Nahali Bible
कुलीसियो 2
मी होदथु काय तुमूह ज्यी वातीन मालुम पोड़ जाय काय, मी तुमरी केरता एने लोदिकिया माणहा माय रेणारान केरता, एने ता आखान केरता जा व्यक्तिगत रूप माय नाह मीलेल सोता, ता आखान केरता मी कोलोक केठीण मेहनेत केरथु। 1काहाकाय तान मोनाह उत्साह जुड़ी एने ता मोंगा माय एक एय जाय, एने तो पुरो देन जो खेरला सोमेज केरीन सापड़ेह ताह जुड़ जाय। इहकेरीन ताह आबोख बोगवानान बेदान मालुम पोड़ जाय, जो मसी खुद हे। जा माय बोगवानान बुद्दीन एकलीन कुचीन बण्डार लिकायेल हे। ज्यो मी ज्यानकेरता केथु, काय काल्लो बी माणुह हाजाला सोबाव केरीन तुमूह दुको नाय देय। काहाकाय मी तुमूह रेन सेरीरा माय सिटो हे, पुण जीवाम तुमरी आहने हे, एने तुमरा हास केरीन जीवायीह एने तुमरा बोरहान, जो मसी माय हे, मोजबुत देखीन खुस एथु।
मसी माय जीवायीन बोरपुरी
तानकेरता जिहकेरीन तुमू मसी यीशुह मालीक हे केरीन मान लेदाह, तिहेच केरीन तास माय एक बोणीन जीवो। एने तास माय मुले गाड़ीन वोदते जावो, एने जिहकेरीन तुमू हिकेल हेते, तिहेच केरीन बोरहाम मोजबुत एते जावो, एने जुलूम काय जुलूम दन्यवाद किरते रिवो।
चेकचेल्या रिवो, काय कुण बी तुमूह ता माणहान एकलीन फालतुक वातु केरीन दुको नाय देय एने गुलाम नाय बाणाव लेय, जा माणहान रिती एने दुनियान पेल्ली हिकवोणान गेत हे, पुण मसीन गेत नाह। काहाकाय ता माय बोगवानान सोबाव जेलेम मसीन सेरीर माय वोहेह। एने तुमूह मसीन एकता माय पुरी जीवाय आपेल हे। ता माय बोरपुर एय जायेल हेते जो आखी प्रदानता एने आदिकारान मुखी हे। मसीन एकता माय तुमरो खेतान केरायेल एतो नाह काय माणहान द्वारा केराय जाणार खेतना हेऱ्यो, पुण जो आथा केरीन नाह एत, पुण मसीन खेतान एनो, जाकेरीन सारिरीक सेरीर उताराय जाथे। 2जेवी तुमू बपतीस्मा लियेल एता ते तुमूह मसी हेऱ्या बुजाय जायेल एता, एने ताच माय बोगवानान ताकेती पोर बुरहो केरीन, जो ताह मुरेल माय रेन जीवाड्यो, ता हेऱ्या जीव बी उठना। 3एक टेम तुमू बी आत्मिकता माय मुरेल एता काहाकाय तुमू पापी, एने बिगेर यहुदि बिगेर नेमान एता। पुण एवी बोगवान तुमूह मसी हेऱ्यो जीवाय माय लायेल हे। बोगवान आपणा आखा पापान माफ किरेल हे। 4बोगवान आपणा खाराब कामान लेखाह आपणे विचीम रेन सेटो केर दिनो, जा माय ता नेमान उल्लेख केरायेल एतो, जो आपणे विरोद एतो तो ताह खुरूसखाम पोर खीला केरीन ठोकाएन मीटाड़ दियेल हे। 5मसी खुरूसखामान द्वारा आद्यात्मिक आदिकारी एने तो मुखी एने आदिकारीह तान उपेर रेन उतारीन तान उदाह तामाशो बाणायो एने तान जिकेल अबियान माय खुरूसखामान वोजेसे ता पोर जय जयकारान दुन होमलाड्यो। 6
तानकेरता काल्लो बी माणुह तुमरा खाणा पिणान नाहते नोवाला चांदान तिवार एने विहेवणेन दिह्यान बाराम तुमरो कुण नियाव नाय केरी। काहाकाय ज्यु सोब आवणारी बविष्यान वातीन सावलो हे, पुण खेराय मसी मायच जुड़ी। काल्ला बी माणहान द्वारा तान चिहटा एणेन पारवांगी नाय आपी, जीवा माय गेरबोड़ो एने हेरोगदुतान पुजा केरावीन तुमूह दोवेड़नेन फोला हेऱ्या रेन सेटा नाय केरी। ओहलो माणुह दिखेल वातु माय लाग रीथे एने तान सारिरीक सोमेज माय वायबार मोठाय किरेह। 7एने मसीह देरीन रेणे सोड़ दियेल हेते, एने तो मसी जो सेरीरान मुंड हे। मसीन ताबाम आखो सेरीर हे जो जोड़ा एने नेहा केरीन एकठोस जोड़ायेल हे, एने बोगवान जीहे वोदाड़ ने हुदेह तिहेच केरीन वोदते जाथे।
मसी हेऱ्या जीवणे एने मोरने
काहाकाय तुमू मसीह हेऱ्या मोर जायेल हेते एने ब्रमांड माय राज केरनारी जीवाह रेन सोड़वेल हेते। ओवता काहा तान गेत जा दुनियाम जीवाय जीवतेह एने तुमू ओहली विदीन ताबाम काहा रेतेह। काय “ज्यो नाह आथेलनु, एने ताह नाह साकणु, एने ताह आथ नाह लागाड़नु।” काहाकाय ज्यु आख्यु चिज कामे लागाड़ता लागाड़ता खेतेम एय जाती, काहाकाय ज्यु माणहान उकुमान एने हिकवोणान गेत हे। खेरीच ओहला सोब नेम हेरोगदुतान ताकेती हेऱ्या ज्या नेमा माय आपणी मोरजीन गेत हेरोगदुतान बोक्तीन रिती, एने जीवान गेरबोड़ाय, सारिरीक सराव ने बाव से एकलीन नाव ते हे, पुण सारिरीक लालचायीह रोकणे माय न्या फाय रेन काय फायदो नाह।
Source notes (7)
- Footnote बोगवानान लिकायेल वातु, जो खुद मसी हे; थोड़ाक लेख माय बोगवानान लिकायेल वात; दिहरा थोड़ाक लेख माय जो मालीक ने आबोख ता बोगवानान लिकायेल वातु; दिहरा थोड़ाक लेख माय बोगवान एने आबोख ज्यान, एने मसीन लिकायेल वात।
- Cross-reference रोमीयो 6:4
- Cross-reference इफिसीयो 2:1-5
- Cross-reference इफिसीयो 2:15
- Footnote मसी खुद आत्मिक आदिकारी एने आदिकारीन ताकेत से सोड़वेल; नाहते मसी खुद आत्मिक आदिकारी एने आदिकारी तान ताकेत निकाल लिदो।
- Cross-reference रोमीयो 14:1-6
- Cross-reference इफिसीयो 4:16
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.