Nahali Bible
यहेजकेल 18
सोतान जापापदारी
पोशो बोगवानान ज्य वचन मार फाय पोचनो, तुमू जा इस्राएल देसान बाराम ज्य काणी केतेह,
खाटाला अंगुर खादा ते आबहेख,
पुण दात खाटाना, सोरान ज्यान काय मतलब हे?
मालीक बोगवान किथे काय मारा जीवणान सुगोण, तुमूह इस्राएल देसाम पोशी ज्यी काणी केणेन टेम नाय जुड़ी। दिखो, आखान जीव ते मारा हेते; आईख आबाख ने हेऱ्योच सोरान बी जीव हे; दुयू माराच हेते, केरीन जो माणुह पाप किरेह, तो मोर जाय।
जो एगदो देरमी रेय, एने न्यायनिवाड़ान एने देरेम काम केरी, एने नाय ते बोयड़ा पोर वाला पुजान जागाम खादो एय, एने नाह इस्राएलान गेराणान मुरता उगे निजेर टाक्यो एय; एने नाह पारायी बायकु हिऱ्यो फाड़को आवणे बुखेत ती हिऱ्यो पाप सोवचार किऱ्यो एय। तो कुणीन ठेगीन नाह खात पुण, गिरवी मिलेल वोस्तु केर्जावालाह फिराव दिथे, तो चोरी नाह किरेत, पुण बुखल्याह तान रूटो आपेह, एने उगाड़लाह फाड़का पेरावेह। तो बिगेर वियाजान पोयशा उदारे आपेह, एने ता फाय रेन फायदो नाह विसेत, तो खाराब काम केरनेन तान आथ रोक मिलेह, एने माणहान विचीम खेरो न्यायनिवाड़ो किऱ्यो एय। तो मारी नेमा पोर चालेह एने मार नेमाह मानते लेन खेराईम काम केऱ्यो एय, ओहलो माणुह देरमी हे, तो खेरीच जिवतालो रेय, ज्यो मालीक बोगवानान बोल हे।
“पुण केदी तान बिटोख डाकु, खुनी, नाहते उपेर कियेल पापाम रेन काल्लो बी पाप केरतेय, तीबी तान आबोख ज्याम रेन काल्लो बी काम निह केरतेय, एने बोयड़ावाला पुजान जागाम खाणो खादो एय, पारायी बायकुह दिऱ्यो एय। गेरब्याह ठेगीन खादो एय, एने दिहराह लुट्यो एय, गिरवी मिलेल वोस्तु निह फिरावतेय, मुरता पोर निजेर टाक्यो एय, खाराब कामे किऱ्यो एय। तो वियाजा पोर उदार पोयशा आपेह एने फायदो कामावेह, काय ओहलो माणुह जीवतालो रेय? तो जीवतालो नाय रेय! काहाकाय तो ज्या आखा खाराब कामे किरेल हे, तो जोरूर मार टाकाय जाय; तान खुनान गुनो ताच पोर रेय।”
“पुण केदी, ज्या बेटाख ने बिटोख हे, जो तान आबाख ने उगे रेन किरेल आखा पापाह दिखेह, एने तीबी तो ता पापाह दिखेह, पुण तो ओहलो काल्लो पाप नाह किरेत। तो बोयड़ा पोर वाला वेदीन सामने बोली किरेल जेनवेरान माह नाह खात, एने इस्राएली गेराणान उगे रेन मानेल मुरता उगे मोदेक ने केरता निजेर नाह टाकेत, तो तान आहने रेणारान बायकुह एठी नाह किरेत। तो कुणीह ठेगीन नाह खात, केरजो आपणेन केरता काल्ली वोस्तु गिरवी नाह लेत, तो चोरी नाह किरेत, पुण सोतान रूटो बुखल्याह आपेह एने उगाड़लाह फाड़का पेरावेह। तो गेरब्याह सेतावणेन तान आथाह रोक मिलेह, एने ता फाय रेन वियाजान फायदो नाह विसेत, तो मारा नेमान पालेन किरेह, एने मारा नेमा पोर चालेह, तो तान पापान कारेण नाय मोरी; तो जोरूर जीवतालो रेय। पुण तान आबोख तान सोतान पापान कारेण मोरी, काहाकाय तो तान हेगा बाय बोणहाह लुट्यो, एने तो काम किऱ्यो जो तान गेरल्यान माणहान विचीम खाराब हे।”
