उत्पत्ती 27

इसाहक याकुबाह बोरकेत आपणो

1जेवी इसाहाक डायो एय गीयो, एने तान डोला दुंदवाल्लाह पोड़ जाईल एता, केरीन ताह हास केरीन नाह देखातालो; तेवी तो तान जेठाला सोरा एसावाह हादिन केयो, “एय मारा सोरा,” एसाव ताह केयो, “काय उकुम हे।”

2इसाहाक ताह केयो, “हुमेल मी एवी डायो एय जायेल हे, एने मी नाह जाणेत काय मारी मोत केवीह एय। 3केरीन एवी तु तारी दोंदली एने बेलखा लेन जेंगलाम जा एने मार केरता सिकार केर लाव। 4एने माहु पुटे ओहलो होवादो खाणो रांदीन मार फाय लियावज्ये, काय मी तो खाएन मोरनेन पेल तुवाह जीव बोरीन बोरकेत आपु।”

5तेवी एसाव सिकार केरनेन केरता जेंगलाम गीयो, एने जुलबुखे इसाहाक ज्यु वातु एसावाह केतालो, तेवी रिबीका होमेलने बाज रियेल एती।

6केरीन रिबीका तीन बेटाख याकुबाह केयी, “हुमेल मी तार आबाख तारा बायाख एसावाह ज्य केतालो हुमलेल हे, 7‘तु मार केरता सिकार केरीन तान होवादो खाणो रांद, काय मी तो खाएन तुवाह बोगवानान ओंगाण मोरनेन पेल बोरकेत आपु।’ 8केरीन एवी, एय मारा सोरा मारी वात हुमेल, एने जो उकुम मान, 9एने उतवाल्युह बोकड्यान वाड़ीम जायीन दुय हाज हाजाह गिदल्या लियाव; एने मी तार आबाख वाटु एने ताह पुटे ओहलो माह ने होवादो खाणो रांदुह। 10तेवी तु ताह तारा आबाख फाय लिजाज्ये, काय तो ताह खाएन मोरनेन पेल तुवाह बोरकेत आपी।”

11पुण याकुब तान आहख रिबीकाह केयो, “तुवाह ते मालुम हे, काय मारो बायाख एसाव ते रोचका वालो एदमी हे, पुण मी बिगेर रोसका वालो एदमी हे। 12एने केदी मारो आबोख माहु सापलीन देखी, ते मी तान नेजरीम मी ठेग बोणजाह; एने बोरकेतीन बोदले मी हाराप कामावलेह।”

13तेवी तान आहख ताह केयी, “एय मार सोरा, हाराप तार पोर नाह मार पोरच पुड़े, तु निस्तो मारी वात हुमेल एने जायीन गिदल्या मार फाय लियाव।” 14तेवी तो जायीन गिदल्याह तान आईख फाय लेन आवो, एने तान आहख तान आबाख पुटे ओहलो होवादो खाणो रांद देनी। 15तेवी रिबीका तीन जेठाला सोरा एसावान हाजाला फाड़का जा ती फाय गेराम एता, ता लावीन तीन आतल्या बेटाख याकुबाह पेराव देनी। 16एने बोकड्यान पिलान खालड़ाह तान आथाम एने तान गेलाम वेटाल देनी। 17एने तो होवादो खाणो एने तीन रांदेल रूटो बी तीन सोरा याकुबान आथाम देराव देनी।

18तेवी तो तान आबाख फाय जायीन केयो, “एय मारा आबा,” तेवी तान आबोख केयो, “काय वात हे? एय मार सोरा, तु कुण हे?”

19याकुब तान आबाख केयो, “मी तारो जेठालो सुरो एसाव हे, एने मी तारो उकुम मानीन तिहेच किरेल हे, केरीन उठीन बोह; मारा सिकारान माह खा, काय तु पुरो मोन से माहु बोरकेत आपी।”

20पुण इसाहाक तान सोराह केयो, “एय मार सोरा, काय कारेण हे काय तो तुवाह ओली जेल्दी सिकार किहीक जुड़ गीयो?” तो ज्यो जापाप आप्यो, “तारो बोगवान यहोवा ताह मार सोमोर केर दिनो।”

21ओवतो इसाहाक याकुबाह पुशो केयो, “एय मारा सोरा मार आहने आव, मी तुवाह सापलीन जाणु, काय तु खेरीच मार सोरो एसाव हे काय नाह?” 22तेवी याकुब तान आबाख ने आहने गीयो, एने इसाहाक ताह सापलीन केयो, “बोल ते याकुबान गेत हे, पुण आथ एसावान गेतुच लागतेह।” 23एने तो ताह नाह ओलखानो, काहाकाय तान आथ तान बाहख एसाव ने गेत रोचका वाला एता, केरीन इसाहाक याकुबाह बोरकेत आप दिनो। 24एने इसाहक ताह फुशो, “काय तु खेरीच मारो बिटोख एसाव हे?” याकुब केयो, “होव आबा मी हे।”

