Nahali Bible
यहोशु 18
वुचेल बुईन वाटणो
ओवती इस्राएलीन आखी मोंडली शिलो गावा माय एकठी एन ताहरी मिलापवाला तोम्बुह1 उब राखाड्या; काहाकाय देस तान ताबाम आव जायेल इतो। पुण तुलबुखे बी इस्राएल ने हात कुटूमे ओहला एता, जाह बोगवानान द्वारा वचन आपाणेन पोर बी ताह आपेल जागो नाह जुड़नो। केरीन यहोशु इस्राएल ने माणहाह केयो, “जो देस तुमरा डायडायान बोगवान यहोवा तुमूह आपेल हे, ताह तुमरे आदिकार माय केर लेणेम तुमू केवीह वोर डिल्लाय केरते रिहो? एवी एक एक कुटूमाम रेन तीन माणहे निवाड़ो जाह मी मोकलु काय ता देसान एक एक ईलाकाम जाय जायीन देखी, एने तान ईसान पारमाणे तान हाल लेख लेखीन मार फाय आवी। ता देसाह हात ईसाम वाट लेय, यहुदान माणहे देक्षिण उगे तान ईसाम रेती एने युसूफ ने गेराणान माणहे उत्तर उगे तान ईसाम रेती। एने तुमू देसान हात ईलाकान जाणकारी लेखीन मार फाय लेन आवो; एने मी न्याहरी तुमरी केरता आपणो बोगवान यहोवान सामने चिट्ठी टाकुह। एने लेवीन तुमरे विचीम काल्लो ईसो नाय रेय, काहाकाय यहोवान आपेल चाकर्यान पोदुस तान ईसो हे; एने गाद, रूबेन, एने मनश्शेन आदा गेराणान माणहे बी यरदन ने पुर्व उगे यहोवान सेवक मुसान आपेल तान तान ईसो सापड़ाव लियेल हेते।”
तेवी ता एदमी उठीन चाल देना एने जा ता देसान हाल लेखणेन जाताला, ताह यहोशु ज्यो उकुम आप्यो, “देसान एक कोपरे रेन दिहरे कोपरे वोर जाय जायीन तान हाल लिखो; ओवता मार फाय पोशा आवज्यो; एने मी न्याहरी शिलो माय यहोवान सामने तुमरी केरता चिट्ठी टाकुह।” तेवी ता एदमी देसान एक कोपरे रेन दिहरे कोपरे वोर फिरना, एने तान हेयरान हात ईसा केरीन तान हाल पुस्तेक माय लेखीन शिलोन पाड़ावाम यहोशु फाय आवा। तेवी यहोशु शिलो माय यहोवान सामने तान केरता चिट्ठ्यु टाक्यो; एने यहोशु ताहरी इस्राएल ने माणहाह तान ईसा पारमाणे देस वाट दिनो।
बिन्यामीन गेराणाह आपेल ईसो
बिन्यामीन कुटूमान चिट्ठी तान गेराणान पारमाणे निकल्यी, एने चिट्ठीन पारमाणे तान ईसो यहुदान वोसीन एने युसूफ वोसीन ईसान विचीम पोड़नो। एने तान उत्तर उगेवाली एद्दी यरदन रेन सुरवात एनी, एने यरीहोन उत्तर उगे रेन चेड़तेन पश्चिम ने उगे बोयड़ावाला देसाम लागती बेतावेन ने जेंगलाम निकेलनी; तारेन एद्दी लुज ने देक्षिण उगे मतलब बेतेल पोचनी, ओवती ता बोयड़ान आहने अत्रोतदार पोर उतेरनी जो नेचाला बेथोरोनान देक्षिण माय हे। ओवती पश्चिम उगेवाली एद्दी वोलीन बेथोरोनान सामने एने तान देक्षिण उगेवाला बोयड़े लागती, किर्यतबाल मतलब किर्यत्यारीम नावान यहुदान एक हेयराम निकल्यी; पश्चिम ने एद्दी ज्यीस एती। ओवती देक्षिण ने उगेवाली एद्दी पश्चिम रेन सुरवात एन किर्यत्यारीम ने सेवटे रेन निकलीन नेप्तोह ने पाण्यान जिरा पोर पोचनी; एने ता बोयड़ान सेवटा पोर उतेरनी, जी हिन्नोमान बेटाख ने गाटान सामने एने रपाईम नावान गाटान उत्तर उगे हे; ता रेन ती हिन्नोमान गाटाम, मतलब यबूसीन देक्षिण उगे लागती एनरोगेल जिर वोर जात रेनी। ता रेन ती उत्तर उगे वोलीन एनशेमेश रेन निकलीन ता गलीलोत ने उगे गियी, जी अदुम्मिम चेड़तीन सामने हे, ओवती ता रेन ती रूबेन ने बिटोख बोहन ने देगड़े वोर उतेर गियी; एने ता रेन ती उत्तर उगे जायीन यरदन नेदीन सामनेवालो बोयड़ान उगे लागती अराबा माय उतेरनी; तेवी ज्यी एद्दी बेथोगलान उत्तर ईसाम जायीन खारा देरीयान उत्तर ने खाड़ी पोर, मतलब यरदन नेदीन देक्षिण ने मुयाला पोर निवरी गियी, देक्षिण ने एद्दी ज्यीस एती। एने पुर्व उगे यरदन नेदीन एद्दी एती, इहकेरीन ज्यी बुय एती जी बिन्यामीन ने कुटूमाह आपेल; ज्यु कावदेन वाल्यु एद्दयु एत्यु।
बिन्यामीन ने कुटूमाह तान वोचीन पारमाणे ज्या हियोर जुड़ना, यरीहो, बेथोगला, एने एमेक्कसीस, बेतराबा, समारेम, बेतेल, अव्वीम, पारा, ओप्रा, कपरम्मोनी, ओफनी एने गेबा; ज्या बारा हियोर एने तावाला गाव जुड़ना। ओवतो गीबोन, रामाह, बेरोत, मिस्पा, कपीरा, मोसा, रेकेम, यिर्पेल, तरला, सेला, एलेप, यबूस मतलब यरूशलेम, गीबा एने किर्यत; ज्या चोवदा हियोर एने तावाला आखा गाव, बिन्यामीन ने ईसो तान कुटूमा पारमाणे ज्योस एतो।
Source notes (1)
- Footnote मिलापवाला तोम्बुह जाहरी बोगवानान उपस्तिती रेणे
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.