Nahali Bible
सबोपदेशक 5
उतवाल माय मोन्नेत नाह मान्नो
जेवी तु बोगवानान मोंदिर माय जाहे, ताहार तारा चालनान चोकसी किरज्ये; फोगान द्वारा चेड़ायेल बोलीह रेन, बोगवानान मोंदिर माय जाणे एने तान वचन होमेल ने हाजो हे; काहाकाय फोगो ज्य नाह जाणेत काय जो काम तो किरेह, तो खाराब हे। वातु केरने माय उतवाल मा किरहे, एने उतवाल माय तारी मोनान वात बोगवानान सामने मा निकालहे, काहाकाय बोगवान हेरगा माय हे, एने तु देरती पोर हे; केरीन तारा सोबदा थोड़ास रेती।
काहाकाय जीहे काम वोदार रेणे से, माणुह होपनो दिखेह, तिहेच केरीन जुलूम वातु बोलनार फोगो ठेराथे। 1
जेवी तु बोगवानान केरता मानता मानहे, तेवी ताह पुरो केरने माय वार मा लागाड़हे। काहाकाय बोगवान फोगा माणहा से खुस नाह एत। एने जी मोन्नेत तु मानेल हे तीह पुरी किरज्ये। मानता मानीन तीह पुरी नाह केरने से, मानता नाह मान्ने से हाजो हे। तु तारा मुया केरीन ओहला सोबदा मा निकालहे जा तुवाह पापाम फोसाड़ी, एने हेरोगदुतान सामने ज्य मा किहे काय मार से गेलती एय गियीह; बोगवान तारो बोल होमलीन काहा नाराज एय, एने तो मेहनेत से किरेल तारा कामाह नास केर देय।
जेवी माणुह जादा होपनो देखणे बाज जाथे, तेवी तान बिगेर कामान वात बी वोड़ जाथे; पुण तु बोगवानाह बिज्ये।
जीवणो फालतु हे
केदी तु एगदा ईलाका माय गेरब्या पोर वेला केरावतालो एने नियाव बिगाड़तालो दिखहे, ताहार न्या से बोंगलाहे मा; काहाकाय एक आदिकारीन उपेर आखाम रेन मोटलो आदिकारी रिथे, एने ताह रेन बी उपेर मोटलो आदिकारी रिथे। पुण खेतान कामाय आखान केरता हे, पुण खेता केरीन राजान बी काम निकलेह।
जो पोयशाह मोंग किरेह, तो केदी बी पोयशा से नाय बोराय, एने नाह ओहलो माणुह, जाह मालदेनान मोंग हे; तान जुलूम फायदा से खुस ईथे, ज्य बी कायच कामान नाह।
जेवी मालदेन वोड़ जाथे, तेवी ताह खाणारे जोस्ती बी वोड़ जातेह; तेवी तान मालक्याह ता से काय फायदो ईथे? फोक्तो ज्योस काय तो ताह डोला केरीन उलोस देखी!
मोंजरी केरनार थोड़ोस खाय नाहते पेट बोरीन तीबी तान निंद जुलूम हाजी रिथे; पुण मालदारान माल वोड़ने से ताह निंद नाह आवेत।
मी देरती पोर जुलूम बुराय दिखेल हे, मतलब तो मालदेन जाह तान मालीक सोताहस तेकलीत देणेन केरता कामायेल इतो। केदी तान मालदेन एगदा खाराब कामाम जात रिथे, एने केदी तान गेराम सोरो पायदा ईथे, पुण ताह आपणेन केरता तान आथाम कायच नाह रेत। 2 जोहलो तो तान आईख ने पेटाम रेन पायदा इयेल इतो, तोहलोच नांगेरलोच वोल जाय, तो तान आथाम तान मेहनेतीन फोल नाय ली जाय सेकी। ज्यी मोटली दुखान वात हे, माणुह जोहलो पायदा इयेल इतो; तोहलोच मोरी, ते ताह मेहनेत केरने से काय फायदो हे? फोक्तो ज्या से काय तान जीवाय बोर चिन्ता माय खाणो खादो, एने जुलूम दुखी एने दुखाऱ्यो रिनो एने राग बी किरते रिनो।
होमलो, जी हाजी वात हे! माणुह खाय पिय एने तान मेहनेत से जो तो देरती पोर किरेह, तान आखी जीवाय बोर जो बोगवान ताह आपेल हे, हुकेह मिले; काहाकाय तान ईसो ज्योस हे। एक एक माणहाह बोगवान मालदेन, एने ती वोस्तुन खुसी केरनेन ताकेत आपेह, ते ता माणहाह जो काय ता फाय हे, ताह स्वीकार केरने, एने खुसी से मेहनेत केरी ज्य बोगवानान दान हे। माणुह तान पुरी जीवायीह कायेम ने केरता एर नाय केरी, काहाकाय बोगवान ता माणहाह ता कामा मायच लागाड़ मिलेह; जा कामाह केरने माय ता माणहाह हाजो लागेह।
Source notes (2)
- Cross-reference बजन 66:13-14
- Cross-reference अयुब 1:21; बजन 49:17; 1 तीमुथीयुस 6:7
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.