25तेवी तो केयो, “खाणो मार आहने लेन आव, काय मी सिकारान माहाम रेन खाएन तुवाह बोरकेत आपु,” तेवी तो खाणो तान आहने लेन आवो, एने इसाहाक तो खादो; एने तो ता फाय अंगुरान रूह बी लावो, इसाहाक तो पिय लिदो। 26तेवी तान आबोख इसाहाक ताह केयो, “एय मारा सोरा आहने आवीन माहु गुल्या दे।” 27याकुब आहने जायीन ताह गुल्या दिनो; एने तो तान फाड़कान गेंद ओलखीन ताह बोरकेत आप्यो; “देख मारा सोरान गेंद जो ओहला खेतान गेत हे जा पोर बोगवान बोरकेत आप्यो एय। 28बोगवान तुवाह जुगाम रेन ओहटो पाड़ीन खेतान हाज हाजी पाक एने जुलूम होवटो एन एने अंगुरान रूह आपी! 29राज राजान माणहे तारा चाकरी केरी, एने देस देसान माणहे तुवाह वोंदे; तु तारा बायाख ने मालीक बुणे, एने तारी आईख ने सोरा तुवाह वोंदे, जो तुवाह हाराप देय, ता सोताच हारपाय जाय, एने जो तुवाह बोरकेत आपी, ताह बोरकेत जुड़ी।”1

बोरकेतीन केरता एसावान विन्ता

30जीहे ज्यी बोरकेत इसाहाक याकुबाह आप दिनो, तेवी तो इसहाकान सामने रेन सिटो एताच, एसाव सिकार लेन आव पुचनो। 31तेवी तो बी होवादो खाणो रांदीन तान आबाख फाय लेन आवो, एने केयो, “एय मारा आबाख उठीन तारा सोरान सिकारीन माह खा, एने माहु बोरकेत आप।”

32पुण तान आबोख इसाहाक ताह फुशो, “तु कुण हे?”

तो जापाप आप्यो, “मी तारो जेठालो सुरो एसाव हे।”

33तेवी इसाहाक जुलूम थुर थुर कापती लेन केयो, “उवतो तो कुण इतो जो सिकार केरीन मार फाय लायेल इतो, एने मी तार आवणेन पेल तो खाणो खाय लिदो एने ताह बोरकेत आप्यो। पुण ताह बोरकेत लागीन बी रेय।”

34एसावाह तान आबाख ने वात होमेलताच मोठेच एने नाराज बोलाम आयड़ीन तान आबाख केयो, “एय मारा आबाख माहु बी बोरकेत आप।”

35इसाहाक ताह जापाप आप्यो, “तारो बाहख आवो, एने ठेगीन तो तारी बोरकेत लेन जात रिनो।”

36तो केयो, “काय तान नाव याकुब बिगेर मतलबान नाह मेलाय गीयो? तो माहु दुय वारीन ठेगीन मारा जेठालान आदिकार बी सांडाड़ लिदो, एने एवी देख तो मारो बोरकेत बी राख लियेल हे। पुशो तो फुशो, काय तु मार केरता जारपारजा बोरकेत बी नाह मिल्यो?” 37इसाहाक एसावाह केयो, “हुमेल, मी ताह तारो मालीक ठेरायेल हे, एने तान आखा बायाख तान ताबाम केर दिनो, एने एन एने नोवालो अंगुरान रूह आपीन ताह जुलूम बोरकेत आपेल हे, केरीन एवी, एय मारा सोरा, मार फाय तार केरता काय नाय मिले!” 38पुण एसाव तान आबाख फाय विन्ता केरने चालुच मिल्यो : “एय मारा आबाख, तार फाय निस्तो एकुच बोरकेत एय ते माहु बी आप दे, इह किन तो उहकी उहकीन रेड़ने बाज गीयो।”2 39तेवी तान आबोख ताह केयो,

“हुमेल तारा खेताम हेरगाम रेन ओहटो नाय पोड़ी,

एने हाजी पाके ओहली बुय रेणेन केरता नाय सापड़ी।

40तु तारी तालवारीन बोरहे जिवतालो रिहे,

तु तारा बायाख ने ताबाम ते रिहे,

पुण तु मुकलो एणेन केरता लेड़ाहे,

तेवी तु तान जुवालाह तारा खांदा पोर रेन तोड़ीन जुगार दिहे।”3

41एसाव ते याकुबाह तान आबाख ने आपेल बोरकेतीन केरता दुसमोनाय मिल्यो; एने तो विचार किऱ्यो, “मारा आबाख ने मोरनेन टेम आहनेच हे, ओवतो मी मारा बायाख मार देह।”

42जेवी रिबीकाह तीन जेठाला सोरा एसावान ज्यी वातु मालुम पोड़नी, तेवी ती तीन आतल्या बेटाख याकुबाह हादिन केयी, “होमेल तारो बाहख एसाव तुवाह मारनेन वाट जुवेह। 43केरीन एवी एय मारा सोरा, मारी वात हुमेल, एने हारान गाव माय मारा बायाख लाबान फाय नाहीन जात रे। 44तारा बायाख ने राग जाह वोर नाय उतरी, ताह वोर थोड़ाक दिह ताच फाय रिज्ये। 45ओवतो जेवी तारा बायाख ने राग तार पोर रेन उतरी जाय, एने जो काम तु किरेल हे ताह तो विहरी जाय; तेवी मी तुवाह तारेन हादाड़ लेह, ओहलो नाय एणे जुवे काय एकुच दिह्या माहु तुमू दुया हेऱ्या सेटो एणे पोड़ी।”

याकुब लाबान फाय जाणे

46ओवती रिबीका इसाहाकाह केयी, “हित्ती सोरीन केरता माहु जीवो नाह लागेत, काहाकाय एसाव हित्ती सोऱ्यु हिऱ्यो वाराड़ किरेल हे। केदी याकुब बी ओहलोच केरी ताहार मारो जीवणेन काय फायदो रेय।”