Nahali Bible
निर्गमन 4
बोगवान मुसाह निसाणीन मोटली ताकेत आपेह
तेवी मुसा जापाप आप्यो, “ता मार पोर बुरहो नाय केरती एने मारो नाय होमेलती, पुण केती, ‘यहोवा तुवाह देरसेन नाह आपेल सुतो।’ ”
बोगवान ताह केयो, “तार आथा माय ओयो काय हे?” तो केयो, “डिंगो।”
बोगवान केयो, “ताह बुय पोर टाक दे।” जेवी तो ता डेंगाह बुय पोर टाक्यो तेवी तो गेयड़ेक बोण गीयो, एने मुसा तान ओंगाण रेन नाठो। तेवी बोगवान मुसाह केयो, “आथ ओंगाण केरीन ज्यान सेमटी दिर ले।” जेवी तो आथ ओंगाण केरीन ताह दिऱ्यो, ते तो तान आथा माय पुशो डिंगो बोण गीयो। तेवी बोगवान केयो, “काहाकाय तुमरा डायलान बोगवान मतलब अब्राहाम, इसाहाक एने याकुब ने बोगवान तुवाह देरसेन आपेल हे। तेवी ता माणहे बुरहो केरती।”
पुशो बोगवान ताह ज्य बी केयो, “तार आथ साती पोर मेलीन डाप।” तेवी तो तान आथ साती पोर मेलीन डाप लिदो; ओवतो जेवी ताह काड्यो तेवी काय दिख्यो, काय तान आथ कोढ़ ने कारेण बोर्फान गेत दोवल्यो एय जायेल हे। ओवतो बोगवान पुशो केयो, “तार आथ साती पोर उंजु मेलीन डाप।” एने तो तान आथ साती पोर मेलीन डाप लिदो; एने जेवी तो आथ साती पोर रेन काड्यो, तेवी काय दिखेह काय तो पुशो जुहलो इतो तुहलोस एय गीयोह। तेवी यहोवा केयो, “केदी ता तार वात पोर बुरहो नाय केरी, एने पेल्ली निसाणीह नाय मानी, ताहार दिहरी निसाणी पोर बुरहो केरती। एने केदी ता ज्यी दुय निसाणी पोर बुरहो नाय केरी, एने तारी वात नाय मानती, तेवी तु निल नेदी माय रेन जारीक पाणी लेन हुकील बुय पोर टाकज्ये; एने जो पाणी तु नेदी माय रेन काड़हे तो हुकेल बुय पोर लुय बोण जाय।”
मुसा यहोवाह केयो, “एय मारा मालीक, माहु ते हासकेरीन बोलता वोर नाह ओवड़ेत, नाहते पेल इतो, एने नाह जेवी रेन तु तार पावोर हिऱ्यो वातु केरने बाज रिनोह; मी ते मुय एने जिबीन बोबड्यो हे।”
बोगवान ताह केयो, “माणहान मुय कुण बाणायेल हे? एने माणहाह मुको, बेयरो, देखणार, नाहते आंदलो, माहु यहोवाह सोड़ीन कुण बाणाव सिकेह? काय मी तोस यहोवा नाह? एवी जा, मी तुवाह बोलनेन मुदेक केरूह, एने केह काय तुवाह काय केणु हे।”
पुण मुसो जापाप आप्यो, “एय मारा मालीक, तु एगदा दिहरा माणहाह मोकली दे।”
तेवी बोगवानान राग मुसा पोर बोड़ेकनो एने तो केयो, “काय तार बाहख हारून जो लेवी वोस ने नाह सोता? माहु मालुम हे काय ताह बोलता नाह ओवेड़ने, एने तो तुवाह मिलनेन केरता निकली बी जायेल हे, एने तुवाह देखीन मोना माय खुस एय। केरीन तु ताह ज्यु वातु हिकाड़जी; एने मी तान मुया हिऱ्यो एने तार मुया हिऱ्यो रेन जो काय तुमूह केरनु रेय, तो तुमूह हिकाड़ते जाह। तो तार उगे रेन माणहा हिऱ्यो वातु केरी। तो तार केरता बोलनार एने तु तान केरता बोगवान ठेराहे। एने तु ज्या डेंगाह आथा माय लेन जा, एने ज्या केरीन ज्यो चोमेत्कार देखाड़जे।”
