Nahali Bible
उत्पत्ती 47
तेवी युसूफ फिरोन फाय जायीन ज्यी खुबेर दिनो, “मारो आबोख एने मारा बाहख एने तान मेंड्रा बोकड्या, डोरे एने जो काय तान हे, तो लेन कनान देसाम रेन एवी ते गोशेन देसाम आव लागेल हेते।” उवतो युसूफ तान बायाख माय रेन पाच जाणाह लेन फिरोनान ओंगाण उब राख दिनो। फिरोन तान बायाख फुशो, “तुमू काय काम केरतेह?”
ता फिरोनाह केया, “तारा पावोर गोवाल्या हेते, एने आमरा डायडाया बी गोवाल्याच एता।” ओवता ता फिरोनाह केया, “आमु ज्या देसाम पाराया देसावालान गेत रेणेन केरता आयेल हेते; काहाकाय कनान देसाम जुलूम मुठो काल पुड़ेल हे, केरीन तारो पावराह मेंड्रा-बोकड्या केरता चारो नाह रिनो; केरीन आमुह गोशेन देसाम रेणेन पारवांगी आप दे।” तेवी फिरोन युसूफाह केयो, “तारो आबोख एने तारा बाहख तार फाय आव लागेल हेते। एने मिस्र देस तार सामने पुड़ेल हे; ज्या देसाम जो आखाम रेन हाजो जागो एय, ता माय तारा आबाख एने तारा बायह्याख वोहाड़ दे; मतलब ता गोशेन देसा मायच रेय; एने केदी केदी तुवाह मालुम एय, काय न्या माय रेन मेहनेत केरनार एदमी हेते, ते ताह मारा जेनवेरान आदिकारी बाणाव दे।”
तेवी युसूफ तान आबाख याकुबाह लावीन फिरोनान सोमोर उबो किऱ्यो; एने याकुब फिरोनाह बोरकेत आप्यो। उवतो फिरोन याकुबाह फुशो “तारी वोय कोलीक हे?”
याकुब फिरोनाह केयो, “मी ते एक होव तीस वोरह्या पाराया देसान माणुह बोणीन मारो जीवणो काटेल हे; मारा जीवणान दिह थोड़ाक एने दुखाम बोरायेल बी एता, एने मारा डायडाया पाराया देसान बोणीन जोला दिह वोर जिवताला रेना तोलाक दिह्यान मी एवी नाह इनो।” एने याकुब फिरोनाह बोरकेत आपीन तान सोमोर रेन जात रिनो। तेवी युसूफ फिरोनान उकुम मानीन तान आबाख एने बायाख मिस्र देसान हाजाम हाजो जागाम, मतलब रामसेस नावान पोरदेसाम, बुय आपीन ताह होप दिनो। एने युसूफ तान आबाख एने तान बायह्याख, एने तान आबाख ने आखा गेराणान एक-एकान बाल-बोचान गेणतीन, गेत खाणो आप-आपाड़ीन ताह पोहणे बाज गीयो।
कालान टेम माय युसूफान सोय
ता आखा देसाम खाणेन काय नाह रेनो; काहाकाय काल जुलूम मुठो पुड़ेल एतो, एने कालान कारेण से मिस्र एने कनान दुयू देस खेतेम एय गीया। एने जोला पोयशा मिस्र एने कनान देसा माय एता, सोबाह युसूफ ता एनान बोदले, जा तावाला रेणारे वेचाता लेताला तो टुलो केरीन फिरोनान राजवाड़ाम पोचाड़ दिनो। जेवी मिस्र एने कनान देसाम पोयशा निवरी गीया, तेवी आखा मिस्री माणहे युसूफ फाय आवीन केणे बाज गीया, “आमुह खाणेन वोस्तु आप, काय आमु फाय पोयशा नाह सोता ते तार डोलान सुमोरच मोर जाहु?”
