मिलापवालो तोम्बु एने वेदीन केरता पाप डापणेन काम केर देय, तेवी जीवताला बोकड़ाह ओंगाण लियावो; एने हारून तान दुयू आथाह जीवताला बोकड़ान मुंडी पोर मेलीन इस्राएली माणहान खाराब काम, गुना एने तान आखा पापाह कबुल केरावी, इह केरीन हारून माणहान पापाह बोकड़ान मुंडी पोर टाकी, एने ताह एगदा माणहान आथे जो ज्या कामान केरता तियार एय, सुनसान जागाम मोकलीन सोड़ीव देय। तो बुकोड़ तान आखा खाराब कामाह तान उपेर विसीन एगदी उजाड़ी जागाम ली जाय; केरीन तो माणुह ता बोकड़ाह सुनसान जागाम सोड़ देय।
तेवी हारून मिलापवाला तोम्बुम जाय, एने जी होणीन फाड़काह पेरीन तो चोखाला जागाम रिगेल इतो, ताह काड़ीन ताहरीस मेल देय। ओवतो हारून तान पुरा सेरीराह चोखाला जागाम पाणी टाकीन दोवी, तेवी तो तान दिहरा फाड़काह पेरी, तो बाहेर आवी एने सोतान केरता एने माणहान केरता होमबोली चेड़ावीन सोताह एने माणहाह पापाह डापे। तेवी हारून वेदी पोर पापबोलीन चेरबीह हेलगाड़े। एने जा माणहे सोड़नेन बोकड़ाह सोड़ीन आवी, ता बी तान फाड़काह दोवे, एने पाण्या केरीन उंगले एने तेवी ता पाड़ावा माय रिगे। एने पापबोलीन बुयेल एने पापबोलीन बुकोड़ बी जान लुय चोखाला जागाम पाप डापणेन केरता पोचाड़ाय जाय, ता दुयू पाड़ावान बाहेर पोचाड़ाय जाय; तान चामड़ो एने माह एने साण आक्ठाम हेलगाड़ाय जाय। एने जा ताह हेलगाड़े ता आपणा फाड़काह दोवे, एने पाण्या केरीन उंगले, एने तान बाद ता पाड़ावा माय रिगे।
पाप डापणेन दिह मान्नो
“तुमरी केरता ज्यो नेम कायेम ने केरता रेय काय सातवा मोयनान दोहवे दिहे तुमू उपास किरज्यो, तुमूह कायच काम नाय केरने जुवे; ते दिह तुमरी हिऱ्यो इखेह तुमरा गावान रेय नाहते पारायो रेय, कुण बी काल्लीस बातीन काम नाय किरे; काहाकाय ते दिह तुमूह चोखो केरनेन केरता तुमरा पाप डापाय जाय; एने तुमू तुमरा आखा पापाह रेन यहोवान सामने चोखा ठेराहो। ज्यो दिह तुमरी केरता विहेवणेन खास दिह हे, तुमूह ते दिह उपास केरने जुवे, ज्यो नेम कायेम ने केरता रेय। एने जान तान आबाख ने जागा पोर चाकर्यान पोद ने केरता अबिषेक एने चोखो केराय जाय, तो चाकर्यो पापाह डापे, तो होणीन चोखाला फाड़काह पेरीन, चोखालो जागो एने मिलापवालो तोम्बु, एने वेदीन केरता पाप डापे; एने चाकर्यान एने मोंडलीन आखा माणहान केरता बी पाप डापे। एने ज्यो तुमरी केरता कायेम ने केरता नेम रेय काय इस्राएल ने माणहान केरता देर वोरीह एक वार तुमरा आखा पाप डापे।”
यहोवान ज्या उकुमान गेत जो तो मुसाह आपेल इतो हारून किऱ्यो।
Source notes (1)
- Footnote जेंगलाम सोड़नेन मुल माय अजाजेल
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.