Nahali Bible
उत्पत्ती 36
एसावान वोस
(1 इतिहास 1:34-37)
एसाव जो एदोम बी केवाय जाते, तान वोस ज्यी हे। एसाव ते कनानी सोऱ्यु हिऱ्यो वाराड़ केर लिदो, एने तान बायकु ज्यु एत्यु, एलोन हित्तीन बेटीख आदा, एने ओहोलीबाम जी अनान बेटीख एने हिब्बी सिबोनान नातणीक एती।1 पुशो तो इश्माएलान बेटीख बासमत हिऱ्यो वाराड़ केर लिदो, एने तीन बायाख ने नाव नबायोत एतो।2 आदा एसावा उगे रेन एलीपाज नावान सुरो पायदा इनो, एने बासमत ने एसावा उगे रेन रूएल नावान सुरो पायदा इनो। एने ओहोलीबाम ने, युश, यालाम, एने कोरह, ज्या सोरा पायदा एना, एसावान ज्याच सोरा कनान देसाम पायदा एना।
तेवी एसाव तान बायकु एने सोरा सोरी, एने गेरान आखा माणहे, एने तान मेंड्रा बोकड्या, गाय बुयेल एने दिहरा आखा जेनवाराह, एने तान आखो मालदेन जो तो कनान देस माय टुलो किरेल इतो; एसाव तान बाहख याकुब हिऱ्यो रेय आंगे एन दिहरा देसाम जात रिनो। काहाकाय तान मालदेन ओलोक एय जायेल एतो काय ता एकठा नाह रेय सेक्या; एने तान जेनवारे जुलूम एय जायेल एता केरीन ता देसाम पाराया बोणीन रेताला, होमाय नाह सेकना। केरीन एसाव सेईर नावान देसाम रेणे बाज गीयो, एसाव ज्योच सेईर नावान बोयड़ा वालो एदोम बी केवातालो।
सेईर नावान बोयड़ान देसाम रेणारे एदोमी माणहान डायला एसावान वोस जिच हे। एसाव एने एसावान बायकु आदान सोरो एलीपाज, एने तान दुसरी बायकु बासमत ने सोरो रूएल। एलीपाज ने पाच सोरा ज्या एता, तेमान, ओमार, सपो, गाताम, एने कनाज। एसावान सोरा एलीपाज ने तिम्ना नावान पावेरनी एती, तीन एलीपाज ने उगे रेन अमालेक नावान सुरो पायदा इनो; एसाव ने बायकुन आदान वोसी माय ज्याच एना। रूएल ने चार सोरा एता तान नावे ज्या हेते, नाहथ, जेरह, शम्मा, एने मिज्जा एसावान बायकुन बासमत ने वोसी माय ज्याच एना।
सिबोनान सुरो अना तान सोरी ओहोलीबाम ज्यी एसावान तीसरी बायकु एती, तीन युश, एलाम एने कोरह ओलाक सोरा पायदा एना।
एसावान सोरा तान तान गेराणान मुखी बोणना ता ज्या एता, एसावान डावालो सुरो एलीपाज ने सोरा ज्या एना; तेमान, ओमार, सपो, कनाज। कोरह, गाताम एने अमालेक ज्या आखा एलीपाज ने वोसी माय रेन एदोम देसा माय, एसावान बायकु आदान द्वारे पायदा एना।
एसावान बेटाख रूएल ने सोरा ज्या हेते, नाहथ, जेरह, शम्मा एने मिज्जा; एदोम देस माय ज्या आखा गेराणान डायला एसावान बायकु बासमत ने वोसी माय पायदा एना। एसावान बायकु ओहोलीबाम ने वोस माय ज्या पायदा अना; युश, यालाम, एने कोरह ज्या तीन सोरा तान तान गेराणान मुखी बोणना; एसाव जो एदोम बी केवाय जाथे, ज्या सोब तान वोसी माय मुखी बोणना।
सेईरान वोस