पुण युसूफ ताह केयो, “केदी तुमू फाय पोयशा निह एती ते तुमरा जेनवारे आप दिवो, एने मी तान बोदले तुमूह खाणेन आपुह।” तेवी ता तान जेनवारे युसूफ फाय लावा; एने तो ताह डोरे, गोड़ा मेंड्रा बोकड्या एने गेदड़ान बोदले खाणो आपणे बाज गीयो; ती वोरही तो सोब बातीन जेनवेरान बोदले दाणा आपीन ताह पोहती रिनो।
तो वोरही ते वित गीयो; तेवी ओगल्या वोरह्याम पोशा ता युसूफ फाय आवीन केयो, “आमु आमरा मालक्याह ज्यी वात लिकाड़ीन नाह मेलते, काय आमरा पोयशा निवरी जायेल हेते, एने आमरा आखा बातीन जेनवारे आमरा मालीक्या फाय आव जायेल हेते; केरीन एवी आमरा मालक्यान सोमोर आमरा डिल एने बुईह सोड़ीन उंजु कायच नाह रेनो। आमु तार देखता काहा मोरी, एने आमरी बुय काहा उजड़ी जाए? आमुह एने आमरा खेताह खाणेन वोस्तुन बोदले वेचातो लेय ले, काय आमु आमरा खेता हेऱ्याच फिरोनान पावोर बुणे, एने आमुह बियारो आप, काय आमु मोरहु नाय, पुण जिवताला रेय, एने खेते नाय उजड़े।”
तेवी युसूफ मिस्रान आखी बुईह फिरोनान केरता वेचातो लेय लिदो। काहाकाय ती टेम माय मोटलो काल पुड़नो, ता माय मिस्री माणहाह तान तान खेत वेचणे पोड़नो; इह केरीन आखी बुय फिरोनान बोण गियी। एक खुणे रेन ते दिहरी खुणे वोर आखा मिस्र देसा माय जी पोरजा रेताली, तिह युसूफ हेयरा माय लावीन वोहाड़ देना। पुण चाकऱ्यान खेत ते तो वेचातो नाह लिदो; काहाकाय चाकऱ्यान केरता फिरोना उगे रेन दाड़ीन खाणान बांदाबोस एतो, एने दाड़ीन जो खाणो फिरोन ताह आपतालो तोच ता खाताला; केरीन ताह तान खेत वेचणे नाह पोड़नो। तेवी युसूफ पोरजान माणहाह केयो, “हुमलो, आजीन दिह तुमूह एने तुमरा खेताह बी फिरोनान केरता वेचाता लियेल हे; एने मी तुमूह न्या बियारो आपथु तो तुमू पिरो। एने जो काय पाकी तान पाचवो ईसो फिरोनाह आपज्यो, एने बाकीन चार ईसा तुमरा रेती, काय तुमू ताह तुमरा खेताम पिरो एने तुमरा बाल बोचाह एने गेरान दिहरा माणहा हेऱ्या खाया किरो।”
तेवी ता केया, “तु आमुह वोचाड़ लियेल हे; आमरा मालक्यान गीणीन निजेर आमु पोर बोणीन रेय, एने आमु फिरोनान पावोर बोणीन रेहु।” इह केरीन युसूफ मिस्र देसान खेतान बाराम ओहलो नेम बाणायो; जो आजीन दिह वोर चालती आवणे बाज रिनोह काय पाचवो ईसो फिरोनाह जुड्या केरी; निस्तो चाकऱ्यान खेत फिरोन ने नाह बोणनो।
याकुबान आखरी आसा
इस्राएली मिस्र देसान गोशेन इलकाम रेणे बाज गीया; एने ता वाली बुय तान ताबाम एती, एने ता फुलना फोलना, एने जुलूम वोद गीया। याकुब मिस्र देसाम सतरा वोरह्या वोर जिवतालो रिनो, एने इह केरीन याकुबान आखीच वोय एक होव सत्तेचालीस वोरह्यान एनी। जेवी याकुब ने मोरनेन दिह आहने आव गीया, तेवी तो तान सोरा युसूफाह हादाड़ीन केयो, “केदी तारी गीण मार पोर एय ते तारो आथ मारी जांगी पोर मेलीन सुगोण खा, काय तु मार हिऱ्यो गीण एने खेराय ने काम किरहे, काय माहु मिस्र माय बुजहे नाय।1 जेवी मी मारा बापदादा हिऱ्यो हुव जाह, तेवी तु माहु मिस्र देसाम रेन विसीन ली जायीन ताच ने माहणा माय मिलहे।”
तेवी युसूफ केयो, “मी तारा वचनान गेत केरूह।”
पुशो याकुब केयो, “मार हिऱ्यो सुगोण खा;” तेवी : तो सुगोण खादो। तेवी याकुब ने खाटलान उहत्ये उगे वोलीन विन्ता किऱ्यो।
Source notes (1)
- Cross-reference उत्पत्ती 49:29-32; 50:6
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.