मुसान मिस्र देसा माय वोलनो
तेवी मुसा तान हाहराक यित्रो फाय आवो एने ताह केयो, “माहु वाटे लागाड़, काय मी मिस्र माय रेणारा मारा बाय बोणहा फाय जायीन देखु काय ता आज वोर जीवता हेते काय नाह।” यित्रो केयो, “हाज केरीन जा।”
एने बोगवान मिद्यान देसा माय मुसाह केयो, “मिस्र माय जात रे; काहाकाय जा माणहे तारा जीवान तीहल्या एता ता सोब मोर जायेल हेते।”1 तेवी मुसा तान लाडी एने बेटाख गेदड़ा पोर बोहाड़ीन बोगवान आपेल डिंगो आथाम लेन मिस्र देसाम गीयो।
पुशो बोगवान मुसाह केयो, “जुलबूखे तु मिस्र माय पुचहे तुलबुखे उशारीम रिज्ये, एने जा चोमेत्कारे मी तार ताबाम किरेल हे ता सोब फिरोनाह देखाड़ज्ये; पुण मी तान मोन वातड़ो केर देह, एने तो मारा माणहाह जाणे नाय देय। पुशो तु फिरोनाह किज्ये, ‘यहोवा ज्य किथे, काय इस्राएल मारो मुटलो बिटोख हे।2 3 एने मी जो तुवाह केय होमलायो, काय मार बेटाख जाणे दे काय तो मारी बोक्ती केरी; एने तु ताह एवी वोर जाणे नाह दिनो, केरीन मी एवी तारा पेल्ला बेटाख मार देह।’”
तेवी ओहलो एनो काय वाटी पाड़ावे बोगवान मुसाह मिलायीन ताह मार टाकणे हुद्यो।4 तेवी सिप्पोरा एक दाराल्यो दिगोड़ लेन तीन सोरान चामड़ाह काट देनी, एने मुसान पाया पोर ज्य किन टाक देनी, “खेरीस तु लुय वोयाड़नार मार एदमी हे।” तेवी ती ताह सोड़ देनी एने तुलबुखे खेतनान कारेण ती केयी, “तु लुय वोयाड़नार एदमी हे।”
तेवी बोगवान हारूनाह केयो, “मुसाह मिलनेन जेंगला माय जा।” एने तो गीयो, एने बोगवानान बोयड़ा पोर ताह मिलनो एने ताह गुल्या दिनो। तेवी मुसा हारूनाह ज्य केयो काय यहोवा काय काय वातु केन ताह मुकलेल हे, एने काल्लो काल्लो चोमेत्कार देखाड़नेन उकुम ताह आपेल हे। तेवी मुसा एने हारून जायीन इस्राएल ने डावालाह टुलो केऱ्या। एने जोल्यु वातु बोगवान मुसाह कियेल एती त्यु सोब हारून ताह केय होमलायो, एने माणहान डोलान ओंगाण चोमेत्कार बी देखाड्यो। एने माणहे ता पोर बुरहो केऱ्या; एने ज्यो होमलीन काय यहोवा इस्राएलीह द्यान दियेल एने तान दुखा पोर निजेर लागाड़ेल हे, ता पाया पोड़ीन वोंद्या।5
Source notes (5)
- Cross-reference प्रेरितान काम 7:34; मत्ती 2:20
- Cross-reference व्यवस्था 1:31; यिर्मया 31:9
- Cross-reference निर्गमन 12:29
- Cross-reference उत्पत्ती 17:14; 32:25
- Cross-reference निर्गमन 14:31; योहान 2:11
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.