Nahali Bible
सबोपदेशक 3:1
Verse 1 is marked below, with the whole chapter around it. Read from the start
आखा कामान एक ठेरायेल टेम
एकेक वातीन केरता टेम ठेरायेल हे, जो देरती पोर ईथे, एक टेम हे।
जेल्मान टेम एने मोरनेन बी टेम; पेरनेन टेम
एने पिरेल ताह उखालनेन बी टेम हे;
मारनेन टेम एने हुदारनेन बी टेम हे;
ओदारनेन टेम एने बाणावणेन बी टेम हे;
रेड़नेन टेम एने आहणेन बी टेम हे; दुख माणावणेन टेम
एने नाचणेन बी टेम हे;
दिगोड़ वेरनेन टेम एने दिगोड़ टुलो केरनेन बी टेम हे; गेले लागाड़नेन टेम
एने गेले लागाड़ने से रोकणेन बी टेम हे;
होदणेन टेम, एने टाकणेन बी टेम हे;
वोचाड़ मेलनेन टेम, एने जुगार देणेन बी टेम हे;
फाड़नेन टेम एने हिवणेन बी टेम हे;
ठावको रेणेन टेम एने बोलनेन बी टेम हे;
मोंग केरनेन टेम एने दुसमोनाय मेलनेन बी टेम हे;
लेड़ाय ने टेम एने मेल मिलाप केरनेन बी टेम हे।
काम केरनाराह तान मेहनेत से काय फायदो ईथे? मी दिखेल हे काय बोगवान माणहा पोर कोलोक बार टाक्यो, जो बोगवान माणहान केरता ठेरायेल हे काय ता, ता माय लाग रेय। तो आखो ओहलो बाणायेल काय तान तान टेमा पोर ता होबाता रेतेह; ओवतो तो माणहान मोना माय कायेमान ईकेल पायदा किरेल हे, तीबी जो काम बोगवान किरेल हे, तो सुरवात रेन सेवेट वोर माणुह सोमेज नाह सिकेत। मी जाणथो काय माणहान केरता, खुसी मोणावणे एने जीवाय बोर बोलाय केरनेन सावाय, उंजु काय बी हाजो नाह; एने ज्य बी बोगवानान दान हे, काय माणुह खाय पिय एने तान आखी मेहनेत माय सुखी रेय।
मी जाणथो काय जो काय बोगवान किरेह, तो कायेम टिकीन रेय; नाह ता माय काय वोदाड़ाय जाय सिकेह, एने नाह काय गेटाड़ाय जाय सिकेह; बोगवान इहकेरीन ज्यानकेरता किरेह काय माणहे तान बिय माने। जो काय एनो, तो ज्यान पेल बी एय जायेल हे; जो एण्यो हे, तो एय बी जायेल हे; एने बोगवान वितेल वातुह जाहार ताहार केरने।
दुनिया माय अन्याय
ओवतो मी दुनिया माय काय दिख्यो, काय नियावान जागा पोर खाराब काम ईथे, एने हाजा कामान जागा पोर बी खाराब काम ईथे। मी मोनाम केयो, “बोगवान हाजा एने खाराब माणहान दुयून नियाव केरी,” काहाकाय ता फाय एक एक वातीन एने एक एक कामान टेम हे। मी मोनाम केयो, “ज्य ज्यान केरता ईथे, काय बोगवान माणहाह पारखे काय ता देख सेके, काय ता जेनवेरान गेत हेते।” काहाकाय जोहली माणहान तोहलीच जेनवेरान बी देशा ईथे, दुयून तीस देशा ईथे, जीहे एक मोरेह तिहेच दिहरो बी मोरेह। आखान हांह एक हारकी हे, एने माणुह जेनवेराह रेन काय वोदार नाह; आखो कायच कामान नाह सोतो। आखा एकुस जागे जातेह, आखा माटड्या केरीन बुणेल हेते; एने आखा माटड्या माय पोशा मिलाय जातेह। काय माणहान जीव उपेर चिड़ेह, एने जेनवेरान जीव नेचो जायीन माटड्या माय मिलाय जाथे? ज्य कुण जाणेह? मी ज्य दिखेल हे, काय ज्याह रेन जादा काय हाजो नाह, काय माणुह तान कामा माय खुस रेय; काहाकाय तान ईसो ज्योस हे, काल्लो माणुह एगदान मोतीन बाद ताह पुशो लावीन त्यु वातुह देखाड़ सिकेह?
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.