Nahali Bible
निर्गमन 26
बोगवानान उपस्तितीन तोम्बु
(निर्गमन 36:8-38)
“पुशो रेणेन जागान केरता दोह पोड़दा बाणावज्ये; ताह बारीक होणी वाला एने निल्ला, जामण्या, एने रातला रेंगान फाड़का केरीन बाणावज्ये। एगदा हाजाला कारागिरा हिऱ्यो मिलीन करूब ने चित्रो बाणावज्ये। एकेक पोड़दान लांबाय आठ्ठावीस आथ एने चोवड़ाय चार आथान रेणे जुवे; आखा पोड़दा एकुस मापान रेणे जुवे। एने पाच पोड़दा एका दिहरा हेऱ्या जोड़ायेल रेणे जुवे; एने तिहेस केरीन दिहरा पाच पोड़दा बी एका दिहरा हेऱ्या जोड़ायेल रेणे जुवे। एने जाहरीक रेन दुय पोड़दा जोड़ाय जाय ताहरीन दुयू सेवड़ा पोर निल्ला रेंगान फासु लागाड़ज्ये। दुयू सेड़ा माय पाचाह पाचाह ओहला फासा लागाड़ज्ये काय ता आमने सामने रेती। एने होनान पाचाह आकड़ा बाणावज्ये; एने जोड़ाय रियेल पोड़दाह ज्या आकड़ा केरीन जोड़ दिज्ये ता माय पुरो चोखालो तोम्बु एकुच बोण जाय।”
पुशो तान उपेर तोम्बुह डापणेन केरता बोकड्यान बुरान इग्यार पोरदा बाणावज्ये। एकेक पोरदान लांबाय तीस आथ एने चोवड़ाय चार आथ; एने ता इग्यार पोरदा एकुस मापान रेणे जुवे। एने पाच पोरदा आंगे केरीन ताह जोड़ लिज्ये, एने सोव्वा पोरदाह तोम्बुन सोमोर वालीन डोबेल किर दिज्ये। एने तु पाचाह आकड़ा ता बाहेर रेन लागाड़ील पोरदान सेंडा पोर लागाड़जी एने पुशो पाचाह आकड़ा एक उगेन पोरदान सेंडा पोर लागाड़जी जो बाहेर रेन लागाड़ील हे। एने पुशो पितलान पाचाह खोपटा बाणावजी, एने आकड़ान फासाम लागाड़ीन तोम्बुह ओहलो जुड़जी काय तो आखो जोड़ायीन एकुस एय जाय। एने तोम्बुन पोरदान लिटकेल टुकड़ो, मतलब जो थोड़ोक वुचील रेय, तो तोम्बुन पासाण टांगाय रेय। एने तोम्बुन पोरदान लांबाय आथेक जी उगे, एने आथेक लांबाय ती उगे तोम्बुह ढापणेन केरता तान दुयू उगे टांगाय रेय।
पोशो तोम्बुन केरता रातला रेंगा केरीन रिंगेल मेंड्रान एने मोटला मासान चामड़ान पांगरूण एने तान उपेर सुइसोन चामड़ान एक पांगेरण्यो बाणावजी।
पुशो तोम्बु उबो केरनेन केरता बाबल्यान लाकड़े उबान आड़वा मेलीन एक चोवकट तियार किरजी। एक एक चोवकट ने लांबाय दोह दोह आथ एने चोवड़ाय डेढ़ डेढ़ आथान रेणे जुवी। एक एक चोवकट माय एका दिहरा हेऱ्या जोड़ायीन दुय दुय खाचा रेणे जुवी; तोम्बुन आखा चोवकट इहीच केरीन बाणावजी। एने तोम्बुन केरता जा चोवकट तु बाणावहे ताम रेन विह चोवकट दक्षिणान उगेन केरता रेणे जुवी; एने विह चोवकट ने बुंदे चांदीन चालीह कुड़ची बाणावजी, मतलब एक एक चोवकट ने बुंदे ता खाचान केरता दुय दुय कुड़च्यू। एने तोम्बुन