Nahali Bible
उत्पत्ती 5
आदम ने वोस
(1 इतिहास 1:1-4)
आदम ने वोस ज्यी हे। जेवी बोगवान माणहाह बाणायेल, तेवी ताच ने वेहा माय ताह बाणायो।1 तो एदमी एने बायकु केरीन माणहाह बाणायो एने ताह बोरकेत आप्यो, एने ताह बाणायेल तेदिहच तान नाव आदम मिल्यो।2 जेवी आदम एक होव तीस वोरह्यान इनो, तेवी तान उग रेन ताच हारको ताच ने वेहान गेत एक सुरो पायदा इनो। तो तान नाव शेत मेल्यो। एने शेत जेल्मान पासाण आदम आठ होव वोरह्या वोर जीवनो, एने तान उंजु बी बेटा बेट्यु पायदा एना। इहकेरीन आदम ने आखीच वोय नोव होव तीस वोरह्यान एनी; तान पासाण तो मोर गीयो।
जेवी शेत एक होव पाच वोरह्यान एनो, तेवी तान एनोश नावान सुरो पायदा एनो। एनोश ने जेल्मान पासाण शेत आठ होव सात वोरह्या वोर जीवनो, एने तान उंजु बी बेटा बेटी पायदा एना। इह केरीन शेत नोव होव बारा वोरह्या वोर जीवनो, उवतो तो मोर गीयो।
जेवी एनोश नोव्वद वोरह्यान इनो, तेवी तान केनान नावान सुरो पायदा एनो। केनान ने जेल्मान पासाण एनोश आठ होव पोन्दरा वोरह्या वोर जीवनो, एने तान उंजु बी बेटा बेटी पायदा एना। एने जेवी एनोश आखास नोव होव पाच वोरह्या वोर जीवनो एने तो मोर गीयो।
केनान सेत्तेर वोरह्यान एनो तेवी तान महलेल नावान सुरो पायदा ईनो। महलेल ने जेल्मान पासाण केनान आठ होव तिस वोरह्या वोर जीवनो, एने तान उंजु बी बेटा बेटी पायदा एना। केनान आखास नोव होव दोह वोरह्या वोर जीवनो एने तो मोर गीयो।
जेवी महलेल पाहसठ वोरह्यान एनो, तेवी तान येरेद नावान सुरो पायदा इनो। येरेदान जेल्मान पासाण महलेल आठ होव तीस वोरह्या वोर जीवनो, तान उंजु बी बेटा बेटी पायदा एना। महलेल आठ होव पंचान नोव वोरह्या वोर जीवनो, एने तो मोर गीयो।
जेवी येरेद एक होव बाहसाठ वोरह्यान इनो तेवी तान हनोक नावान सुरो पायदा इनो। हनोक ने जेल्मान पासाण येरेद आठ होव वोरह्या वोर जीवनो, एने तान उंजु बी बेटा बेटी पायदा एना। येरेद आखास नोव होव बाहसाठ वोरह्या वोर जीवनो, एने तो मोर गीयो।
जेवी हनोक पाहसठ वोरह्यान इनो, तेवी तान मतुशेलह नावान सुरो पायदा इनो। मतुशेलहान जेल्मान पासाण हनोक तीन होव वोरह्या वोर बोगवानान हारही चालती रिनो एने तान उंजु बी बेटा बेटी पायदा एना। इहकेरीन हनोक ने आखीस वोय तीन होव पाहसठ वोरह्यान एनी। एने हनोक बोगवाना हिऱ्यो आरही आरही चालतालो; उवतो तो आरताय गीयो, काहाकाय बोगवान ताह विस लिदो।3
जेवी मतुशेलह एक होव सत्याएंसी वोरह्यान इनो, तेवी तान लेमेक नावान सुरो पायदा इनो। लेमेकान जेल्मान पासाण मतुशेलह सात होव बियांएसी वोरह्या वोर जीवनो; एने तान उंजु बी बेटा बेटी पायदा एना। मतुशेलहान आखीस वोय नोव होव एकुणसत्तर वोरह्यान एनी, उवतो तो मोर गीयो।
जेवी लेमेक एक होव बियांएसी वोरह्यान इनो, तेवी तान एक सुरो पायदा इनो। एने तो तान नाव ज्य किन नुह 4मिल्यो, “काय यहोवा बोगवान जो देरतीह हाराप दियेल हे, तान बाराम ज्यो सुरो आमरा कामा माय, एने ता केठीण मेहनेतीम जो आमु केरतेह, आमुह आराम आपी।” नुहान जेल्मान पासाण लेमेक पाच होव पंचान नोव वोरह्या वोर जीवनो, उवतो तो मोर गीयो। लेमेक आखास सात होव वोरह्या वोर जीवनो, उवतो तो मोर गीयो।
नुह पाच होव वोरह्यान इनो, तेवी तान शेम, हाम, एने येपेत ज्या तीन सोरा पायदा एना।
Source notes (4)
- Cross-reference उत्पत्ती 1:27
- Cross-reference उत्पत्ती 1:27-28
- Cross-reference इब्रानियो 11:5; योहान 14; प्रकाशितवाक्य 4:10; 2 राजा 2:11
- Footnote नुह आराम आपणार केवाय जायेल हे
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.