Nahali Bible
प्रेरितान काम 10
पतरस एने कुरनेलीयुस
केसरीया गावा माय कुरनेलीयुस नावान एक माणुह एतो, “जो इटालीयन नावान सिपाय टोलान आदिकारी ईतो।” तो बोगवानाह बिणार बोक्त माणुह ईतो; तो एने तान आखा गेराणान माणहे बोगवानान बोक्ती केरताला। एने यहुदि माणहाह जुलूम दान आपतालो, एने लागातार बोगवानाह विन्ता केरतालो। तो दिह्या तीन वाचता हास केरीन देरसेन माय दिख्यो, काय बोगवानान एक हेरोगदुत ता फाय माय आवीन केयो, “एय कुरनेलीयुस!”
कुरनेलीयुस हेरोगदुताह हास केरीन दिख्यो, एने बियीन केयो, “एय मालीक काय हे?”
हेरोगदुत ताह जापाप आप्यो, “तारी विन्ता एने दान देरेम तुवाह जापाप आपणेन केरता बोगवानान सामने पुचील हे। एने एवी याफा हेयरा माय माणहाह मोकलीन शमोनाह, जो पतरस केवाथे, ताह हादाड़ ले। तो चामड़ान दोन्दो केरनार शमोन फाय पावणो हे, तान गेर देरीयान दिड़े हे।” जेवी हेरोगदुत ता हिऱ्यो वातु केरीन जात रिनो, तेवी तो तान दुय चाकऱ्या जा तान आरही रेया केरताला, ताम रेन एक सिपायाह हाद्यो। एने ताह ज्यु सोब वातु केयीन याफा माय मुकल्यो।
दिहरे दिह जेवी ता चालते चालतेन याफा हेयरान आहने पोचना, तेवी पतरस बारा वाचता विन्ता केरनेन केरता गेरान साजा पोर चेड़नो। तुलबूखे पतरसाह बुख लागी एने तो काह खाणे होदतालो; पुण जेवी खाणो बोणने बाजरियेल एतो, तेवी पतरसाह देरसेन जुड़नो। तेवी पतरस दिख्यो काय जुग उगड़ी गीयो, एने एक चादरो मोटला ठामलान गेत चार कोपराम लेटकेल देरतीन उगे उतेरने बाजरिनोह। ता माय देरती पोर वाला आखी बातीन चार पायावाला जेनवारे, एने लोलनारे जेन्तु, एने जुगाम उड़नारे चीड़ा एता। एने ताह एक ओहलो आवाज होमलानो, “एय पतरस उठ; एने मारीन खा!”
पुण पतरस केयो, “नाह मालीक! केदिस नाह, काहाकाय मी केदी बी एगदी एठी एने खाराब चिज नाह खाईल सोतो।”
पोशो दिहरी वारीन पतरसाह आवाज होमलानो, “जाह बोगवान चोखो ठेरायेल हे, ताह तु एठो मा मानहे।” ओहलो तीन वार वोर एनो, तेवी चालोच तो चादरो जुगाम विसाय गीयो।
जेवी पतरस देरसेन दिख्यो तान बाराम आपणा मोनाम विचार केरने बाजरियेल ईतो काय ज्यान मतलब काय एय सिकेह, तेवी ता माणहे जाह कुरनेलीयुस मोकलेल एतो, शमोनान गेरान पुतो लागाड़ीन बायणा पोर आवीन उबरी गीया। एने आयड़ीन फुशा, “शमोन पतरस केतेह तो न्या पावणो ईतो, तो हे काय?” 1
पतरस ता देरसेनान बाराम विचार केरतालो तेवी चोखालो जीव ताह केयो, “देख, तीन माणहे तुवाह होदतेह। उठीन बुंदे उतेर, एने बिंदास ता हिऱ्यो जातरे, काहाकाय मीच ताह मोकलेल हे।” तेवी पतरस बुंदे उतरीन ता माणहाह केयो, “दिखो, जाह तुमू होदणे बाजरेनाह, तो मीच हे, तुमू न्या काय कामे आवाह?”
