Nahali Bible
दानिएल 1
दानिएल एने तान दोस्ती
(1:1; 6:28)
चार जुवान नबुकदनेस्सरान राज वाड़ाम
यहुदान राजा यहोयाकीम ने राज्यान तीसरा वोरह्या माय बाबेलान राजा नबुकदनेस्सर यरूशलेम पोर चेड़ाय केरीन ताह कोंड लिदो। 2 तेवी बोगवान यहुदान राजा यहोयाकीमाह होप दिनो। नबुकदनेस्सर तान देवतान मोंदिर माय रेन ठामला एने दिहरा सामानाह बी तान आथाम केर लिदो; एने तो ता सामानाह शिनार देसाम ली जायीन, तान देवतान मोंदिर माय मेल दिनो।
तेवी नबुकदनेस्सर राजा तान मुखी खोजाह अशपनजाह उकुम आप्यो। जावो एने इस्राएलान मुखी गेराणाम रेन एने इस्राएल राजान कुटूमान थोड़ाक यहुदी एदम्याह लियावो। जा निर्दोस, देखाणेम हाजा एने हट्टा कट्ठा एने आखी बातीन इकेल माय सोमेजदार, एने इकेल माय निपुण एने एकलीदार एने राजवाड़ाम उब रेणेन लायेक एय; एने ताह कसदी माणहान बाषा लेखणे वाचणेन हिकवोण आपी। एने राजा उकुम आप्यो काय तान खाणो एने पिणेन अंगुरान माणला रूहा माय रेन ताह दाड़ीन खाणे पिणेन आपी। इहकेरीन तीन वोरीह वोर तान पालेन पोषण ईती रेय; तेवी तान बाद ता राजान सामने लियावो। ताम रेन यहुदान कुटूमाम दानिएल, हनन्याह, मीशाएल, एने अजर्या नावान यहुदी एता। एने मुखी खोजा अशपनज तान दिहरा नावे मिल्यो; मतलब दानिएल ने नाव तो बेलतशस्सर, हनन्याहान शद्रक, मीशाएल ने मेशेक, एने अजर्यान नाव अबेदनगो मेल्यो।
पुण दानिएल तान मोनाम ठाण लिदो काय तो राजान खाणो खाएन एने अंगुरान रूह पियेन सोताह एठो नाय एणे देय; केरीन तो सोताह एठो एणे से वोचाड़णेन केरता मुखी अशपनजाह विन्ती किऱ्यो। बोगवान मुखी अशपनजाह ओहलो बाणाव दिनो काय तो दानिएल ने केरता गीण एने देया बोर दिनो। पुण मुखी अशपनज दानिएलाह केयो, “मी मारा मालीक, राजाह बिथो, काहाकाय तुमरो खाणो पिणो तोस ठेरायेल हे, केदी तु ज्या खाणाह नाह खात, ताहार तु तारा वोयावाला दिहरा जुवानाह रेन कोमजोर एने दुखाऱ्यो देखाणे बाज जाहे। जेवी राजा तुमरो मुय उतरेल देखी, ताहार मार पोर राग केरी एने मारो मुंड उड़ाव देय।”
तेवी मुखी खोजा अशपनज दानिएल, हनन्याह, मीशाएल एने अजर्यान उपेर देखरेत केरनेन केरता निवाड़ेल इतो। दानिएल ताह केयो, “मी तुवाह विन्ता केरथु काय तु दोह दिह वोर तार पावराह पारेख, एने खाणेन फोक्तो बाजी पालो एने पिणेन केरता पाणी आप। उवतो दोह दिह्यान पासाण आमरा मुय एने जा जुवान राजान खाणो खातेह, तान मुयाह देख; एने जोहलो तुवाह देखाय, तिहेच केरीन तारा सेवका हिऱ्यो वेवार किरज्ये।”
तेवी तो देखरेत केरनार ज्यी विन्ती मान लिदो, एने दोह दिह वोर ताह पारेखते रिनो। दोह दिह्यान बाद, तान मुय राजान खाणो खाणारे आखा जुवानाह रेन जुलूम हाजा, एने माताला देखाणे बाज गीया। तेवी खाणान व्यवस्था केरनार मुखी, ताह राजान तो खास खाणो एने अंगुरान रूह आपणे बोंद केर दिनो, एने ताह खाणान जागा पोर बाजी पालान बाजी आपते रिनो।
एने बोगवान ता चार जुवानाह बात बातीन लेखणे वाचणेन एने आखी बातीन विद्या सोमेजणेन केरता इकेल, एने चेतराय आप्यो। एने दानिएल ते आखी बातीन देरसेन, एने होपनान बी मतलब सोमेजणे बाज गीयो।
राजा नबुकदनेस्सर ज्यो उकुम आपेल इतो काय इस्राएली जाती माय रेन आखा जुवान तीन वोरह्यान पासाण तान ओंगाण राजवाड़ा माय उब राखाड़ाय जाय। जेवी ज्यो टेम पुरो एनो, तेवी मुखी अशपनज ताह राजवाड़ाम ली गीयो। तो ताह राजान सामने उबो किऱ्यो। राजा ता हिऱ्यो वातु केरने बाज गीयो, एने दानिएल, हनन्याह, मीशाएल एने अजर्या ज्या चारूम रेन ओलोक कुण बी एकलीदार नाह एतो। केरीन ता चारू जुवानाह राजान सेवक बोणनेन केरता निवाड्यो। जेवी केदी राजा इकेल एने सोमेज ने बाराम ताह एगदो सावाल फुसतालो, तेवी राजाह तान जापाप होमलीन ज्य अनुबव एतालो काय ता चारू तान राज्यान आखा बोड़वा एने एकलीदार माणहाह रेन दोह गुणा उशार हेते। एने दानिएल बाबिलोन ने राजवाड़ाम, राजा कुस्रु राजान कालान पेल्ले वोरीह वोर रिनो।
Source notes (2)
- Cross-reference 2 राजा 24:1; 2 इतिहास 36:5-7
- Cross-reference 2 राजा 20:17-18; 24:10-16; 2 इतिहास 36:10; यशाया 39:7-8
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.