Nahali Bible
प्रेरितान काम 12
होवटी तेकलीत
ती टेम हेरोद राजा मोंडलीन थोड़ाक मेहमेराह सेतावणेन सुरवात किऱ्यो। तो योहानान बाहख याकुबाह तालवार केरीन माराव टाक्यो। जेवी हेरोद दिख्यो काय यहुदि माणहे इहकेरीन खुस एतेह, ते तो पतरसाह बी देर लिदो। एने ता दिह बिगेर खमीर रोटान तिवारान दिह एता। एने तो पतरसाह देरीन जेली माय टाक दिनो, एने राखवाली केरनेन केरता चार चार सिपायड़ान चार टोला बाणावीन मिल्यो, ज्यी विचार से काय फसहान पासाण पतरसाह माणहान सामने लावे। जेली माय पतरस कोंडायेल ईतो, पुण मोंडलीन माणहे तान केरता एक एयीन बोगवानाह विन्ता केरताला।
पतरसान जेली माय रेन सुटणो
एने जेवी हेरोद पतरसाह माणहान सामने लावण्यो ईतो, तीस राती पतरस दुय हाकुल केरीन बांदायेल दुय सिपायड़ान विची माय हुवतालो। एने देखरेत केरनारे बायणान सामने जेलीन राखवाली केरताला। ते दिखो, मालीकान एक हेरोगदुत पतरसा हिऱ्यो आवीन उबरी गीयो, एने खोलीम उजेड़ चोमेकनो, एने तो पतरसान पाहली पोर आथ ठोकीन ताह जागाड्यो एने केयो, “उठ, उतवाल केर!” एने पतरसान आथाम रेन हाकुल निकलीन जाय पोड़नी। तेवी हेरोगदुत पतरसाह केयो, “कोमेर बांद एने तारा खाहड़ा पायाम पिर ले।” तो तिहेच किऱ्यो। पोशो तो केयो, “तु तारा फाड़का पेरीन मार पासाण आव।” पतरस जेलीम रेन निकलीन तान पासाण बाहेर आवो, पुण ज्यो नाह जाणतालो काय जो काय हेरोगदुत केरने बाजरिनोह तो खेरी हे, पुण ज्यो सोमज्यो काय मी देरसेन देखणे बाजरिनोह। एने जेवी ता पेल्लो एने दिहरो पाहरे रेन निकलीन लोड़ान ता फाटेक पोर आवा, जो हेयरान निही जाथे, ते फाटेक तान केरता आप आप उगेड़ गीयो। एने ता बाहेर निकलीन एक गेली माय रेन जाणे बाजरियेल एता, तेवी चालोच हेरोगदुत पतरसाह सोड़ीन जात रिनो।
तेवी पतरस बोंगलायीन केयो, “एवी मी खेरीच जाण जायेल हे काय मालीक तान हेरोगदुत मोकलीन माहु हेरोद राजान ताकेत माय रेन, एने यहुदि माणहे जो बी होदताला, तान आसा से सोड़ीव लिदो।”
जेवी पतरसाह ज्यी वात सोमेज माय आव गियी, तेवी पतरस योहानान आहख मरीयम ने गेर आवो, जो मरकुस बी केवाथे, ताहरी जुलूम माणहे एकठा टोलवाएन विन्ता केरने बाजरियेल एता। जेवी पतरस बाहेर ने बायणान केड़ीह ठोक्यो, ते रूदा नावान एक पावेरनी बायणो उगाड़नेन केरता आवी। एने ती पतरसान आवाज ओलखी लेदी, पुण तीह जुलूम खुसी लागनी केरीन बायणो नाह उगाड़ी, एने माय दोवेड़ते जाईन ती केयी काय पतरस बायणा हिऱ्यो उबरिनोह। ता तीह केया, “तु गांडी हे।” पुण ती ईमोत केरीन केयी काय इहीचकेरीन केरीन हे। तेवी ता केया, “तान हेरोगदुत एय।”
पुण पतरस ठोकतेस रिनो एने जेवी ता बायणो उगाड्या, ते ताह देखीन बोंगलाय गीया। तेवी पतरस ताह आथा केरीन ईसारो किऱ्यो काय ठावका रिवो, एने ताह केयो काय मालीक किहकेरीन माहु जेलीम रेन बाहेर निकलील। एने पोशो पतरस ताह केयो, “याकुब एने बायाख ज्यी आखी वात केय दिज्यो।” तेवी तो गेराम रेन निकलीन दिहरे जागे जात रिनो।
ज्यो वेगोच एनो, सिपाया माय मोटली उकात उड़नी काय पतरस गीयो ते का गीयो? जेवी हेरोदेस राजा पतरसाह होदणेन आदेस आप्यो, एने नाह ताह सापेड़नो। तानकेरता तो देखरेत केरनारान चोकसी केरीन ताह मार टाकणेन उकुम आप्यो।
एने तो यहुदियाह सोड़ीन केसरीया माय जाईन थोड़ाक दिह वोर रिनो।
हेरोदेसान मोरनो
हेरोद राजा सुर एने सेदान माणहा हिऱ्यो जुलूम ना खुस ईतो। तानकेरता ता एकी केरीन ता फाय आवा, एने बलास्तुसाह जो राजान किल्लान मुखी ईतो, पोटाड़ीन बेचकेणे होद्या काय तान मोदेक केरी, एने राजा फाय जाईन सान्तीन मेल केरी। काहाकाय राजान देसाम रेन तान देसाह खाणेन वोस्तु आपाय जाताली।
ठेरायेल दिह हेरोद राजान फाड़का पेरीन राजगादि पोर बुठो, एने टोलवायेल माणहान ओंगाण बासेण देणे बाज गीयो। तेवी माणहे आयड़ी उठना, “ज्यो ते माणहान नाह, पुण बोगवानान आवाज हे।” पुण तुलेचबूखी मालीकान एक हेरोगदुत हेरोदेस राजाह दिनो, काहाकाय तो बोगवानान बोड़ाय नाह किऱ्यो। एने तान सेरीर माय किड़ा पोड़ीन ताह खाणे बाज गीया, एने तो मोर गीयो।
पुण बोगवानान वचन वोदते एने पोसेरते गीयो। 2
जेवी बरनबास एने शाऊल यरूशलेम माय तान सेवा पुरी केरीन अन्ताकिया माय पोशा वोलीन योहान जो मरकुस केवाथे लेन आवा।
Source notes (2)
- Footnote हेरोदेस राजा, अग्रीपा; आखा फलिस्तीन देसान आदिकारी।
- Footnote रेन; थोड़ाक लेख माय ने
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.