Nahali Bible
दानिएल 7
दानिएल ने द्वारा होपनान वर्णन
(7:1; 12:13)
चार जेनवेरान बाराम दानिएल ने देरसेन
बाबेलान राजा बेलशस्सरान राज्यान पेल्ला वोरह्याम, दानिएल तान आथरोणा पोर लोट लोट्यो एक होपनो दिख्यो एने ता माय देरसेन दिख्यो। तेवी तो होपनान आर्थो लेखीन मिल्यो एने केयो। दानिएल केयो, “मी राती ज्य होपनो दिख्यो काय देरीया पोर कावदेन वारो चालने बाज गीयो। 1तेवी देरीयाम रेन चार मोट मोटला जेनवार बाहेर आवताला देखाना। जा एका दिहराह रेन आलेग एता। 2 पेल्लो जेनवार सिंहवागान गेत देखातालो एने तान फाके मोराग्यान गेत एता। एने मार देखता देखता तान फाकान फिसे लोचीन टाकाय गीया एने तो बुय पोर रेन विसीन, माणहान गेत पायान बोरहे उबरी गीयो; ज्या सिंहवागाह माणहान गेत दिमाग आपायेल एतो।”
उंजु मी एक जेनवार दिख्यो जो रिसड़ान गेत एतो, एने पासाणल्या दुयू पायान बोरहे उब रियेल इतो, एने तान मुयाम दातान विचीम तीन पाहल्यु एत्यु; एने माणहे ताह केया, “उठ जोलोक जुवे तोलोक माह खा।”
ज्यान पासाण मी दिख्यो काय खेड्यान गेत मार सामने एक उंजु जेनवार उब रिनोह। तान डिला पोर चिड़ान चार फाके एता; एने ता जेनवेरान चार मुंड एता; एने ताह राज केरनेन आदिकार आपेल एतो। 3
तान बाद, होपना माय राती मी दिख्यो काय मार सामने एक उंजु चोवथो जेनवार उबरिनोह। तो जुलूम बियावे ओहलो देखातालो एने जुलूम ताकेतवोर इतो, एने तान लोड़ान लांबाला दात एता; ज्यो जेनवार तान सिकारीह केच्या वालीन खाय टाकतालो, एने जो उगरी जातालो, ताह पाया केरीन केच्या वालतालो। ज्यो चोवथो जेनवार मी दिखेल आखा जेनवेराह रेन आलेग इतो; तान दोह हिंग एता। 4मी ता हिंगान बाराम विचार केरतालोन, ता हिंगाम उंजु एक हिंग उग आवो। ज्य हिंग जुलूम आत्यो एतो, ता हिंगा पोर माणहान डोलान गेत डोला एने मुय एतो। एने तो सोतान बोड़ाय केरतालो, ज्यो आतल्यो हिंग दिहरा तीन हिंग उखाल टाक्यो।
कायेम वोर रेणारान होपनो
“मार देखता देखता, तान जागा पोर राजगादि मेलाय गीयु, एने तो कायेम ने राजा राजगादि पोर बुठो; तान फाड़का बोर्फान गेत दोवल्या, एने मुंडीन लेट्या कापाहान गेत दोवल्या एता; तान राजगादि आक्ठो एती एने तान चाकारा आक्ठान गेत एता। 6 ता वेगाला कालान माणहान ओंगाण एक आक्ठान नेदी वोयताली; एजारो माणहे तान सेवा केरताला, लाखो माणहे तान सामने उबरियेल एता; ओवता नियाव केरनारे बोह गीया, एने पुस्तेक्यु उगाड़ाय गीयु।
“ता हिंगान मोठाय ने वातु होमलीन मी देखते रिनो एने मार देखते देखते तो चोवथो जेनवार माराय गीयो, एने तान सेरीर देदमीताला आक्ठाम टाकीन खेतेम केराय गीयो। दिहरा जेनवेरान ताकेत एने आदिकार ता फाय रेन सांडाड़ाय गीयो, पुण तान जीव थोड़ीक टेमीन केरता ताह पारवांगी आपानी।” 7
मी राती देरसेन माय ज्य दिख्यो काय मार सामने इखेह उबरिनोह, जो माणहान बेटाख ने गेत देखातालो। तो जुगाम वादला पोर आवणे बाजरियेल इतो, एने तो जुलूम वेगाला फाय आवो; एने ताह राजान सामने लावा। 8 तेवी ताह ओहलो आदिकार, बोड़ाय एने आखो राज केरनेन आदिकार होपानो; आखा माणहे, एने राज्या राज्यान माणहे एने बात बातीन बाषा बोलनारे आखा तान सेवा केरनारे एता; तान राज्य कायेम ने एतो, तान राज्य कायेम बोणीन रेय, तो केदी खेतेम नाय एय।
देरसेनान आर्थो
