Nahali Bible
यहेजकेल 10
बोगवानान बोड़ाय यरूशलेम मोंदिर माय रेन निकेल जाणो
मी दिख्यो काय फाकावाला जीवान मुंडा पोर जो जुगमोन्डोल हे, एने ज्या जुगमोन्डोला माय एक निल्ला रेंगान मोंगालो देगड़ान राजगादिन गेत काह देखातालो। 2 जो माणुह हुवाल्ला फाड़का पेर रियेल एतो, ताह बोगवान केयो, “फाकावाला जीवान नेड़ा चाकारा फिरतेह, तान विचीम जा, एने कुरबोन, विचीम रेन दुयू मुठी माय हेलेगताला इंगाल विस लाव, एने ताह यरूशलेम हेयरा पोर खोवली दे।”
तो मार डोलान सामने तान विचीम गीयो। जेवी तो माणुह माय गीयो, तेवी फाकावाला जीवे मोंदिरान डाखरी उगे उबरियेल एता, एने माय वाली खोली एक वादला माय बोराय गियी। तुलेचबुखे बोगवानान उजालो करूब ने उपेर रेन गेरान ओटला पोर आव लागो, गेर वादला माय बोराय रियेल एतो एने खोली बोगवानान बोड़ाय माय बोराय रियेल एती। फाकावाला जीवान फाकान आवाज बाहेरली खोलीम वोर ओहलो होमलातालो, काय जोहलो ताकेतवाला बोगवानान आवाजान गेत होमलाह, जेवी ता बोलताला।
जेवी बोगवान हुवाल्ला फाड़का पेर रियेल माणहाह उकुम आप्यो, “फाकावाला जीवान नेड़ा फिरनार चाकारान विचीम रेन आक्ठो लेय ले,” तो माणुह गीयो एने एक चाकरान उगे उबरेय गीयो। तेवी फाकावाला जीवा माय रेन एक तान विचीम वाली आक्ठीन उगे तान आथ ओंगाण केरीन ता माय रेन थोड़ीक आक्ठी लेन हुवाल्ला फाड़का पिरेल माणहान आथाम मेल दिनो, तो ताह लेन बाहेर जात रिनो।
फाकावाला जीवान फाका बुंदे माणहान आथा हारको काह देखातालो। मी दिख्यो फाकावाला जीवान एक उगे चार चाकारा, एक एक फाकावाला जीवान उगे एकेक चाकारा हेते; ता चाकारान वेह मोंगाला चोमेकताला देगड़ान गेत चोमकिण्यो इतो। ता चार चाकारान आकार एक हारको एतो; एने ओहलो लागतालो, काय ता एका दिहरा माय होमाय रेना एती। 3 जेवी ता ओंगाण जाताला, ते चारो दिशा माय रेन ती दिशा उगे जाताला, जी उगे फाकावाला जीवान मुय रेतालो; जेवी करूब चालताला, ते चाकारा बिगेर इही तिहे वोलेल तिच दिशा उगे जाताला, करूब बिगेर इही तिहे वोलेल तिच दिशा माय जाताला, जी उगे तान मुय रेतालो। मी दिख्यो काय फाकावाला जीवान आखो डिला माय एने फाका माय एने आहने वाला चाकारा माय बी आखी उगे डोलाच डोला हेते। मी हुमल्यो काय ता चाकाराह फिरनारे चाकारा केवाय गीया। 4 एक एक फाकावाला जीवान चार चार मुये एता, एक मुय फाकावाला हारको, दुसरो माणहा हारको, तीसरो सिंहा हारको एने चौथो मुय गुवड़ान हारको एतो।
तेवी करूब उपेर उखला ताला, ता ताच जीवताला जीव एता, जाह मी कबार नेदीन मीरे दिखेल इतो। जेवी फाकावाला जीव चालताला, ते तान उखेरल्या चाकारा बी चालताला; एने जेवी करूब बुय पोर रेन उपेर उड़नेन केरता तान फाके पोसरावताला, तेवी चाकारा तान उगे जाणे नाह वोलताला। जेवी ता उबरेताला तेवी ता बी उबरेय जाताला; एने जेवी ता उठताला तेवी ज्या बी ता हेऱ्या उठताला; काहाकाय जीवदारीन जिव ज्याच माय रेताली।
तेवी बोगवानान उजालो गेरान ओटली पोर रेन जात रिनो एने फाकावाला जीवा पोर थोब गीयो। तेवी फाकावाला जीव तान फाके पोसराया एने हवा माय उड़ गीया, मी ताह मोंदिराह सोड़ताला दिख्यो! चाकारा बी ता हेऱ्या गीया, तेवी बोगवानान मोंदिरान दिह उगता बायणा पोर थोबना, इस्राएलान बोगवानान उजालो ता पोर एतो।
ज्या ताच जीवताला जीव एता, जाह मी कबार नेदीन जागे इस्राएलान बोगवानान निड़ो दिखेल इतो, एने मी सोमजी गीयो काय ता हेरोग दुत एता। एक एकान चार चार मुये एने चार चार फाके एता एने तान फाका बुंदे माणहान आथा हारको काह देखातालो। तान मुयान वेह तोहलाच एता, जोहला मी कबार नेदीन जागे दिखेल इतो, ता हुतरा जिव जिवान तान आखा डिले तोहलाच एता, आखा तान जिव जिवान हुतराच चालताला।
Source notes (4)
- Cross-reference प्रकाशितवाक्य 4:2; यहेजकेल 1:26
- Cross-reference प्रकाशितवाक्य 8:5
- Cross-reference प्रकाशितवाक्य 4:8
- Cross-reference प्रकाशितवाक्य 4:7; यहेजकेल 1:10
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.