Nahali Bible
याकुब 3
जिबीह ताबाम केरने
एय मारा बाय बोणहा, तुमरे माय रेन जुलूम हिक आपणारे नाय बोणी काहाकाय तुमूह मालुम हे काय हिक आपणारेस होवटाह दोसी ठेराती। ज्यानकेरीन आपु आखा जुलूम वार चुक जातेह; जो कुण वचना माय नाह चुकेत, तोस ते सीदो माणुह हे एने आखा सेरीराह ताबाम केर सिकेह। जेवी आपु आपणा ताबाम केरनेन केरता गोड़ान मुया माय लगाम लागाड़तेह, तेवी आपु ताह जाहरी ताहरी फिरीव सेकतेह। सोचो, जारीक काय डोंडह्या कोलाक मोटला रेतेह एने जाल्ला वारा माय चालतेह तीबी एक आत्यीस पतवारी केरीन चालाड़नारान मोरजी पोर फिरने। तिहेस जिब बी एक आत्योच आंग हे, एने ती मोट मोठ्यु वातु केरतास, सोचो काय एक आत्यास जीगाल्या केरीन कोलाक मोठा जेंगला माय दावाड़ो लागाड़ सिकेह। जिब बी एक आक्ठो हे, जिब आपणा आंगा माय बिगेर खेरायीन एक आस हे; एने आखा सेरीर पोर डाग लागाड़ने, एने जीवाणान जोरा माय आक्ठो लागाड़ दिथे, एने नेरगान कुंडान आक्ठा केरीन हेलेगते रीथे। काहाकाय एकेक बातीन जेंगली जेनवारे, चीड़ा, एने लोलनारे जेन्तु एने पाण्या मायवाला मासा, ते माणहान ताबा माय एय सेकतेह; एने एय बी गीयाह। पुण जिबीह माणहा माय रेन कुणूस ताबाम नाह केर सेकते, ती एक ओहली चिज हे ज्यी केदी रोकाणेस नाह, ती जीव खेतेम केरन्या जेहेर माय बोरायेल हे। जी केरीन आपु मालीकान एने आबाख ने बोड़ाय केरतेह, एने माणहाह जा बोगवानान वेहा माय बोणेल हेते, हाराप देतेह। एकुस मुया केरीन दन्यवाद एने हाराप दुयू निकेलतेह, एय मारा बाय बोणहा ओहलो नाय एणे जुवे। एने पाण्यान एकुस जीराम रेन मीठालो एने खारलो पाणी दुयू निकेलने काय? एय मारा बाय बोणहा, काय अंजीरान जाड़ा पोर जेतुन, एने अंगुर ने वेलाम रेन अंजीर लाग सेकतेह? तिहेस केरीन खारला जिरा माय मीठालो पाणी नाह निकेल सिकेत।
हेरगावालो इकेल
तुमरे माय ईकेलवालो एने सोमेजदार माणुह कुण हे? जो ओहलो एय तो तान कामाह हाजाला बोलना चालना माय एने ती गेरबोड़ाय हिऱ्यो देखाड़ी, जी इकेल माय बोणने। पुण केदी तुमू आपणा आपणा मोना माय कोपेट, कुयराय एने विरोद मेलते एती, एने तुमरी एकली पोर मोठाय केरीन खेरायीन विरोद माय पाप मा किरहो। ज्यी इकेल ती नाह सोती जी हेरगाम रेन उतेरने पुण दुनियान, एने सेरीरावाली, एने सैतानी हे। काहाकाय जाहरी कुयराय एने सोतान जीवान विचारे ओहलो ईथे, ताहरी नेमान एने आखी बातीन खाराब वातु ईथे। पुण ज्यी इकेल उपेर रेन आवीह ती पेल ते चोखाली रीथे ओवतो मीलनसार, हुवालो, एने सान्ती वाली एने किव, एने हाजा फोला केरीन बोरायेल बेदबाव एने बिगेर कोपेटान रीथे। जा माणहे मेल केरावणारे हेते, सान्ती हेऱ्या बिज पेरतेह एने नियावान फोल सान्ती माय काटती।
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.