Nahali Bible
2 पतरस 3
मालीकान पोशो आवणेन वायदो
एय मोंगाल्ला, एवी मी तुमूह ज्यी दिहरी चिट्ठी लेखथु मी तुमूह एर केरावतेन तुमरा चोखाला मोनाह जागतो केरथु, काय तुमू ता वचनाह जा चोखाला बोगवानान जाणकार पेलुस रेन कियेल हेते, मालीक एने सोड़ेवणारान ता उकुमाह एर किरो जो तुमरा प्रेरितान द्वारा आपायेल इतो। 1पेल ज्यो सोमजी लिवो, काय सेवेटल्या दिह्याम मोजाक उड़ावणारे मोजाक उड़ावतेन आवती, जा सोतान मोरजी पोर चालती। एने ता फुसती, “यीशुन आवणेन वचन कियेल एतो एवी का हे? काहाकाय डायडाया गोमाना, जेवी रेन आखी दुनिया बोणेल हे आख्यु वातु तिहेच केरीन चालतेन आवणे बाजरेन्युह।” ता ते जाण बुजीन ज्यो विहरी गीया काय बोगवान आपेल उकुमा केरीन जुग एने देरती बोणेल हे, एने देरती पाण्या केरीन बोणनी एने पाण्याम एक जागे हे, ज्यानकेरता ती टेम ने दुनिया पाण्या माय बुड़ीन खेतेम एय गियी। पुण ज्यो जुग एने देरती आज टिकेन हे, बोगवानान उकुमान द्वारे आक्ठा केरीन खेतेम एणेन केरता होमालीन मेलाय जायेल हेते। ताह ता दिह्यान केरता मेलाय जाथे जेवी गेलेत माणहान नियाव एय एने ता खेतेम केराय जाती।
एय मोंगाल्ला, ज्यो मा विहरो, काहाकाय बोगवानान नेजरी माय एक दिह एने एजार वोरह्या कायच फारेक नाह सोतो; तानकेरता दुयू हारका हेते। मालीक तान वचनाह पुरो केरनेन वार नाह लागाड़ेत, जोहली वार थोड़ाक माणहे सोमेजतेह; पुण तुमरे बाराम दिर दिरेह, एने एगदान नास एय नाय ओहली तान मोरजी हे, पुण ज्यो काय आखाह पासतावो केरनेन टेम जुड़ी। 23
पुण मालीकान दिह चोरान गेत आवी, ते दिह जुग मोटला गाजणा हेऱ्यो आरताय जाय, एने जुगान आख्यु वोस्तु हेलगीन खेतेम एय जाती, देरती एने ती माय वाल्यु आख्यु वातु आरताय जाती। ते ज्यी आखी चिज इहकेरीन खेतेम एणी हे, ताहार तुमू कोहली बातीन माणहे रेणे जुवे? तुमरो जीवणो चोखालो एने बोगवानान उगे हुपेल रेणे जुवे। एने बोगवानान ता दिह्यान वाट किहकेरीन जोवणे जुवे, एने ताह उतवाल्योच आवणेन केरता किहीक कोसीत केरने जुवे, जान केरता जुग आक्ठा केरीन खेतेम केराय जाय, एने जुगान आख्यु वोस्तु ताताला केरीन पिगील जाती। 4पुण तान वायदान गेत आपु एक नोवालो जुग एने नोवाली देरतीन वाट जोवतेह जा माय सिदा माणहे रिकती।
तानकेरता, एय मोंगाल्ला, ज्यु वातुन वाट जोवतेह ताहार, कोसीत किरो काय तुमू सान्ती माय बोगवानान सामने विणढाग्या एने निर्दोस ठेराहो, एने आपणा मालीकान दिर जो आपुह आपेल हे सुटकारान टेम सोमजो, जीहे आपणो मोंगाल्लो बाहख पौलुस बी ती एकलीन केरीन जो बोगवान ताह आपेल इतो, तान वापेर केरीन लिखेल इतो। तिहेच केरीन तो तान आख्यु चिटठ्यु माय बी ज्यु वातुह लिखेल हे, जा माय थोड्युक वातु ओहल्यु हेत्यु ज्युह सोमेजणे केठीण हे, एने बिगेर हिकेल एने एक जागे नाह रेणारे माणहे दिहरी चोखाली पुस्तेकीन जिहकेरीन उलटो मतलब निकालतेह तिहेच केरीन तान बी निकालतेह, इहकेरीन ता सोतास ने खेतेम ने कारेण बाणावतेह। तानकेरता एय मोंगाल्ला, तुमू पेलुस रेन ज्यु वातुह सोमजीन चेकचेल्या रिवो, काहाकाय एदेरमी माणहान बुल माय पोड़ीन बोहकी मा जाहो जा माय तुमरी थोबीन रेणो आथाम रेन जावाड़ नाय दिहो। पुण आपणो सोड़ेवणार मालीक यीशु मसीन गीण एने इकेल माय वोड़ते जावो। तास ने बोड़ाय एवी बी एय, एने कायेम ईती रेय। आमेन।
Source notes (4)
- Cross-reference यहुदा 1:18
- Cross-reference मत्ती 24:43; लुका 12:39; 1 थिस्सलुनिक्यो 5:2; प्रकाशितवाक्य 16:15
- Footnote गायेब इयेल; थोड़ाक लेख माय जुड़ेल लिखेल हे; दिहरा थोड़ाक लेख माय हेलगाड़ील लिखेल हे; एक लेख माय खेतेम किरेल लिखेल हे।
- Cross-reference प्रकाशितवाक्य 21:1
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.