Nahali Bible
इब्रानियो 7
मलकिसिदक चाकर्यो
ज्यु मलकिसिदक शालेम ने राजा ईतो, एने मुठो पारदान बोगवानान चाकर्यो ईतो। जेवी अब्राहाम चार राजाह आरवीन वोलने बाजरियेल ईतो, तेवी मलकिसिदक अब्राहामाह मिलानो एने ताह बोरकेत आप्यो। एने अब्राहाम ताह तो आखो जो तु लेड़ाय माय जिकेल ईतो तान दोहवो ईसो आप्यो। मलकिसिदक ने नावान पेल्लो मतलब हे, “देरमान राजा,” एने उंजु पोशो तान ज्य बी मतलब हे, शालेम ने राजा मतलब “हुक ने राजा।” तान आबोख, आहख एने डायलान काईच बी पुरावो नाह जुड़ेत; तान जेल्मो नाहते तान मोतीन काईच लेख नाह सोतो। पुण बोगवानान बेटाख ने गेतुस कायेम ने केरता चाकर्यो बोणीन रिथे।
एवी ज्या पोर थोड़ोक विचार किरो काय तो कुलोक मुठो ईतो। जाह आपणो नाव लायेल डायलो अब्राहाम ताह लेड़ाय माय सापड़ेल मालदेन ने आखाम रेन हाजो दोहवो ईसो बेट आपेल। एने लेवीन वोस माय रेन जा चाकऱ्या बोणतेह, ताह नेमान नुसार उकुम हे काय इस्राएलान माणहा फाय रेन मतलब तान सोतान माणहा फाय रेन दोहवो ईसो लेय, ओवता ता अब्राहामान वोस ने काह नाह रेते। मलकिसिदक जो लेवीन वोसान नाह ईतो, पुण तो अब्राहामा फाय रेन एक दोहवो ईसो लियेल एने जाह बोगवानान वायदो जुड़ेल ईतो, ताह बोरकेत आप्यो। ज्या माय काईच सुवशो नाह सुतो काय जो बोरकेत आपेह, तो बोरकेत आपणाराह रेन मुठो रिथे। जा वोर लेवीन सावाल हे, ता माय दाहवो ईसो ता एदम्यान द्वारे टुलो केरनु; जो मुरेह पुण मलकिसिदक ने जा वोर सावाल हे दोहवो ईसो तान द्वारे टुलो केरनु, जो पुस्तेकान नुसार एवी वोर जीवतालो हे। ते आपु ज्य बी केय सेकतेह काय लेवी बी, जो दाहवो ईसो लिथे, अब्राहाम ने द्वारे मलकिसिदकाह दाहवो ईसो आपेल। काहाकाय जेवी मलकिसिदक अब्राहामाह मिलानो, तुलबूखे ते लेवीन जेल्मो बी नाह ईयेल एतो, तु तान डायलान सेरीरा मायच ईतो।
केदी लेवी चाकराय ने रितीन द्वारे आखो सापेड़ सेकतालो, ते काल्ला दिहरा चाकर्यान आवणेन गिरेज नाह एती? काहाकाय ज्यास ने देराव पोर माणहाह कायदो बी आपायेल ईतो। एक ओहला चाकर्यान काय गिरेज एती, जो मलकिसिदक ने रिती वालान एने नाह हारून ने रिती वालान। काहाकाय जेवी चाकर्यान पोद बोदलाथे, ते कायदाह बी बोदेलनेन गिरेज हे। एने जान बाराम जी वातु कियेल हेत्यु, तु काल्ला दिहरा गेराणान हे, एने ता गेराणान काल्लोस बी माणुह केदी वेदीन सेवक नाह रिनो। ते ज्य साप हे काय आपणो मालीक यहुदान वोस माय रेन पायदा ईयेल ईतो, एने मुसा ता गेराणान केरता चाकर्यान पोद ने बाराम काईच वात नाह किऱ्यो।
मलकिसिदक ने गेत दिहरो चाकर्यो
एने जो काय आमु कियेल हेते, तो उंजु बी साप हे काय मलकिसिदक ने गेत एक दिहरो चाकर्यो बुणीह। तो तान वोस ने नेमान देराव पोर नाह, पुण एक केदी नाह विणखेतेम एणार जीवाय ने सेक्तीन देराव पोर चाकर्यो बुणेल हे। काहाकाय पुस्तेक किथे, “तुमू मलकिसिदक ने गेत कायेम ने केरता चाकऱ्या बोण जाहो।”1 पेल्लो कायदो ज्यानकेरता आंगे किरेल काहाकाय तो कोमजोर एने उदेड़ एतो। ज्यानकेरीन मुसान कायदो कुणीह पुरो खिरो नाह केर सेकतालो। एने एवी एक हाजी आसा आपायेल हे जिन द्वारे आपु बोगवानान आहने आवतेह।
एने ज्यी वात बी जोरवरी हे काय बोगवान यीशुह सुगोण ने द्वारे मुखी चाकर्यो बाणायेल ईतो। जेवी काय दिहराह बिगेर सुगोण नेच मुखी चाकर्यो बाणायेल एता। पुण यीशु तेवी एक सुगोण केरीन चाकर्यो बुणेल ईतो, जेवी बोगवान ताह कियेल ईतो,
“मालीक सुगोण खाईल हे,
एने तो तान मोन केदी नाय बोदली:
तु कायेम ने केरता चाकर्यो बोणीन रिहे।”
पुण ज्या सुगोण ने कारेण यीशु एक हाजाला वायदान जामीन ठेरानो।
एवी दिखो, ओहला मोकतास चाकऱ्या एता, जाह मोत तान पोद पोर बोणीन रेणे नाह देनी। पुण यीशु जेलेम हे, तानकेरता तान चाकर्यान पोद कायेम रेय। केरीन जा तान द्वारे बोगवान फाय आवतेह, तो तान पुरी रिती से सुटकारो केरने माय ताकेतवालो हे, काहाकाय तो तान केरता विन्ता केरनेन केरता जेलेमक्योस जीवतालो हे।
उहलोस मुखी चाकर्यो आपणी गिरेज पुरी केर सेकी, जो चोखालो, विणदोसी, एने जा माय काय पाप नाह सुतो, एने पापीह रेन आंगे किरेल हे, एने हेरगाह रेन बी उचो विसायेल हे। जान केरता दिहरा मुखी चाकर्यान गेत ताह गिरेज नाय रेय काय तो दाड़ीन दिह पेल तान पापान केरता उवतो पुशो माणहान पापान केरता बोली चेड़ावी। तो ते कायेम कायेमान केरता तान पापान केरता सोता आपणे आपाह बोलीदान केर दिनो। काहाकाय मुसान कायदो माणहाह जा पुरा नाह सोता मुठलो चाकर्यो निवाड़ेह, पुण बोगवानान वायदो तान सुगोणा हिऱ्यो बाणायेल हे। जो वायदो कायदान पासाण आयेल हे, एने जो वायदो मुखी चाकर्यान रूप माय बेटाख निवाड़ेल, जो कायेम कायेम ने केरता हे पुरो बोणीन रिथे,
Source notes (1)
- Footnote मलकिसिदक माय (देखी 5:6।)
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.