Nahali Bible
उत्पत्ती 25
अब्राहम ने उंजु दिहरा वोस
(1 इतिहास 1:32-33)
तेवी अब्राहाम उंजु एक लाडी वाराड़ केरीन लावो, तीन नाव कतूरा एतो। तीन जिब्रान, योशान, मदना, मिद्यान, यिशबाक, एने शूह ओलाक सोरा पायदा एना। यशबान ने उगे रेन शेबा एने ददान, ज्या सोरा पायदा एना; एने अश्शुरी, लतुशी एने लुम्मी माणहे पायदा एना। मिद्यान ने एफा, एफर, हनोक, अबीदा, एने एल्दा, ओलाक सोरा एता; ज्या आखा अब्राहामा उगे रेन कतूरान सोरा पायदा एना।
अब्राहाम तान आखो मालदेन इसाहाकाह आप दिनो। पुण अब्राहाम जिवतालो इतो ताह वोर तान राखेल्युन 1सोराह बी थोड़ो थोड़ो आपीन इसाहाक हेऱ्या रेन पुर्व देसाम मोकली दिनो।
अब्राहामान मोत
अब्राहाम आखोच एक होव पंच्यात्तर वोरह्या वोर जीवनो। अब्राहाम डायो इय गीयो ता माय मतलब पुरो डावालान वोय माय तो मोर गीयो; एने तो तान डायडायाम बेचकाय गीयो। तान सोरा इसाहाक एने इश्माएल, हित्ती सोहर ने बेटाख एप्रोन फाय मम्रेन पुर्व उगे वाली बुय माय जो मकपेलान गुफा एती, ता माय ताह बुज्या।2 मतलब जो जागो अब्राहाम हित्ती माणहा फाय रेन वेचातो लियेल ता माय अब्राहाम एने तान बायकु सारा हिऱ्यो अब्राहाम बुजानो। अब्राहाम ने मोतीन पासाण बोगवान तान बेटाख इसाहाकाह बोरकेत आप्यो, “एने तो लेहरोई नावान कुवान जागे रेतालो।”
इश्माएलान वोस
(1 इतिहास 1:28-31)
अब्राहाम ने बिटोख इश्माएल जो सारान मिस्री पावेरनी हाजीरान पायदा इयेल इतो, तान वोस ज्यी हे। इश्माएलान सोरान नावे एने वोस ज्यी हे : इश्माएलान जेठालो बिटोख नबायोत, तान पासाण केदार पायदा इनो, ओवता अद्बेल, मिबसाम, मिश्मा, दूमा, मस्सा, हदद, तेमा, यतूर, नापीश, एने केदमा; ज्या इश्माएलान सोरान नावे एता; न्याच ने नावा पोर रेन गावान, एने पाड़ावान नावे बी पोड़ना; एने ज्याच बारा तान तान गेराणान मुखी बोणना। इश्माएल आखोच एक होव सोदवतीस वोरह्या वोर जीवनो; एने तो मोर गीयो, एने तान माणहाम जाय मिलानो गीयो। एने तान वोस हवीला रेन ते शुर वोर जो मिस्र देसान पुर्व अश्शुर ने वाटे वोह गीया; एने तान ईसो तान आखा बाय बांडलान सामने पुड़नो।
एसाव एने याकुबान जेल्मो
अब्राहाम ने बेटाख इसहाकान वोस ज्यी हे : अब्राहाम से इसाहाक पायदा इनो। एने इसाहाक चालीह वोरह्यान इनो, तेवी तो पद्दन अराम गावा वालो, बतुएल ने बेटीख एने लाबान ने बोणीख रिबीका हिऱ्यो वाराड़ केर लिदो। इसहाकान बायकु ते वान्ठी एती, केरीन तो तीन केरता बोगवाना फाय विन्ता किऱ्यो; एने बोगवान तान विन्ता होमल्यो, इह केरीन रिबीका पेटावाली बोणनी। तीन पेटाम जोवल्या सोरा एता, एने ता आपसाम विलगीन एक दिहराह देताला; तेवी ती केयी, “मारी ओहलीच देशा रेय ते मी किहीक जीवताली रेह?” केरीन ती बोगवानान मोरजी फुसणे गियी।
तेवी बोगवान तिह केयो, “तारा पेटाम दुय देसा पोर राज केरनारे पायदा एती, एक राज ने माणहे दिहरा राज्याह रेन वोदार ताकेत वाला रेती एने डावालो सुरो आतल्या सोरान ताबाम रेय।”3
ओवतो रिबीकान फोकड़ाणेन टेम आवो, ते तीन जोवल्या सोरा हेते। पेल्लो जो सोरो पायदा एनो तान सेरीर रातलो एतो, एने तान आखो डिल कामल्यान गेत रोसकावालो एतो; केरीन तान नाव एसाव मेलाय गीयो। पासाण तान बाहख तान आथा केरीन एसावान खेटी देर रियेलच पायदा इनो; एने तान नाव याकुब4 मेल्या, जेवी रिबीका ताह जेल्मो देनी तेवी इसाहाक साठ वोरह्यान इतो।
एसाव तान जेठालान आदिकार वेचणो
ओवता ता सोरा पोहाणे बाज गीया, एने एसाव ते जेंगलाम चेतुर सिकार खेलनार बुण गीयो, पुण याकुब ते बुलो माणुह एतो, एने तो तोम्बु माय रेतालो। इसाहाक ते एसाव सिकार केरीन जो माह लावतालो तो खाया केरतालो, केरीन तो ता पोर मोंग केरतालो; पुण रिबीका याकुबा पोर मोंग केरताली।
एक दिह एसाव जेंगलाम रेन जुलूम लेवायीन आवो, तेवी तुलबुखे याकुब दाल रांदणे बाज रियेल इतो। तेवी एसाव याकुबाह केयो, “माहु ओयीच रातली वोस्तुम रेन थोड़ोक खाणेन आप, काहाकाय माहु बुख लाग रेनीह;” केरीन तान नाव एदोम बी पोड़नो।
पुण याकुब केयो, “तान बोदले आजुच तु तारो जेठालान आदिकार माहु वेच दे।”
एसाव केयो, “देख मी ते एवी बुखल्यो मोरने बाज रिनोह, केरीन जेठालान होकान मारो काय फायदो एय?”
याकुब केयो, “मार हिऱ्यो एवीच सुगोण खा।”
तेवी तो ता हिऱ्यो सुगोण खादो एने तान जेठालान आदिकार याकुबान आथाम वेच दिनो।5 ओवतो याकुब रूटो एने रांदेल मसुर ने दाल आप्यो; एने तो खादो पिदो, एने ता रेन उठीन जात रिनो, इह केरीन एसाव तान जेठालान आदिकाराह कायच नाह जाण्यो।
Source notes (5)
- Footnote राखेल्युन हाजीरा एने कतूरा
- Cross-reference उत्पत्ती 23:16
- Cross-reference रोमीयो 9:12
- Footnote याकुब कोपेट केरीन दिहरा आदिकार सांडाड़णार
- Cross-reference इब्रानियो 12:16
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.