Nahali Bible
2 कुरिंथीयो 6
आमु जा बोगवानान गोवांद्या एणेन नाते आमु ज्य बी सोमजाड़तेह काय तान गीण जो तुमू पोर इयेल हे, ताह फालतुक जाणे मा दिवो।
काहाकाय बोगवान किथे:
“आपणी खुसीन टेम माय मी तारी होमली लियेल,
एने सुटकारान दिह मी तारी मोदेक किरेल,”
एने दिखो एवी खुसीन टेम हे; एने दिखो एवी सुटकारान दिह हे!
आमु काल्ली बी वातुम ठोकेर खाणेन टेम नाह आपते, काहाकाय आमरी सेवा, काम पोर काल्लो बी गुनो नाय आवी। पुण एकेक वातु माय बोगवानान पावोरान गेत आमरा हाजाला गुणाह देखाड्या केरतेह, मोटली दिरी माय, गेरीबी माय, मुसीबत माय, 1चापका खाणे माय, जेलीम कोंडाणेम, गेरदीह रेन, कामा माय, जागताला रेणे माय, उपास केरनेम, चोखाला माय, इकेल माय, दिरी माय, गीणीन द्वारा आमु खुद बोगवानान सेवक एणेन केरता, एने चोखाला जीवान द्वारा, एने बिगेर कोपेट खेरला मोंग माय, खेरायीन वचना माय, बोगवानान ताकेत माय, एने देरमान आथ्यारा केरीन जा जेवड्या डाखऱ्या आथाम हेते, मान एने मान नाह जुड़ने माय जिक एने आरवाणे माय बोटकावणारान गेत जाणाय जाथे, तीबी आमु खेराय माय बोलतेह। एंजाणल्यान गेत हेते, तीबी आमरो नाव गाजेल हे; मुरेल ने गेत हेते, एने दिखो जीवताला हेते, मार खातेह, पुण माराय नाह जाते। दुख मोणावणारान गेत हेते; पुण जेलेम खुस रेतेह, गेरीब हेते, पुण मोकतास माणहाह मालदार बाणाव देतेह; ओहला हेते काय आमु फाय कायच नाह तीबी आखो मेलतेह।
एय कुरिंथीयो, आमु आख्यु वातु खोलीन तुमूह कियेल हेते, काहाकाय आमु मोन से तुमूह मोंग केरतेह। एने आमरा मोनाह आमु तुमरी केरता बोंद नाह केऱ्या, पुण तुमूच आमरे केरता तुमरा मोनाह बोंद किर दियेल हेते। पुण मी तुमूह मार सोरा जाणीन केथु, काय आमु पोर मोंग किरो जिहकेरीन आमु तुमूह मोंग केरतेह, एने आमरे केरता तुमरो मोन खुल दिवो।
जीवताली बोगवानान मोंदिर
अविश्वासी हेऱ्या सेंगेत मा किरहो, काहाकाय देरमी एने एदेरमी माणहा हेऱ्यो काय मेल जोल? काय उजालान एने आंदारान काय मेल? मसी एने सैतान हेऱ्यो काय मेल? एने विश्वासी हेऱ्यो अविश्वासीन काय नातो? 2एने मुरती हेऱ्यो बोगवानान मोंदिरान काय समंद? काहाकाय आमु ते जीवताला बोगवानान मोंदिर हेते! जिहकेरीन मालीक कियेल हे: “मी ता माय बोहुह,
एने ता माय चाला फिऱ्या केरूह;
एने मी तान बोगवान रेह,
एने ता मार माणहे एती।”
तानकेरता बोगवान किथे,
“तान विची माय रेन निकलो
एने कुवालाच रिवो,
एने खाराब वोस्तुह मा सापलो,
ते मी तुमरो स्वीकार केरूह।
एने मी तुमरो आबोख एह,
एने तुमू मार बेटा बेटी ईहो,
ज्य आखाह रेन ताकेतवाला बोगवानान वचन हे।”
Source notes (2)
- Cross-reference प्रेरितान काम 16:23
- Cross-reference 1 कुरिंथीयो 3:16; 6:19
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.