Nahali Bible
यहोशु 21
लेवीह हियोर आपणो
तेवी लेवीन डायडायान गेराणान मुखी मुखी एदमी एलीआजर चाकऱ्यो, एने नुन ने बिटोख यहोशु, एने इस्राएली गेराणान डायडायान गेराणान मुखी मुखी एदम्या फाय आवीन 1कनान देसान शिलो गावाम केणे बाज गीया, “यहोवा मुसाह उकुम आपेल इतो काय तुमू आमुह रेणेन केरता गाव आपी, एने तुमू आमुह चोवगानान जागो आपी जा माय आमरा जेनवार चेर सेकती।” तेवी इस्राएली माणहे यहोवान ता उकुमाह मान्या, ता आप आपणा ईसाम रेन लेवीह चारायीन जागा बेल ज्या गावे आप्या।
तेवी कहातीन कुटूमान नावा पोर चिट्ठी निकल्यी, केरीन लेवी माय रेन हारून चाकऱ्यान सोराह यहुदा, शिमोन एने बिन्यामीन ने गेराणान ईसाम रेन तेरा गावे जुड़ना। बाकीन काहातीह चिट्ठी टाकीन दोह गावे आपेल एता, ज्या दोह गावे एप्रेम, दान एने मनश्शेन कुटूमान आदा गेराणान ईसाम रेन एता।
गेर्शोन कुटूमान माणहाह तेरा गावे चिट्ठी टाकीन आपेल एता, ज्या गावे इस्साकार, आशेर, नप्ताली एने बाशान माय मनश्शेन आदा कुटूमान एता।
ओवतो वोसीन गेत मरारी कुटूमान माणहाह रूबेन, गाद, एने जबुलूनान गेराणान ईसाम रेन बारा गावे आपाना।
जो उकुम यहोवा मुसान द्वारा आपेल इतो, तान गेत इस्राएल ने माणहे लेवीह चारायीन जागा बेल ज्या गावे चिट्ठी टाक टाकीन आप्या।
ता यहुदा एने शिमोनीन गेराणान ईसाम रेन ज्या गावे जान नाव लिखेल हे आप्या; ज्या गावे लेवी कहाती कुटूमाम रेन हारूनान सोरान केरता एता; काहाकाय पेल्ली चिट्ठी तास ने नावा पोर निकलेल एती।
ता ताह यहुदान बोयड़ावाला देसाम कावदेन चारायीन जागा बेल किर्यतर्बा गाव आप देना, जो अनाकान आबोख अर्बान नावा पोर केवानो एने हेब्रोन बी केवाथे। पुण ता हेयरान खेत एने तान गाव ता यपुन्नेन बिटोख कालेबाह तान सोतान बुय केरीन आप देना।
तेवी ता हारून चाकऱ्यान सोराह चारायीन बेल खुनीन आसरान गाव हेब्रोन, एने आप आपणा चारायीन जागा बेल लीबना, यत्तीर, एश्तमो, होलोन, दबीर, ऐन, युत्ता एने बेतशेमेश आप्या; इहकेरीन ता दुयू गेराणान ईसाम रेन नोव गावे आपाना।
एने बिन्यामीन ने कुटूमान ईसाम रेन तान तान चारायीन जागा बेल ज्या चार गावे आपाना, मतलब गीबोन, गेबा, अनातोत एने अल्मोन, चारायीन जागा बेल चार गावे। इह केरीन हारून वोचीन चाकऱ्याह तेरा गावे एने तान चारायीन जागा जुड़ना।
ओवता बाकीन कहाती लेवीन गेराणान ईसान गावे चिट्ठी टाक टाकीन एप्रेमान गेराणान ईसाम रेन आप्या।
मतलब ताह चारायीन जागा बेल एप्रेमान बोयड़ावाला देसाम खुनीन आसरो लेणेन शेकेम गाव आपानो, ओवता आप आपणो चारायीन जागा बेल गेजेर, किबसेम, एने बेथोरोन; ज्या चार गावे आपाना।