ता केया, “कुरनेलीयुस आदिकारी आमुह मोकलेल हे, जो देरमी एने बोगवानान बोक्ती केरनार माणुह हे, एने आखा यहुदि माणहाम रेन एने बोगवानान हेरोगदुता से खुबेर सापड़ायेल हे, काय तुवाह गेर हादिन ज्यी खुबेर होमले।” तेवी पतरस ताह गेरा माय हादिन पावणाय किऱ्यो।
एने दिहरे दिह पतरस ता हिऱ्यो गीयो; एने याफा हेयरावाला बायाख माय रेन थोड़ाक विश्वासी ता हेऱ्या गीया।
दिहरे दिह ता केसरीया माय पोचना, तेवी कुरनेलीयुस एने तान गेरल्या, एने तान आहेंल्या हाती टोलवाएन तान वाट जोवणे बाजरियेल एता। जेवी पतरस गेरा माय आवणे बाजरियेल ईतो, तेवी कुरनेलीयुस तान हुम्बो गीयो, एने पतरसान पाया पोड़ीन ताह वोंद्यो। पुण पतरस ताह उठाड़ीन केयो, “उबरी, मी बी ते माणुहच हे।” ओवतो पतरस कुरनेलीयुस हिऱ्यो वातु केरती लेन गेरा माय गीयो, एने पतरस जुलूम होवटा माणहाह टोलवायेल वाट जोवताला देखीन, ताह केयो, “तुमू जाणतेह काय बिगेर यहुदि माणहा हेऱ्या ओलखात मेलने, एने ता फाय जाणे यहुदि माणहान केरता पाप हे। पुण बोगवान माहु कियेल हे काय काल्ला बी माणहाह एठो एने खाराब मा किहे। केरीन माहु हादाड़ता बाराबोर मी कायच नाह फुसता, एने मी न्या आव लागो, एवी मी फुसथो काय माहु काय कामे हादाड्या?” 2
तेवी कुरनेलीयुस ताह केयो, “आज रेन तीन दिह्यान पेल, मी मार गेर हिराणान तीन वाचता विन्ता केरने बाजरियेल ईतो, तेवी चोमेकण्या फाड़का पिरील एक माणुह मार सामने आवीन उबरेय गीयो। एने माहु केयो, ‘एय कुरनेलीयुस! तारी विन्ता बोगवान होमेल लियेल हे, एने तु जो गेरब्याह दान देरेम किरेल तो एर केराय जायेल हे। तानकेरता याफा माय कुणीह बी मोकलीन शमोन जाह पतरस केतेह ताह हादिन लाव तो देरीयान दिड़े चामड़ान दोन्दो केरनार शिमोन चामारान गेर पावणो हे।’ तेवी चालोच मी तुवाह हादणे मुकल्यो, एने हाजो केऱ्यो तु आव लागो। एने एवी बोगवान जो तुवाह बोलनेन केरता कियेल हे, तो होमेलनेन केरता आखा न्या बोगवानान सामने आव रेनाह।”
पतरसान हिकवोण
तेवी पतरस केयो, “एवी माहु खेरीच मालुम एय गीयो काय बोगवान कुणीन बी बेदबाव नाह केरने। पुण आखा देसान माणहा माय रेन जो कुण बोगवानाह बिथे, एने हाजो काम केरतेह, तो ताह पुटीह। जो वचन तो इस्राएल माणहा फाय मुकल्यो, यीशु मसी जो आखान मालीक हे, तान द्वारे सान्तीन हाजाली खुबेर होमलाड्यो। तुमू ती मोटली गेटनाह जाणतेह, जी आखा इस्राएलान बुई पोर गेटेल एती, ती गेलील माय सुरवात एन योहानान द्वारे बपतीस्मा आपणेन पासाण रेन जान पारचार केराय जायेल एतो। तुमू यीशु नासरीन बाराम जाणतेह बोगवान चोखाला जीवान ताकेत रोचवेल ईतो, एने यीशु हाजाला कामे केरतीन एने ता आखाह जा सैतानान ताबा माय एता ताह हुदारतेन चार चोमखीर किहीक फिरतालो, काहाकाय बोगवान ता हिऱ्यो ईतो। एने आमु ता आखा कामान गोवा हेते, जो यीशु इस्राएल देसा माय एने यरूशलेम माय बी किऱ्यो, एने ता ताह खुरूसखाम पोर टागीन मार टाक्या। पुण बोगवान ताह तीसरे दिह जीवाड्यो, एने देखाड़ी बी दिनो। आखा माणहाह नाह, पुण ता गोवाह जाह बोगवान पेलुच रेन निवाड़ लियेल ईतो, मतलब आमुह जा तान मुरेल माय रेन जीव उठणेन पासाण ता हेऱ्या खाईल पियेल हेते। एने तो आमुह उकुम आपेल हे काय माणहा माय पारचार किरो, एने गोवाय दिवो काय ज्यो तोच हे, जाह बोगवान जीवताला एने मुरेल माणहान नियाव केरनार ठेरायेल हे। तान बाराम आखा जाणाव केरनार गोवाय देतेह काय जो कुण बी ता पोर बुरहो केरी, ताह यीशु नावान ताकेत माय पापान माफी जुड़ी।”
बिगेर यहुदि माणहा पोर चोखालो जीव उतेरने
पतरस ज्यी वातु केताच, चोखालो जीव वचन होमेलनारा आखा पोर उतेरनो। एने जोला याफा माय रेन यहुदि विश्वासी माणहे पतरस हेऱ्या आयेल एता, ता बिगेर यहुदि माणहाह बी चोखाला जीवान दान ता पोर रोचवाय जायेल हे, ज्यो देखीन ता आखा बोंगलाय गीया। काहाकाय ता आखा माणहाह बात बातीन बाषा बोलताला एने बोगवानान बोक्ती केरताला होमल्या। तेवी पतरस केयो, “आपुह जिहकेरीन चोखालो जीव जुड़ेल एतो, तिहेच केरीन न्याह बी जुड़ेल हे, ते काय न्याह पाण्या केरीन बपतीस्मा लेणेन केरता एगदो रोक सेकी?” एने तो उकुम आप्यो काय ताह यीशु मसीन नावा माय बपतीस्मा आपाय जाय। तेवी ता पतरसाह केया आमु हिऱ्यो उंजु थोड़ाक दिह रे।
Source notes (2)
- Footnote तीन; थोड़ाक लेख माय थोड़ाक; थोड़ाक लेख माय दुय।
- Footnote विन्ता; थोड़ाक लेख माय उपास एने विन्ता हे।
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.