(1 इतिहास 1:38-42)
एसावान पेल एदोम गावा माय सेईर नावान होरी जातीन माणुह एतो, तान सोरा ज्या हेते, लोतान, शोबाल, सिबोन, अना,
दीशोन, एसेर, एने दीशान : एदोम देस माय सेईरान गेराणान होरी जातीवाला मुखी बोणना।
लोतानान सोरा ज्या एता, होरी, एने हेमान, एने लोतानान बोणीख तिम्ना एती। शोबालान सोरा ज्या एता, अलवान, मानहत, एबाल, शपो, एने ओनाम।
सिबोनान दुय सोरा एता, अय्या एने अना; ज्यो तोच अना हे जाह जेंगलाम तान आबाख सिबोनान गेदड़ाह चारतालो, तेवी ताह जेंगला माय ताताला पाण्यान जिर सापड़ेल एतो। एने अनान दीशोन नावान सुरो पायदा इनो, एने पोशी ओहोलीबाम नावान सोरी पायदा एनी। दीशोन ने चार सोरा एता, हेमदान, एशबान, यित्रान, एने करान।
एसेर ने ज्या सोरा पायदा एना, बिल्हान, जावान, अकान
दीशान ने ज्या सोरा पायदा एना, ऊस एने अरान।
होरी जातीन गेराणान जो मुखी पायदा इयेल एता; ता ज्या हेते; लोतान, शोबाल, सिबोन एने अना
दीशोन, एसेर, एने दीशान, यहुदा ईलाकान पुर्व उगेन; सेईर देसाम रेणारे होरी जातीन गेराणान ज्या मुखी बोणना।
एदोमान राजा
इस्राएल पोर राज केरनेन पेल, एदोम माय ज्या राजा एता। बोर ने सुरो बेला ज्यो एदोम पोर राज किऱ्यो, तान राजदानीन नाव दिन्हाबा हियोर हे। बेलान मोरनेन पासाण बोस्रा गावाम रेणार, जेरह ने सुरो योबाब तान जागा पोर राजा बुणनो। योबाब ने मोरनेन पासाण तेमान देसाम रेणार हुशाम तान जागा पोर राजा बुणनो। उवतो हुशाम ने मोरनेन पासाण, बदाद ने सुरो हदद तान जागा पोर राजा बुणनो; ज्यो तोच हे जो मोआब देसाम मिद्यानी माणहाह आरायेल इतो, एने तान राजदानीन नाव अबीत हियोर हे। हदद ने मोरनेन पासाण मस्रे गावा माय रेणार सम्ला तान जागा पोर राजा बोणनो। एने सम्लान मोरनेन पासाण, शाऊल जो मोटली नेदीन3 दिड़ेवाला रहोबोत हेयराम रेणार इतो, तो तान जागा पोर राजा बोणनो। शाऊल ने मोरनेन पासाण अकबोर ने सुरो बालहनान तान जागा पोर राजा बुणनो।
अकबोर ने सुरो बालहनान मोर गीयो, तेवी हदार तान जागा पोर राजा बुणनो; एने तान राजदानीन नाव पाऊ एतो; एने तान बायकुन नाव महेतबेल एतो, ज्यी मेजाहाब ने सोरी मत्रेद ने बेटीख एती। एसावान वोसीन मुखीन गेराणो एने जागान गेत तान नावे ज्या एता, तिम्ना, आल्वा, यतेथ,
ओहोलीबामा, एला, पिनोन, कनाज, तेमान, मिब्सार,
मग्दीएल एने ईराम न्या माय आखा गेराणा नावे आपेल देसाम रेना, एने एदोम देसान मुखी एदमी एसाव इतो।
Source notes (3)
- Cross-reference उत्पत्ती 26:34
- Cross-reference उत्पत्ती 28:9
- Footnote मोटली नेदीन फरात नेदी
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.