एने दानान गेराणान ईसाम रेन आप आपणो चारायीन जागा बेल, एलतके, गीब्बतोन, अयालोन, एने गत्रीम्मोन; ज्या चार गावे आपाना।
एने मनश्शेन आदा गेराणान ईसाम रेन आप आपणो चारीन जागा बेल तानाक एने गत्रीम्मोन; ज्या दुय गाव आपाना।
इहकेरीन बाकी कहातीन गेराणान आखा गावे चारायीन जागा बेल दोह ठेराना।
ओवतो लेवीन गेराणामवाला गेर्शोन मनश्शेन आदा गेराणान ईसाम रेन, आप आपणो चारायीन जागा बेल खुनीन आसरान गाव बाशान ने गोलान एने बेशतरा, ज्या दुय गावे आपाना।
एने इस्साकार ने गेराणान ईसाम रेन आप आपणा चारायीन जागा बेल किश्योन, दाबरत, यर्मुत, एने एनगन्नीम, ज्या चार गावे आपाना।
एने आशेरान गेराणान ईसाम रेन आप आपणा चारायी बेल मीशाल, अब्दोन, हेलकात, एने रहोब; ज्या चार गावे आपाना।
एने नप्तालीन गेराणान ईसाम रेन आप आपणा चारायीन जागा बेल खुनीन आसरान गाव गेलील ने केदेश, हम्मोतदोर, एने कर्तान; ज्या तीन गावे आप्या। गेर्शोनीह तान गेराणान गेत चारायीन जागा बेल आखास तेरा गावे जुड़ना।
ओवता बाकी लेवीह, मतलब मरारीन गेराणाह जबुलूनान गेराणान ईसाम रेन आप आपणा चारायीन जागा बेल योकनाम, कर्ता, दिम्ना एने नहलाल; ज्या चार गावे आप्या।
एने रूबेन ने गेराणान ईसाम रेन आप आपणा चारायीन जागा बेल बेसेर, यहस, कदेमोत, एने मेपात; ज्या चार गावे आप्या।
एने गादान गेराणान ईसाम रेन आप आपणा चारायीन जागा बेल खुनीन आसरान गाव गिलाद वालो रामोत, ओवतो महनेम, हेशबोन, एने याजेर, जो आखा मिलावीन चार गावे हेते आप्या।
लेवीन बाकी गेराणा मतलब मरारीन गेराणान गेत तान आखा गावे ज्यास ठेराना, इह केरीन ताह बारा गावे चिट्ठी टाक टाकीन आप्या।
इस्राएलीन सोतान जागान विचीम लेवीन आखा गाव आप आपणा चारायीन जागा बेल आट्ठेचाड़ीस ठेराना।
ज्या आखा गाव आप आपणा कावदेन वाला चारायीन जागा हेऱ्या ठेराना; ज्या आखा गावान ज्यीस देशा एती।
इस्राएली माणहान कनान देसा पोर पुरो आदिकार
इहकेरीन यहोवा इस्राएलीह तो आखो देस आप्या, जाह तो तान डायडाया हिऱ्यो सुगोण खाएन आपणेन कियेल इतो; एने ता तान आदिकारी एन ताम रेणे बाज गीया। एने यहोवा त्यु आख्यु वातुन गेत, जो तो तान डायडाया हिऱ्यो सुगोण खाएन कियेल इतो, ताह कावदेन आराम आप्यो; एने तान दुसमोना माय रेन कुण बी तान सामने टिक नाह सीकनो; काहाकाय यहोवा ता आखाह तान ताबाम केर दिनो। जोली बोलायीन वातु यहोवा इस्राएल ने गेराणाह कियेल इतो ताम रेन काल्ली बी वात नाह सुटनी; आखीन आखी पुरी एनी।
Source notes (1)
- Cross-reference गिनती 35:1-8
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.