एक उगे, मतलब उत्तरान उगे विह चोवकट बाणावजी। एने तान केरता चांदीन चालीह कुड़च्यू बाणावजी, मतलब एक एक चोवकट ने बुंदे दुय दुय कुड़च्यू रेणे जुवी। एने तोम्बुन पासाण, मतलब दिह बुड़ता उगेन केरता सोव चोवकट बाणावजी। एने पासाणल्यी उगेन कोपरान केरता दुय चोवकट बाणावजी; एने ज्या बुंदे रेन दुय दुय चोवकट रेणे जुवी एने दुयू बी चोवकट उपेरल्या सेंडान जागे वोर एक एक केड़ा माय पेरावीन; दुयू बी चोवकट ने ज्योस रूप रेणे जुवी; ज्या दुयू बी कोपरान केरता रेणे जुवी। एने आठ चोवकट रेणे जुवी, एने तान सोला चांदीन कुड़च्यू रेणे जुवी; मतलब एक एक गालान बुंदे दुय दुय कुडच्यू रेणे जुवी।
पुशो बाबल्यान वोल्यो बाणावजी, मतलब तोम्बुन एक उगेन चोवकट ने केरता पाच बाणावजी, एने तोम्बुन दिहरी उगे चोवकट ने केरता पाच डांड्यु, एने तोम्बुन जो चोवकट दिह बुड़ता उगे पासाणल्या चोवकट माय रेय, तान केरता पाच डांड्यु बाणावजी। विचीम वालो वोल्यो जो चोवकट ने विच माय हे, तो तोम्बुन एक उगे रेन ते दिहरे उगे वोर पोचणे जुवी। उवतो चोवकटाह होना केरीन बाणावजी, एने तान केड़ा जा डेंगाम हेते, ताह बी होनान बाणावजी; एने डेंगाह बी होनान बाणावजी। उवतो तु रेणेन तोम्बुह तिहेच केरीन उबो किरज्ये, जिहकेरीन तुवाह ज्या बोयड़ा पोर देखाड़ील हे।
एने निल्ला, जामण्या एने रातला रेंगान एने बारीक गुथीन हिवेल फाड़कान एक विच माय वालो पुड़दो बाणावजी; तो कारागीर फाय रेन बाणावीन करूब हिऱ्यो एक हारको रेणे जुवी। एने ताह होनान बाणायेल बाबल्यान चार खांबा पोर टांगज्यी, तान आकड़ा होनान रेणे जुवी, एने ज्यु चांदीन चार कुड़च्यू पोर उब रेती। 1 एने विच माय वाला पोरदाह आकड़ान बुंदे टांगीन, तान पासाण वायदान पोत्रान पेटी माय ली जाज्यो; तो विच माय वालो पुड़दो तुमरी केरता चोखाला जागाह मोटला चोखाला जागाह रेन आंगे रेय। एने पोशो मोटला चोखाला जागाम वायदान पोत्रान पेटीन उपेर पासतावान ढापण्यो मिलज्ये। एने ता पोरदान बाहेर तोम्बुन एक उगे टेबल मिलज्यी; एने तान दिहरी उगे टेबल ने सामने दिवो मिलज्यी।
पुशो तोम्बुन बायणान केरता निल्ला, जामण्या एने रातला रेंगान एने बारीक गुथील फाड़कान कारागीराफ रेन एक पुड़दो बाणाव मांगज्यी। एने ज्या पोरदान केरता बाबल्यान पाच खांबा बाणावजी, एने ता पोर होनो फिरावजी; एने तान केड़ा होनान रेणे जुवी, एने तान केरता पितलान पाच कुड़च्यू बाणावजी।
Source notes (1)
- Cross-reference इब्रानियो 6:19; 9:3-5
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.