Nahali Bible
दानिएल 12
सेवल्यो टेम
तुलेचबुखे देरसेन वालो माणुह केयो, “एय दानिएल, तुलबुखे मिखाएल नावान एक मुखी हेरोगदुत उब रेय, मिखाएल तुमरा यहुदी माणहान राखवाल्यो हे; ओवतो जुलूम तेकलीतान टेम आवी, देरती पोर देस बोणेल तुलबूखीन ओहलो टेम केदी आवो निह, पुण दानिएल, तुलबुखे तारा माणहाम रेन जान नाव बोगवानान पुस्तेक माय लिखेल हेते, ता आखा वोच जाती। देरतीन जुलूम होवटा माणहे जा मोर जायेल हेते एने जाह बुज दियेल हेते, पोशा जीव जाती; एने ताम रेन थोड़ाक जेलेमक्यी जीवाय जीवणेन केरता जीव उठती, पुण थोड़ाक ज्यानकेरता जीव उठती काय कायेम ने लाज एने खाराब ठेराणेन केरता। सोमेजदार माणहे जुगावाला उजेड़ान गेत चोमेकती, जा सोमेजदार माणहे दिहराह हाजाली जीवायीन वाट देखाड़ेल एता; ता कायेम ने केरता तारान गेत चोमेकती।” 2
पुण एय दानिएल! तु ज्या पुस्तेक पोर साप लागाड़ीन ज्या वचनाह सेवल्या टेमान बुखेत वोर लिकाड़ीन मेल। जुलूम माणहे न्या पोला खेरली बुद्दीन होद केरती, एने बुद्दी जुलूम वोड़ जाय।
ओवतो मी दानिएलाह, दुय दिहरा माणहे देखाना, ताम रेन एक नेदीन दिड़े मार हिऱ्यो उबरियेल इतो, एने दिहरो माणुह नेदीन ती दिड़े उबरियेल इतो। तेवी जो हेरोगदुत जो हुवाल्ला फाड़का पिरेल नेदीन पाण्या पोर उबरियेल इतो, ता दुयाम रेन एक जाण ताह फुशो, “ज्यु बोंगलाय ओहल्यु वातु खेरी एणेन कोलोक टेम लागी?” 3
तेवी जो हेरोगदुत हुवाल्ला फाड़का पिरेल नेदीन पाण्या पोर उबरियेल इतो, तो तान जीवड्यो एने डाखऱ्यो दुयू आथ हेरगान उगे उचा केरीन, कायेम जीवतालो रेणार बोगवानान सुगोण खाएन केयो, “ज्यी देशा साड़े तीन वोरह्या वोर रेय; एने जेवी चोखाला माणहान ताकेत कोम ईती ईती निवरी जाय, तेवी ज्यु आख्यु वातु पुऱ्यू एती।”
ज्यी वात मी होमलेल ते इतो, पुण माहु तान मतलब नाह सोमेजनो। तेवी मी फुशो, “एय मारा मालीक, ज्यु सेवल्या दिह्याम काय एय?”
तो केयो, “एय दानिएल, तु तारा जीवणान उगे द्यान दे; ज्यु वातु आठावे हेत्यु एने जाह वोर सेवल्यो टेम नाय आवी, ज्यु वातु सिक्को लागाड़ीन बोंद किरेल हे। जुलूम माणहे चोखा केराय जाती, ता माणहे खुद सोताह चोखा केरती पुण खाराब माणहे, खाराबुस बोणीन रेती एने ता खाराब माणहे ज्यु वातुह नाय सोमेजती; पुण सोमेजदार आखो सोमजी।
“जेवीह रेन कायेम ने बोली केरने बोंद एय जाय, तेवीह रेन एवी वोर, बियावे ओहल्यु नास केरनार वातु एता वोर, टेम बारा होव नोव्वद दिह्यान रेय। जो वाट जोवी, एने तेरा होव पोस्तीस दिह्यान सेवेट वोर पोची, तो जुलूम सुखी रेय।
“एय दानिएल, जा, एने आखरी वोर तार जीवाय जीव, तुवाह आराम जुड़ी; एने आखरी तु मुरेल माणहाम रेन जीव उठहे एने तुवाह तारो ईसो जुड़ी।”
Source notes (3)
- Cross-reference निर्गमन 12:1; मत्ती 24:21; मरकुस 13:19; यहुदा 1:9; प्रकाशितवाक्य 7:14; 12:7
- Cross-reference प्रकाशितवाक्य 22:10
- Cross-reference प्रकाशितवाक्य 10:5; 12:14
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.