मी, दानिएल, जुलूम दुखी एने चिन्ताम इतो। ता देरसेन जा मी दिखेल इतो, तान वोजेसे मी गाबराय गीयो। तेवी जा मार आहने उबरियेल एता ता माय रेन एका फाय जायीन मी ताह ज्या आखान मतलब फुशो, “देरसेनान मतलब काय हे?” ओवतो तो माहु केयो, “ता चार मोटला जेनवारे, चार राजा हेते, ता चारू राजा देरती पोर रेन निकेलती। 9पुण बोगवानान चोखाला माणहे ता राज्याह सापड़ावती, एने कायेम तान आदिकारी बोणीन रेती।”
तेवी मारा मोनाम ज्यी आसा एनी काय ता चोवथा जेनवेरान मतलब बी जाण लेव, जो दिहरा तीनुह रेन आलेग एने जुलूम बियावे ओहलो इतो, एने तान दात लोड़ान एने नेखे पितलान एता; ज्यो तो जेनवार इतो, जो तान सिकारीह केच्या वालीन हासकेरीन खाय जायेल इतो, एने तान सिकारीह खाणेन बाद जो काय वोचेल एतो, ताह तो तान पाया बुंदे रोहदेल दियेल इतो। पोशो तान मुंडाम दोह हिंगान लिकाईल वातु, एने जा नोवाला हिंगान निकेलने माय तीन हिंग ओदरी गीया, मतलब जा हिंगान डोला एने मोटला बोल बोलनार मुय एने दिहरा हिंगाह रेन वोदार बिवाड़े ओहलो एतो, तान बी लिकाईल वातु जाणनेन मारी आसा एनी। 10
ओवतो मी दिख्यो काय, तो हिंग चोखाला माणहा हिऱ्यो लेड़ाने बाजरियेल इतो, एने ताह, ताह वोर आरेवते रिनो। जाह वोर जुलूम वेगालो माणुह नाह आवो, एने आखाम रेन मोटला बोगवानान चोखाला माणहे नियाव केरनारे नाह ठेराना, एने ता चोखाला माणहान राज्यान आदिकारी बोणनेन टेम आव नाह पोचनो।
तो केयो, “ता चोवथा जेनवेरान मतलब, देरती पोर आवणार चोवथो राज्य हे, तो दिहरा राज्याह रेन आलेग रेय, तो आखा देरती पोर वाला माणहान नास केरी, तो दुनियान आखा देसाह तान पायान बुंदे रोहंदेली एने तान टुकड़ा टुकड़ा केर देय। 11एने ता दोह हिंगान मतलब ज्य हे, काय ता चोवथा राज्यान दोह राजा हेते। न्या दोह राजा बाद उंजु एक राजा आवी, तान पेल राज केरनारे राजाह रेन आलेग रेय। तो तीन राजाह आरीव देय। 12ज्यो राजा आखाम रेन मोटला बोगवानान विरूद वातु केरी, एने बोगवानान चोखाला माणहाह दुख पोचाड़ी एने ताह मारी, पेल्ला कायदा एने तिवाराह बोदेलनेन कोसीत केरी। बोगवानान चोखाला माणहे साड़े तीन वोरह्या वोर ता राजान ताकेतीन ताबाम रेती। पुण जो काय एण्य हे, तान निर्णय कोरटो केरी, एने ता राजा फाय रेन तान ताकेत सांडाड़ाय जाय; एने तो नास केराय जाय। 13 राज एने राज, आखा जुगान नेचा देरतीन आखा राज्यान बोड़ाय, आखाम रेन मोटला बोगवानान चोखाला माणहास आपाय जाय। तान राज कायेमान राज रेय; देरतीन आखा राज केरनारे तान सेवा केरती, ता तान उकुमान पालेन केरती।”
“इहकेरीन तो होपनो निवरनो, मी दानिएल जुलूम बिय जायेल इतो, एने बियीन वोजेसे मारो मुय उतरी गीयो, मी ज्यु वातु दिखेल इतो एने होमलेल इतो, मी त्युन बाराम दिहरा माणहाह नाह केयो।”
Source notes (13)
- Cross-reference प्रकाशितवाक्य 13:1; 17:8
- Cross-reference प्रकाशितवाक्य 13:2
- Cross-reference प्रकाशितवाक्य 12:3; 13:1
- Cross-reference प्रकाशितवाक्य 13:5-6
- Cross-reference प्रकाशितवाक्य 20:4; 1:14
- Cross-reference प्रकाशितवाक्य 5:11; 20:12
- Cross-reference मत्ती 24:30; 26:64; मरकुस 13:26; 14:62; लुका 21:27; प्रकाशितवाक्य 1:7-13; 14:14
- Cross-reference प्रकाशितवाक्य 11:15
- Cross-reference प्रकाशितवाक्य 22:5
- Cross-reference प्रकाशितवाक्य 13:7
- Cross-reference प्रकाशितवाक्य 17:12
- Cross-reference प्रकाशितवाक्य 12:14; 13:5-6
- Cross-reference प्रकाशितवाक्य 20:4; 22:5
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.