Nahali Bible
अमोस 5
पासतावान पुकार
एय इस्राएल ने गेराणा, ज्या विखान गीतान बोल होमलो; जो मी तुमरे बाराम केथु।
“इस्राएल देस एक कुवारली सोरी हे, जी पोड़ गियी,
ती पोशी केदी नाय उठी;
ती तीस ने बुय पोर आसटाय जायेल हे,
तीह उठाड़नार कुण नाह सोतो।”
काहाकाय बोगवान इस्राएलीह इह केरीन किथे, “जा हेयराम रेन एजार निकल्या, केदी जा गावाम रेन एजार निकेलतेह, ता माय रेन एकुस होव वोचती, केदी एक होव लिन निकली, ता माय रेन दोहुस वोचती।”
बोगवान इस्राएल ने गेराणाह इह केरीन किथे, “माहु हुदो, तेवी तुमू जीवताला रिहो। पुण तुमू बेतेल ने वेदीह मा हुदो, एने गीलगाल माय मा जावो; एने एद्यी उणखीन बेर्शेबा माय मा जावो; काहाकाय गीलगालान माणहाह गुलामी बाणावीन ली जाती, एने बेतेल उजाड़ बोणी।”
बोगवानाह हुदो, तेवी तुमू जीवताला रिहो; नाह ते तो युसूफ ने गेराणा पोर आक्ठान गेत बोड़की, एने आक्ठो तुमूह हेलगाड़ देय, एने बेतेल माय ताह ओलाड़णार कुण नाय रेय। एय नियावाह कड़वाहट माय बोदेलनारे, एने खेरायीह माटड्याम मिलावणारे माणहे!
जो कचपचिया एने मुगशिराह बाणावणार हे,
जो मोतीन सावलाह उठ्यान ने उजालाम बोदलेह;
जो दिह्याह आंदारो केरीन रात बाणाव दिथे,
जो देरीयान पाण्याह वाफाम बोदलेह
एने देरती पोर पाणी पाड़ेह,
तान नाव बोगवान हे।
तो चालोच ताकेतवालाह नास केर दिथे, एने तान किल्लाह बी नास केर दिथे।
जो माणुह नियाव कोरटाम खेराय से नियाव किरेह, ता से तुमू दुसमोनाय मेलतेह; एने जो खेरी बुलेह, ताह नफरत केरतेह। तुमू गेरब्याह चेंदतेह, एने बेट हे केरीन तान एना पोर फालो लागाड़तेह; केरीन जो गेर तुमू गिड़ेल देगड़ान बाणायेल हेते, पुण तुमू ता गेराम रेय नाय सिकहो; एने तुमू अंगुर ने वाड़ी लागाड़ेल हेते, पुण तुमू तान अंगुरान रूह पिय नाय सिकहो। मी जाणथो काय तुमू कोलाक गुना किरेल हेते, एने तुमू खेरीच जुलूम खाराब काम किरेल हेते; तुमू हाजा काम केरनारे माणहाह दुख देतेह एने ता फाय गुस लेतेह, एने कोरटाम गेरब्यान नियाव बिगाड़तेह। केरीन एकलीदार माणुह ओहला टेमा माय ठावको रेय, काहाकाय टेम खाराब हे!
एय माणहे, बुरायीह नाह, पुण बोलायीह हुदो! तेवी तुमू जीवताला रिहो; सेनान यहोवा बोगवान खेरीच तुमरी हिऱ्योच रेय, जीह केरीन तुमू केतेह। बुरायी हेऱ्या दुसमोनाय मिलो, पुण बोलायीह मोंग किरो, कोरटाम नियावाह स्थिर किरो; तेवी एय सेकी सेनान यहोवा बोगवान तुमू युसूफान वोचेल वोची पोर किव केरी।
सेनान यहोवा बोगवान इह केरीन किथे, “आख्यु चोवफुली पोर रेड़नो रेय; एने आख्यु गेल्ली माय हाय हाय केरती! ता बाड़ा पोर किरसाणाह दुख माणावणेन केरता एने जा माणहे दुख मोणावणे माय चेतुर हेते, ताह रेड़नेन हादती।”
अंगुर ने वाड़ी माय माणहे रेड़ती रेती, काहाकाय मी तुमरी विचीम लागतो जाह। इह केरीन बोगवान किथे।
तुमरी पोर हाय हे, जा बोगवानान दिह्यान इच्छा मेलतेह, तुमूह बोगवानान दिह काहा जुवे? मालीकान दिह उजालान नाह, आंदारान दिह हे।
जीहे इखेह सिंहवागान सामने रेन इखेह नाही एने ताह रिसड़ो मिलाय, नाहते जेवी तो गेराम रिगी, एने बितड़ा पोर तान आथ टेकाड़ी ते गेयड़ेक ताह चाव देय। काय ज्य खेरी नाह सोतो, काय बोगवानान दिह उजालान नाह, पुण आंदारलाच ने रेय? होव, ओहलो जुलूम आंदारान जा माय जाराक बी उजालो नाय रेय। 1
“मी तुमरा तिवाराह दुसमोनाय मेलथु, माहु तो पोटेत नाह; एने तुमरा मोटला पोंचा केरीन मी खुस नाह। तुमू मार केरता होमबोली एने दानबोली चेड़ावतेह, पुण मी तीह स्वीकार नाय केरू; एने तुमरा पालेल माताला जेनवारान मेल मिलाप बोलीन उगे देखु बी नाय। माहु तुमरो गीत मा होमलाड़ो, ताह मार हेऱ्या रेन सेटा मिलो; मी तुमरा रेणथान आवाज नाय होमलु। पुण नियावाह नेदीन गेत, एने खेरायीह कायेम वोयण्या खोदरान गेत वोयणे दिवो।
“एय इस्राएल ने गेराणा, काय तुमरा डायडाया चालीह वोरह्या वोर सुनसान जागा माय जेनवारान बोली एने दानबोली चेड़ायेल एता? तुमू ते तुमरा राजान तोम्बु, एने तुमऱ्यु मुरत्युन पाटलो; एने तुमरा देवतान तारो लेन फिरते रेना। केरीन मी तुमूह दमिश्क ने ती पार बोंदी माय केर देह, सेनान यहोवा बोगवानान ज्योस वचन हे।
Source notes (1)
- Cross-reference यशाया 1:11-14
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.