Nahali Bible
निर्गमन 36
“बसलेल एने ओहोलीआब एने आखा उशार जाह यहोवा बुद्दी एने इकेल आपेल हे, काय ता यहोवा कियेल तिहकेरीन चोखाला जागान सेवान केरता आखी बातीन काम केरनेन सोमेजती, ता आखा ज्य काम केरती।”
माणहान द्वारा जुलूम बेट आपणो
तेवी मुसा बसलेल एने ओहोलीआब एने आखा एकलीवालाह जाह यहोवा बुद्दी आपेल इतो, एने जाह जाह ताहरीक आवीन काम केरनेन खुसी लागताली, ता आखाह हाद्यो। एने इस्राएली माणहे जी जी वोस्तु बेट चोखाला जागान सेवान कामाम एने तो बाणावणेन केरता लायेल एता, तो आखो ता माणहे मुसान आथाम रेन लेय लेदा। एने माणहे दाड़ीन वेगास मुसा फाय तान मोरजी से बेट लावताला; एने जोला बी एकलीवाला माणहे चोखाला जागान काम केरताला ता सोब जान तान काम सोड़ीन मुसा फाय आवा, एने केतेह, “जो काम केरनेन यहोवा उकुम आपेल हे, ता कामान केरता जुवे ताह रेन जादा न्या माणहे लाव देनाह।”
तेवी मुसा आखी उगे फिर फिरीन इह केरीन केणे लागाड्यो, “काल्लोस बी एदमी, एने काल्लीस बी बायकु, चोखाला जागान केरता पोशा बेट मा लावहो।” तेवी इह केरीन माणहे पोशा बेट नाह लावा। काहाकाय आखो काम केरनेन केरता जोलो बी सामान जोवतालो, ताह रेन बी जादा बाणावणारा फाय एय जाईल एतो।
तोम्बु बाणावणो
(निर्गमन 26:1-37)
एने काम केरनारे जोला बी उशार कारागीर माणहे एता, ता तोम्बुन केरता बारीक गुथीन बाणायेल फाड़का, निल्ला, जामण्या एने रातला रेंगान फाड़कान दोह पोड़दा एने ता पोर करूबान चित्रो गुथीन बाणाया। एक एक पोड़दान लांबाय आठ्ठावीस आथ एने चोवड़ाय चार आथ1 एने आखा पोड़दा एकुस मापान बाणाया। ता बाणावणारे पाच पोड़दा एका दिहरा हेऱ्यो जोड़ देना, एने पोशा दिहरा पाच पोड़दा बी जोड़ देना। एने जुलेक रेन ता पोड़दा जुड़ेल एता, ताच दुय सेंडा पोर ता निल्ला रेंगान फाड़कान फांदा बाणाया। ता दुयू बी सेंडा पोर पाचाह पाचाह फांदा बाणाया एने ता फांदा आमने सामने एता। एने पोशा ता होनान पाचाह आकड़ा बाणाया, ता केरीन पोड़दा एकठास जोड़ाय गीया काय तोम्बु मिलीन एक एय गीयो।
पोशा तोम्बुह डापणेन केरता ता बोकड्यान रोचकान इग्यार पोड़दा बाणाया। एक एक पोड़दान लांबाय तीस आथ एने चोवड़ाय चार आथ; एने इग्यार पोड़दा एकुस मापान एता। एने ता माय रेन ता बाणावणारे पाच पोड़दा आंगेस एने सोव पोड़दा आंगेस जोड़ देना। एने जाहरीक दुय पोड़दा जुड़ेल एता, ता सेंडा पोर ता पाचाह पाचाह फांदा लागाड्या। एने ज्या दुयू पोड़दा जोड़ीन एक तोम्बु बाणावणेन केरता ता पितलान पाचाह आकड़ा बाणाया जा केरीन तो एक एय जाय। एने ता तोम्बुन केरता रातला रेंगा केरीन रिंगेल मेंडान चामड़ान एक हापोड़ बाणाया, एने तान उपेर सुइसो मासान चामड़ान एक हापोड़ बाणाया।
पोशा ता रेणेन जागान केरता बाबल्यान लाकड़ान खाम उबा केऱ्या। एक एक पाटड्यान लांबाय दोह आथ एने चोवड़ाय डेढ़ आथ एनी। एक एक पाटड्या एका दिहरा जोड़ीन दुय दुय जोड़पा बोणना, रेणेन जागी आखा खुटान केरता ता ओहलोस बाणाया। एने ता रेणेन जागान केरता दक्षिणान उगे विह पाटड्या बाणाया। एने ज्या विह पाटड्यान बुंदे चांदीन चालीह पाया, मतलब एक एक पाटड्यान बुंदे तान दुय जोड़पान केरता ता दुय पाया बाणाया। एने रेणेन जागान एक उगे मतलब उत्तरान उगे बी विह पाटड्या बाणाया। तान केरता बी ता चांदीन चालीह पाया बाणाया, मतलब एक एक पाटड्यान बुंदे दुय दुय पाया बाणाया। एने रेणेन जागान पासाण मतलब दिह बुड़ता उगेन केरता ता सोव पाटड्या बाणाया। एने तिहेच केरीन पासाणल्या गालाम रेणेन जागान कोपरान केरता ता दुय पाटड्या बाणाया। एने ता बुंदे रेन दुय दुय गालान बोणना, एने दुय बी गाला उपेरल्या सेंडान जागे वोर एक एक आकड़ा माय जोड्या; बाणावणारे ता दुय पाटड्यान आकार ओहलोच बाणाया। इह केरीन आठ पाटड्या बोणना, एने तान चांदीन सोला पाया एन्यु, मतलब एक एक पाटड्यान बुंदे दुय दुय पाया एन्यु।
पोशा ता बाबल्यान लाकड़ान पाच डांडी बाणाया, मतलब रेणेन जागान एक उगेन पाटड्यान केरता पाच डांडी, एने रेणेन जागान दिहरी उगेन पाटड्यान केरता पाच डांड्यु, एने रेणेन जागान मिरो दिह बुड़ता उगे पासाणल्यी उगे इतो, तान केरता बी पाच चोवकट बाणाया। एने ता विच मायवाला पाटड्याह चोवकट ने विच माय तोम्बुन एक सेंडा पोर रेन दिहरा सेंडा पोर वोर पोचाड़नेन केरता बाणाया। एने ता चोवकट होनान बाणाया, एने पाटड्यान गेराह काम देय ओहला आकड़ा होनान बाणाया, एने खुटाह बी होनान बाणाया।
एने पोशा ता निल्ला, जामण्या एने रातला रेंगान फाड़का, बारीक गुथीन बाणायेल; तो कारागीर काम किरेल करूबा हेऱ्या बोणना। पोशा ता बाबल्यान लाकड़ान चार खाम बाणाया, ता पोर होनो फिराया; आकड़ा होनान बाणाया, एने ता तान केरता चांदीन चार पाया मेल्या। एने ता तोम्बुन बायणान केरता बी निल्ला, जामण्या एने रातला रेंगान फाड़कान एने बारीक गुथीन बाणायेल फाड़कान कारागीर फाय रेन काम केरावीन पुड़दो बाणाया। एने तान आकड़ा हेऱ्या तान पाच खाम बी बाणाया, एने तान सेंडा पोर जोड़ पोर होनो फिराया, एने तान पाच पाया पितलान बाणाया।
Source notes (1)
- Footnote लांबाय आठ्ठावीस आथ एने चोवड़ाय चार आथ बारा मिटर लांबाय एने दुय मिटर चोवड़ाय
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.