Nahali Bible
निर्गमन 31
तोम्बुन केरता कारागीर
(निर्गमन 35:30; 36:1)
पुशो बोगवान मुसाह केयो, “हुमेल, मी ऊरीन बिटोख बसलेलाह, जो हुरान नातण्योक एने यहुदान गेराणा माय रेन हे, ताह नाव देरीन हादथु। एने मी ताह बोगवानान जीवा केरीन जो बुद्दी, उशारी, इकेल, एने आखी बातीन काम सोमजाड़नार जीव हे, बोरपुर केरथु, जा केरीन तो कारागिरीन काम बुद्दी माय रेन आखी बातीन बाणावोट बाणावी, मतलब होनो, चांदी एने पितली माय, एने जोड़नेन केरता मोणी काटणेन, एने लाकड़ा पोर नक्शीन काम केरी। एने हुमेल, मी दानान गेराणाम रेन अहीसामाक ने बिटोख ओहोलीआबाह तान हाती मेलुह; एने जोला बी एकलीवाला माणहे हेते, ता आखान मोनाम मी बुद्दी आपथु, एने तेवी जोली बी वोस्तु बाणावणेन उकुम मी आपेल हे त्यु आख्यु ता बाणावती; मतलब मिलापवाला तोम्बु, एने गोवायीन पेटी, एने तान उपेर वालो पासतावान डापोण, एने तोम्बुन आखो सामान, एने सामाना हेऱ्योच टेबल, एने आखा सामाना हेऱ्योच चोखाला होनान बुलो, एने दुणी वेदी, एने आखा सामाना हेऱ्यो आक्ठान बोली वेदी, एने पाया हेऱ्यो तोपल्यो, एने हिंगारेल फाड़का, एने हारून चाकऱ्यान चाकऱ्यावाला कामान चोखाला फाड़का, एने तान सोरान फाड़का, एने अबिषेक ने तेल, एने चोखाला जागान केरता मोगो मोगो गेंदाण्यो दुणी, ज्यो आखो ता तो आखो उकुम पालेन केरीन बाणावती, जो मी तुवाह आपेल हे।”
सब्द मतलब आरामान दिह
पुशो बोगवान मुसाह केयो, “इस्राएली माणहाह इहकेरीन बी किज्यी, खेरीस तुमू मारा आरामान दिह्याह पालज्यो, काहाकाय तुमरी पिढीन पिढी माय मारी एने तुमरी विच माय ज्यी एक निसाणी ठेराय, इहकेरीन तुमू ज्यी वात एर मिलज्यो काय बोगवान आमरो चोखालो बाणावणार हे। केरीन तुमू आरामान दिह्याह पालज्यो, काहाकाय तो तुमरी केरता चोखालो ठेरायेल हे; जो ताह बिगेर चोखालो केरी तो खेरीस माराय जाय; जो बी ते दिह काह काम केरी तो माणुह तान माणहान विच माय रेन निकालाय जाय। 1 सोव दिह वोर काम किरज्यो, पुण सातवो दिह चोखालो आरामान दिह एने बोगवानान केरता चोखालो हे; केरीन जो बी आरामान दिह काह काम केरी, तो खेरीस माराय जाय। केरीन इस्राएली माणहे आराम दिह्याह पालते रिज्यो, एने पिढीन पिढी वोर ताह जेलेमक्योस वायदो सोमजीन पालते रिवो। तो मारे एने इस्राएली माणहान विच माय जेलेमक्यीस एक निसाणी रेय, काहाकाय सोव दिह्याम बोगवान जुग एने देरतीह बाणायेल हे, एने सातवे दिह आराम केरीन तान थाक मुड़ेल।”
जुलबुखे बोगवान मुसा हिऱ्यो सिनाय बोयड़ा पोर ओहल्यु वातु केर लिदो, तेवी बोगवान मुसाह तान आंगल्या केरीन लिखेल गोवायी केणार देगड़ान दुय पाट आप्यो।
Source notes (1)
- Cross-reference निर्गमन 20:8-11; 23:12; 34:21; 35:2; लेव्यवस्था 23:3; व्यवस्था 5:12-14
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.