Nahali Bible
इब्रानियो 9
देरती एने हेरगान बोक्ती
ता पेल्ला वायदा माय बी बोक्तीन नेम एतो, एने उहलो चोखालो जागु ईतो जो ज्या जेगान ईतो। काहाकाय एक तोम्बु बाणायेल, पेल्ला तोम्बु माय दिवो, एने पाटलो, एने बेट किरेल रोटा एता; एने तो चोखालो जागु केवाह। दिहरो पोड़दान पासाण तो तोम्बु ईतो, जो चोखालो जागु केवाथी। ता माय होनान दुपदान, एने चार उगे रेन होना केरीन बाणायेल वायदान पेटी एने ज्या माय मन्ना माय बोरायेल होनान ठामलो, एने हारूनान डेंगी जी माय कोवला पांटा आव जायेल एता एने ता दुय दिगोड़ जा पोर उकुम लिखेल एता। तान उपेर दुय तेजोमय करुब एता, जा प्रायश्चित डापाणे बुखेत सावलो केर रियेल एता; न्यान एकेक केरीन वर्णन केरनेन टेम नाह सुतो।
ज्यु वोस्तु जीस रिती माय तियार एय गीयुह। ता पेल्ला तोम्बु माय चाकऱ्या कुलबुखे बी रिगीन सेवान काम निवरावतेह। पुण दिहरा माय मुखी चाकर्यो उलोस वोरीह बोर माय एकुस वार जाथे, एने बिगेर लुय लेन नाह जाणे; ती लुयीह तो तान केरता एने माणहान बुल चुकने केरता चेड़ावणे। ज्याकेरीन चोखालो जीव ज्योस देखाड़ने काय जाह वोर पिल्लो तोम्बु उबरिनोह, ताह वोर चोखाला जागान वाट नाह देखानी। ज्यो तोम्बु चालु कालान टेम ने केरता एक किस्सो हे; जा माय ओहली बेट एने बोलीदान चेड़ावणु, जाकेरीन बोक्ती केरनारान मोन खेरा नाह एय सेकते। काहाकाय ज्या ते खाणे पिणेन एने बात बातीन चोखो केरनेन सारिरीक नेम हेते, एने बोगवानान द्वारा नोवालो नेम बोणनेन वोर लागु एतेह।
पुण जेवी मसी आवणार हाजी वोस्तुन मुखी चाकर्यो बोणीन आवो, ते तो उंजु बी मोटला एने खेरला तोम्बु माय रेन बोणी, जो आथान बाणायेल नाह मतलब ज्या जेगान नाह।1 एने बोकड्या एने वासड़ान लुय ने द्वारे नाह पुण तास ने लुय ने द्वारे, एकुस वार चोखाला जागा माय रिगेल एने जेलेमक्यो सुटकारो सापड़ाव लिदो। काहाकाय जेवी बोकड्यान एने बोयलान लुय एने हिलगेल वासड़ान रोखड़ाह नेम ने गेत एठा माणहा पोर हितेड़नेन वोजेसे ता चोखा एय जातेह, एने नेम ने गेत बाहेरली रितीन वोजेसे एठोपोणा जात रिथे। ते मसी यीशुन लुय जो आपणे आपाह जेलेमकी जीवान द्वारे बोगवानान ओंगाण निर्दोस बेट चेड़ायेल, तुमरा मोनाह मुरेल कामा माय रेन काहा नाय चोखो केरी काय तुमू जीवताला बोगवानान सेवा किरो।
ज्यानकेरता तो नोवाला वायदान विचगालो हे, काय तान मोतीन द्वारे जो पेल्ला वायदान टेम ने पापाह रेन सुटकारो सापड़ावणेन केरता ईयेल हे, हाजा माणहे वायदान गेत जेलेमक्या मिरासाह सापड़ाव लेय। काहाकाय जाहरी वायदो केरायेल हे ताहरी वायदो केरनारान मोतीह सोमेज लेणो बी जोरवरी हे। काहाकाय ओहलो वायदो मोरने पोर पाको एणे, एने जाह वोर वायदो केरनार जीवतालो रिथे ताह वोर वायदो कामान नाह रेणे। केरीन पिल्लो वायदो बी बिगेर लुय ने नाह बांदायेल।2 काहाकाय जेवी मुसा सोब माणहाह कायदान एकेक उकुम होमलाव दियेल ते तो वासड़ा एने बोकड्यान लुय लेन, पाणी एने रातला फाड़का एने जुफा जाड़ान डेंगी हिऱ्यो, ता पुस्तेक पोर एने सोब माणहा पोर हितेड़ दिनो एने केयो, “ज्यी ता वायदान लुय हे, जो उकुम बोगवान आपणी केरता आपेल हे।” एने इहीचकेरीन तो तोम्बु एने सेवान सोब सामाना पोर लुय हितड्यो। खेरो ते ज्य हे काय कायदा माय आखी वोस्तु लुय ने द्वारे चोखाली एय जाथे, एने बिगेर लुय वोयाड़ेल पापान माफी नाह।
मसीन बोलीदान पापाह दुवेह
तानकेरीन जोरवरी हे काय हेरगा मायवाली वोस्तुन गेतुच वेह ज्या बोलीदानान द्वारे चोखाला केराय जाय, पुण हेरगा मायवाली वोस्तु सोता न्याह रेन हाजा बोलीदानान द्वारे चोखाली केराय जाती। काहाकाय मसी ता आथा केरीन बाणायेल चोखाला जागा माय, जो खेरला चोखाला जागान नमुनो हे, रिग्यो नाह पुण हेरगा मायस रिग्यो काय आपणे केरता एवी बोगवानान ओंगाण देखाय जाय। ज्य नाह काय तो आपणे आपाह जाहार ताहार बोली चेड़ावी, जिहकेरीन काय मुखी चाकर्यो एकेक वोरीह दिहरान लुय लेन चोखाला जागा माय रिग्या केरने, नाहते दुनियान सुरवाती रेन ताह जाहार ताहार दुख उखेलने पोड़तो; पुण एवीन कालान सेवली बुखेत तो एकुस वार देखायेल काहाकाय आपणास बोलीदानान द्वारे पापाह सिटो केर दे। एने जिहकेरीन माणहान केरता एक वार मोरनु एने तान पासाण नियाव ठेरायेल हे, जिहकेरीन मसी बी मोकतास ने पापाह उखेलनेन केरता एक वार बोली ईयेल; एने जा माणहे तान वाट जोवतेह तान सुटकारान केरता दिहरे वार बिगेर पाप उखलेल देखाय जाय।
Source notes (2)
- Footnote सुरवात रेन न्याहरी, थोड़ाक लेख माय आयेल लिखेल हे।
- Footnote वायदो, मोतीन चिट्ठी एने वायदान केरता ग्रीक बाषा माय निस्तो एक सोबदो हे।
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.