Nahali Bible
2 तीमुथीयुस 2
मसी यीशुन हाजो सिपाय
तान केरता एय मार सोरा, तु ता गीणा माय जो मसी यीशु माय एकतान द्वारा हे, ताकेतवान एय जा। एने ती हिकवोण जीह तु मोकतास गोवान सामने मार फाय रेन होमलेल हे, ती हिकवोणाह विश्वासयोग्य माणहाह होप दे जा दिहराह हिकाड़नेन लायकीन एती। मसी यीशुन हाजाला सिपायान गेत मार हिऱ्यो दुख वेठ। काल्लो बी सिपाय लेड़ाणेन केरता जाथे, ते ज्यानकेरता काय ताह बोरती केरनाराह खुस केरी, एने आपणा आपाह दुनियान कामाम नाह फोसाड़ेत। एने केदी दोवेड़नार नेमान गेत नाय दोवड़ी ताहार ताह ईनाम नाय जुड़ी। एने जो किरसाण जुलूम मेहनेत किरेह, फोलान पेल्लो ईसो ताह जुड़ने जुवे। जो मी केथु त्यु आख्यु वातु पोर द्यान दे, एने मालीक तुवाह आखी वातुन सोमेज आपी। यीशु मसीह एर मेल, जो दाऊदान वोसीन पायदा ईनो एने मुरेल माय रेन जीव उठनो एने मारी हाजाली खोबरीन गेत मुरेल माय रेन जीव उठनो, ज्यो मारी हाजाली खोबरीन गेत हे। ज्यानकेरता मी गुनेगारान गेत दुख वेठथु, न्या वोर काय मी जेली माय कोंडाय रिनोह, पुण बोगवानान वचन कोंडायेल नाह सोतो। ज्यानकेरता मी निवाड़ेल माणहान केरता आखो काय वेठथु, काय ता बी ता सुटकाराह जो मसी यीशु माय हे जेलेमक्यो बोड़ाय हेऱ्यो जुड़ी। ज्यी वात खेरली हे,
केदी आपु ता हेऱ्या मोर गीयाह,
ते ता हेऱ्या जीवहु बी; 1
एने केदी आपु दिर देरीन आखो वेठते रेहु, ते ता हेऱ्या राज बी केरहु;
एने केदी आपु ताह नाकार हु, ताहार तो बी आपुह नाकार देय;
केदी आपु अविश्वासी एय जाहु,
तीबी तो विश्वासयोग्य बोणीन रीथे,
काहाकाय तो सोतान नाकार नाह केर सिकेत।
हाजो कारागीर
तु ज्यी वातुन ताह एर केराव, एने मालीकान सामने ताह चेतावणी आप काय सोबदान बाराम बोलाचाल नाय केरी, जाकेरीन कायच फायदो नाह एत पुण होमेलनारे बिगेड़ जातेह। तु खेरायीन वचनाह हास केरीन बोलनार, एने लाज आवणेन काल्लो बी कारेण नाय एय, बोगवानाह पोटी ओहलो काम केरनेन कोसीत केर। पुण एठी वातीह रेन वोचीन रे, काहाकाय ओहला माणहे होवटाह विणबोक्ती माय वोड़ते जातेह। एने तान वचन हिड़ेल गायीन गेत वोड़ती जाय। हुमीनयुस एने फिलेतुस ताच माय रेन हेते। जा माणहे खेरायीह रेन बोटेक जायेल हेते, एने केतेह काय आमरो पोशो जीव उठणो एय गीयोह एने थोड़ाक माणहान बोरहाह खेतेम केर देतेह। तीबी बोगवान बाणायेल पाको पायो बोणीन रीथे, एने ता पोर सिक्को बी लागाड़ेल हे: “मालीक तान जा माणहे हेते ताह ओलखेह,” एने “जो कुण मालीकान नाव लिथे, तो अन्याय केरने से वोचीन रेय।”
मोटला गेराम होनो चांदीन ठामला ओलास नाह, पुण लाकड़ान एने माटड्यान बी रेणु; काल्ला काल्ला मान सम्मान ने केरता, एने काल्ला काल्ला ओवला कामान केरता। केदी एगदो सोताह न्या माय रेन चोखो केरी, ते तो मान सम्मान केरनेन ठामलो एने चोखालो ठेराय; काहाकाय तो समर्पित एयीन मालीकान काम आवी, एने आखा हाजा कामान केरता तियार एय। जुवानीन मोरजीह रेन सिटो नाह, एने चोखो मोन से मालीकान नाव लेणारा हिऱ्यो देरेम, बुरहो, एने मोंग, एने ईलीमिलीन रेणारान पासाण लाग। पुण फोगापोणाह रेन एने मालुम नाह ओहला बोलाचालाह रेन सिटो रिजे, काहाकाय तु जाणेह काय जाकेरीन जेगड़ा एतेह। मालीक ने पावोर जीगड़ो केरनार नाय रेणे जुवे, पुण तो आखा हिऱ्यो नेरमाय माय एने हिकाड़ने माय लायकीन, एने आखो काय वेठणार एय। एने विरोद केरनाराह गेरबोड़ाय माय सोमजाड़नार रेणे जुवे, काय जाणे बोगवान ताह पापाम रेन मोन फिरावणेन मोन आपी काय खेरायीह ओलखी। एने ता सुद्दी माय आवीन सैतानान फासाम रेन सुट जाय, जो ताह तान मोरजी पुरी केरनेन केरता बोंदी बाणायेल ईतो।
Source notes (1)
- Cross-reference मत्ती 10:33; लुका 12:9
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.