Nahali Bible
एस्तेर 6
राजा उगे रेन मोर्देकान सम्मान
ती राती राजाह निंद नाह आवी, केरीन तान उकुमा माय इतिहासान पुस्तेक लावाय गियी, एने वाचीन राजाह होमलाड़ाय गियी। 1ती माय ज्य लेखायेल सापेड़नो, काय जेवी राजा क्षयर्षान आदिकारी जा राखवाल्या बी एता, ता माय रेन बिगतान एने तेरेश नावान दुय जाणे ताह मारनेन हुमच्यो किरेल एता, ताह मोर्देक देखाड़ेल इतो। तेवी राजा फुशो, “ज्यान बोदले मोर्देकान काय सुविदा एने बोड़ाय केराय गियी?” राजान जा सेवक तान सेवा केऱ्या केरताला, ता ताह जापाप आप्या, “तान केरता काईच नाह केराय गीयो।”
राजा फुशो, “खोली माय कुण हे?”
तिच टेम माय हामान राजान गेरान बाहेरली खोली माय ज्यी आसा माय आयेल इतो काय जो खांब मोर्देकान केरता तियार केरायेल इतो, ता पोर ताह टांगाड़ देणेन वातु राजा हिऱ्यो केरी। तेवी राजान सेवक ताह केया, “खोली माय ते हामान उबरिनोह।”
राजा केयो, “ताह माय हाद लावो।” जेवी हामान माय आवो, तेवी राजा ताह फुशो, “जा माणहान बोड़ाय राजा केरने होदतेय, ते तान केरता काय केरने हाजो रेय?”
हामान ज्य सोचीन, “काय माहु रेन वोदार राजा कुणीन बोड़ाय केरने होदतेय?”
तेवी हामान राजाह जापाप आप्यो, “जा माणहान पोद राजा वोदाड़ने हुदे।”
तान केरता राजान फाड़का लावाय जाय, जा राजा पिरेह, एने एक गुड़ो बी जा पोर राजा बुहेह, एने तान मुंडी पोर जो राजकीय मुकूट पेरावाय जाथे, तो बी लावाय जाय। पोशो ता फाड़का, एने तो गुड़ो राजान एगदा मोटला आदिकारीह होपाय जाय; एने जान राजा मान मेलने हुदेह, ताह ता फाड़का पेरावाय जाय, एने ता गोड़ा पोर बोहीन हेयरान चोवकी माय ताह फिरवाय जाय; एने तान ओंगाण ओंगाण ज्य पारचार केराय जाय, “जान बोड़ाय राजा केरने हुदेह, ता हेऱ्यो ओहलोच केराय जाय।”
राजा हामानाह केयो, “तावणी केरीन कियेल तिहे ता फाड़का एने ता गोड़ाह लियाव, ता यहूदी मोर्देक हेऱ्या जो राजवाड़ान फाटेक पोर बोह्या किरेह, तिहेच केर। जीहे तु कियेल हे, ता माय काय बी कोमी एणे नाय जुवे।”
तेवी हामान ता फाड़का, मोर्देकाह पेरायो, एने ताह ता गोड़ा पोर बोहाड़ीन हेयरान चोवकी माय इह केरीन आयेड़ते लेन फिरायो, “जान बोड़ाय राजा केरने हुदेह ता हेऱ्यो ओहलोच केराय जाय।”
तेवी मोर्देके ते राजवाड़ान फाटेक पोर जात रिनो, पुण हामान दुखी इन एने मुंड डापीन जेल्दीच तान गेर गीयो। हामान तान बायकु जेरेश एने तान सोब जोड़ीदाराह जो काय इयेल तो आखो काय केय दिनो। तेवी तान उशार जोड़ीदार एने तान बायकु जेरेश ताह केयो, “मोर्देके जाह तु निचो देखाड़ने हुदेह, केदी तो यहुदिन वोसी माय वालो हे, ते तु ताह जिक नाय सिकहे ताह रेन निचोच रिहे।”
हामानान मोत
ता ता हेऱ्या वातु केरनेच बाज रियेल एता काय राजान मुखी सेवक आवीन हामानाह एस्तेरीन खाणा माय जेल्दीच हाद ली गीया।
Source notes (1)
- Cross-reference एस्तेर 2:21-22
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.