Nahali Bible
उत्पत्ती 7
मुहेल दार्यो पाणी
तेवी यहोवा बोगवान नुहाह केयो, “तु तारा आखा गेराणाह लेन डोंडह्या माय जा; काहाकाय मी ज्यी टेमीन माणहाम रेन तुवाह उलोस देरमी दिखेल हे। आखी जातीन चोखाला जेनवारा माय रेन ते तु सात सात जोड्यु, मतलब नर एने मादा लिज्ये; पुण जा जेनवारे चोखाला नाय मिले, ता माय रेन दुय दुय लिज्ये, मतलब नर एने मादा।1 एने जुगाम उड़नारे चिड़ाम रेन सात सात जोड्यु, मतलब नर एने मादा लिज्ये; काय तान वोस वोचीन आखी देरती पोर तान वोस वोचीन रेय। काहाकाय एवी सात दिह्यान पासाण, मी देरती पोर चालीह दिह एने चालीह रात्यु वोर मुहेल दाऱ्यो पाणी पाड़ती रेह; एने जोली वोस्तु मी बाणायेल हे त्यु आख्युह बुय पोर रेन खेतेम केर देह।” बोगवानान ज्या उकुमान गेत नुह किऱ्यो।
जेवी देरती पोर मुहेल दाऱ्यो पाणी पुड़ेल ती टेम माय नुहान वोय एक होव वोरह्यान एती। नुह तान बायकु सोराह, एने वोवड्युक लेन डोंडह्या माय गीयो।2 देरती पोर वाला आखा चोखाला, एने एठाला दुय बातीन चिड़ा एने जेनवारे। एने बुय पोर लोलनाराम रेन बी, दुय दुय, मतलब नर एने मादा, बोगवान नुहाह उकुम आपेल इतो, तिहेच केरीन डोंडह्या माय नुहा फाय गीया। उवतो सात दिह्यान पासाण मुहेल दाऱ्यो पाणी देरती पोर पोड़ने बाज गीयो।
जेवी नुहान वोयीन, सोव होव वोरह्यान दुसरा मोयनान सेतरावे दिह आवो; तेदिहच मोटला उन्डाला देरीयाम रेन आखा जेरे फुटीन निकेलना एने जुगान खिड़क्यु उगड़ी गीयु।3 एने चालीह दिह एने चालीह रात्यु मुहोल दाऱ्यो पाणी लागातार देरती पोर पोड़ती रिनो। ठिक तेदिस नुह तान सोरा शेम, हाम, येपेत, तान बायकु, एने तीनु वोवड्युक हिऱ्यो, एने ता हिऱ्यो एक एक जातीन सोब जेंगली जेनवारे, एने एक एक जातीन सोब पालन्या जेनवारे, एने एक एक जातीन आखा देरती पोर लोलनारे जेन्तु, एने एक एक जातीन सोब उड़नारे चिड़ा, डोंडह्या माय गीया। जोला जेनवाराम जीवान वाह एती तान आखी जातीम रेन दुय दुय नुह फाय डोंडह्या माय गीया। बोगवाना उगे रेन आपेल उकुमीन गेत तान आखी जातीन जेनवाराम रेन नर एने मादा डोंडह्याम गीया। तेवी बोगवान डोंडह्यान बायणो बोंद केर दिनो।
एने देरती पोर चालीह दिह वोर मुहोल दाऱ्यो पाणी पोड़ती रिनो; एने पाणी जुलूमच हेंगली गीयो, ता माय डोंडह्यो उपेर उखलाणे बाज गीयो, एने तो देरती पोर रेन उचो उखलाय गीयो। पाणी हेंगलती हेंगलतीन देरती पोर जुलूमच हेंगली गीयो, एने डोंडह्यो पाण्या पोर तेरेंगणे बाज गीयो। एने पाणी देरती पोर ओलो वोद गीयो, काय आखी देरती पोर जोला मोठ मोठा बोयड़ा एता, ता सोब बुड़ गीया। पाणी ते सोब उच उचा बोयड़ाह बी बुड़ावीन पोन्दरा आथ उपेर वोद गीयो। एने देरती वाला चिड़ा, पालन्या जेनवारे, एने जेंगली जेनवारे, एने देरती पोर वाला आखा चालनारे जेनवारे, एने जोला जीव देरती पोर जुलूमच बोराय जायेल एता, ता आखा जेनवारे, एने माणहे बी मोर गीया। जा जा बुय पोर एता, जोलान नाकपुड्याम जीवणान वाह एती, ता सोब मोर गीया। इहकेरीन बोगवान देरती पोर वाला आखा माणहाह एने लोलनारे जीव जेन्तुह एने जुगाम उड़नारे चिड़ा एने जोला बुय पोर एता, ता सोबाह खेतेम केर दिनो, निस्ता नुह एने जोला ता हेऱ्या डोंडह्याम एता, ताच वोच गीया। एने पाणी एक होव पाचाह दिह वोर देरतीह डाप रियेल एतो।
Source notes (3)
- Cross-reference लेव्यवस्था 11
- Cross-reference मत्ती 24:38-39; लुका 17:27
- Cross-reference 2 पतरस 3:6
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.