Nahali Bible
यहेजकेल 47
मोंदिर माय रेन वोयतालो जिर
ओवतो तो एदमी माहु गेरान बायणा पोर फिरावीन ली गीयो; एने गेरान ओटला बुंदे रेन एक जिर निकलीन पुर्व उगे वोयतालो। एने गेरान बायणो ते पुर्व उगे एतो। एने जिर गेरान पुर्व उगे वेदीन देक्षिण उगे बुंदे निकेलतालो। तेवी तो माहु उत्तर उगेन फाटेक लागतो बाहेर ली गीयो, एने बाहेर बाहेरूच फिरावीन बाहेर पुर्व उगे वाला फाटेक उगे पोचाड़ दिनो; एने देक्षिण उगे पाणी जेरफीन वोयतालो। जेवी तो एदमी आथाम मापणेन दोयड़ी लेन पुर्व उगे निकेलनो, तेवी तो गेराम लागतो एजार आथ वोर जिराह माप्यो, एने माहु पाण्याम चालाड्यो एने तो पाणी गुटण्याम वोर एतो। तो पुशो एजार आथ मापीन माहु पाण्याम चालाड्यो, एने पाणी मांडाम वोर एतो, पुशो एजार आथ मापीन माहु पाण्याम चालाड्यो, एने पाणी कोमेर वोर एतो। तेवी पुशो तो एजार आथ माप्यो एने ओहली नेदी बोण गियी जीन पार मी नाह जाय सिक्यो, काहाकाय पाणी वोदीन जेफणे हारको एय गीयो, एने ती ओहली नेदी एती जीन पार कुण जाय नाह सेकतालो। तेवी तो माहु फुशो, “एय माणहान सोरा, काय तु ज्य दिखेल हे?”
पुशो तो माहु नेदीन मीरे मीरे फिरावीन पोचाड़ दिनो। फिरीन मी दिख्यो काय, नेदीन दुयू मेरा पोर जुलूम जाड़े हेते। तेवी तो माहु केयो, “ज्यो जिर पुर्व देसान उगे वोयणे बाज रिनोह, एने अराबा माय उतरीन तालान उगे वोयी; एने ज्य गेराम रेन निकलीन हुतरो ताल माय मिलाय जाय; एने तान पाणी मिठो एय जाय। जाहरी जाहरी ज्यी नेदी वोयी, ता ता सोब बातीन इंडा मेलनारे जीवजेन्तु जीवती एने मासा बी जुलूम एय जाती; काहाकाय ज्या जिरान पाणी ताहरी पुचेल हे, एने तालान पाणी मिठो एय जाय; एने जा का ज्यी नेदी पोची ताहरी सोब जेन्तु जीवती। तेलान मीरे मासऱ्या उब रेती, एने एनगदी रेन एनएगलेम वोर ता जाल पोसरावती जाती, एने ताह मोटला देरीयान गेत बात बातीन गेणाय नाय ओलाक मासा सापेड़ती। पुण तेलान आहने जो गारो एने खाडा हेते, तान पाणी मिठो नाय रेय; ता खारलाच रेती। नेदीन दुयू मीरे बात बातीन खाणेन लायकीन फोलावाला जाड़े उगती, जान पाला नाय कोमाती एने तान फोलनो बी केदी बोंद नाय एय, काहाकाय नेदीन पाणी चोखाला जागाम रेन निकलेल हे। ता माय मोयना मोयना, नोव नोवा फोले लागती, एने तान फोले ते खाणेन, एने पाला दावान काम लागती।”
देसान एद्दयु
बोगवान यहोवा इही किथे, “जी एद्दी माय तुमूह ज्यो देस तुमरा बारा गेराणान गेत वाटणे पोड़ी, तो ज्य हे : युसूपाह दुय ईसा जुड़ी। ताह तुमू एक दिहरान हारको सोतान ईसो सापड़ावहो, काहाकाय मी सुगोण खादो काय ताह मी तुमरा डायडायाह आपुह, केरीन ज्यो देस तुमरो सोतान ईसो बोणी।”
देसान एद्दी ज्यी रेय, मतलब उत्तर उगेन एद्दी मोटला देरीयाम लागतो हेतलोन ने जागे रेन सदादान गाटे वोर पुचे, एने ती एद्दीन जागे हमात बेरोत एने सिब्रेम जो दमिश्क एने हमात ने एद्दीन विचीम हे, एने हसर्हत्तीकोन वोर, जी होरान एद्दी पोर हे। ज्यी एद्दी देरीयाम रेन लागती दमिश्क ने एद्दीन जागेवाला हसरेनोन वोर पुचे; एने तान उत्तर उगे हमात रेय, उत्तरवाली एद्दी ज्यीच हे।
पुर्वान एद्दी जीन एक उगे होरान दमिश्क; एने यरदन ने उगे गिलाद एने इस्राएलान देस रेय; उत्तरवाली एद्दी रेन लागतो पुर्वी ताल वोर तीह मापज्ये, पुर्वी एद्दी ते ज्यीच हे। देक्षिणी एद्दी तामार रेन लागतो मरीबा कादेश नावान जिर वोर मतलब मिस्रान खुदेर वोर, एने मोटला देरीयाम वोर पुचे, दक्षिणी एद्दी ज्यीच रेय। पश्चिमी एद्दी देक्षिणी एद्दी रेन लागती हमात ने गाटान सामने वोर वाला मोटला देरीयान वोर रेय, पश्चिमी एद्दी ज्यीच रेय। इह केरीन इस्राएलान गेराणान गेत वाट लिज्यो। ज्याह आपसाम एने ता पाराया देसावाला हेऱ्या वाट लिज्यो, जा तुमरी विचीम रिते लेन सोरा पायदा केरी, ता तुमरी नेजरीम देसावाला इस्राएली माणहान हारका गेणाय, एने तुमरा गेराणान विचीम जीव जीवान ईसो सापड़ावे। जा पाराया देसावालो जा गेराणान देसाम रेतेय, ताह तोच ईसो आपज्यो, बोगवान यहोवान ज्यो बोल हे।
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.