तीबी तुमू फुसतेह, “बिटोख तान आबाख ने गुनान डेन्ड काहा नाय बोगी? जेवी बिटोख तो काम किऱ्यो जो हाजो एने खेरो हे, एने हासकेरीन मारा नेमाह मानेल हे, ते तो जोरूर जीवतालो रेय। जो पाप केरी, मोरी बी तोच, पापान फोल बिटोख केदी बी नाय बोगी, एने नायते बेटाख ने पापान फोल आबाख बोगेतणे पोड़ी, पुण देरमी माणहाह तान देरमान फोल एने पापीह तान पापान फोल जुड़ी।”
“पुण केदी पापी माणुह तान सोब पापाह सोड़ दिथे, एने मारा नेमान पालेन किरेह, केदी तो माणुह नियाव एने देरमान काम केरने बाज जाय, ताहार तो नाय मोरी; पुण जीवतालो रेय। तो जा बी पापे किरेल हे, नियाव ने दिह तान गुनान लेखो नाय लेवाय जाय, पुण तो तान देरमान कामान कारेण जीवतालो रेय। काय मी एगदा पापीन मोती माय खुस एथु? नाह, जेवी एगदो पापी माणुह तान खाराब कामाह सोड़ दिथे एने जीवतालो रिथे, तेवी माहु खुसी इथे, ज्य मी बोगवान यहोवान वचन हे।”
“पुण एगदो देरमी माणुह तान देरेमने कामाह सोड़ीन खाराब कामे केरने बाज जाथे, ते काय ओहलो माणुह जीवतालो रेय? नाह, पुण न्यायनिवाड़ान दिह तान देरेम ने कामान एर नाय केराय जाय, काहाकाय तो मारो बुरहो तुड़ेल हे, केरीन तो गुनेगार हे, एने तो पाप किरेल हे; केरीन तो जोरूर मोरी।”
तीबी तुमू केतेह, “मालक्यान नेती हाजी नाय मिले; एय इस्राएली होमलो, काय मारी नेती हाजी नाय मिले? तान उलटा, तुमू खाराब कामाह देरेम ने काम केतेह, पुण काय तुमरी नेती खाराब हेत्यु ज्यु न्यायनिवाड़ान बाराबोर नाय मिले। केदी एगदो देरमी माणुह तान देरेम ने कामाह सोड़ीन खाराब काम किरेह, ते तो तान खाराब कामान कारेण मोरी; जो पाप किरेह, तान फोल मोत हे। पुण केदी पापी माणुह तान खाराब कामाह सोड़ दिथे, एने तो काम किरेह जो हाजो एने खेरो हे, ते तो तान जिवाह वोचाड़ी। काहाकाय तो तान केराय जायेल सोब पापान पाचतावो किऱ्यो एने ताह सोड़ दिनो, केरीन तो माणुह जोरूर जीवतालो रेय; तो नाय मोरी। तीबी इस्राएली केतेह, मालक्यान वेवारो हाजो नाय मिले; एय इस्राएलान माणहे, काय मारो वेवारो हाजो नाह सोतो? काय जो तुमरो वेवारो नाह, ज्यो हाजो नाय मिले।”
“केरीन एय इस्राएली, मी तुमरे माय रेन आखान न्यायनिवाड़ो ताच ने सोबावान गेत केरूह, ज्य मारो यहोवा बोगवानान वचन हे, पाचतावो किरो, तुमरा सोब पापाह सोड़ दिवो; तेवीस तुमरो पाप तुमरे ठोकेर खाणेन कारेण नाय बोणी। तुमू मार विरूद जुलूम पापे किरेल हेते, ता सोबाह तुमू हेऱ्या रेन सेटा किरो; एक नोवालो मोन एने एक नोवाली जीव पेर लिवो, हे, इस्राएलान माणहे तुमू मोरने काहा होदतेह? काहाकाय मी एगदा पापी माणहान मोतीम खुस नाह एत, केरीन तुमू पासतावो केरीन फिरीन आवो, एने जेलेम जीवताला रिवो।” मालीक बोगवानान ज्य वचन हे।
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.