Nahali Bible
2 कुरिंथीयो 3
नोवाली वाचान पावोर
काय आमु पोशा आमरी बोड़ाय केरने लागज्यो? दिहरा माणहान गेत आमु बी तुमू फाय रेन बोड़ाय ने पत्र लेणेन एने तुमूह आपणेन जोरवुत हे काय? आमरो पत्र ते तुमूच हेते, जो आमरा मोना माय लेखायेल हे, एने ताह आखा माणहे ओलेखतेह एने वाचतेह। एने ज्य देखाड़ेह काय आमरा सेवान वोजेसे तुमू मसीन पत्री हेते, जाह आमु पावोरान गेत मसी माय लिखेल हेते, एने तो साई केरीन देगड़ान पाटी पोर नाह, पुण जीवताला बोगवानान जीवा केरीन एने मोनान माह ने पाटी पोर लिखेल हे।
मसीन द्वारे जो बोगवाना माय आमरो बुरहो हे, ताच ने वोजेसे बोलतेह। ज्य नाह सोतो काय आमु आपणे आपाह ज्यान बाराबोर सोमेजतेह काय आमरी उगे रेन काल्लो बी काम केर सेकी, पुण आमरी लायकी बोगवानान उगे रेन हे। बोगवान आमुह नोवाली कायदान पावोर एणेन केरता लायकीन बाणायेल हे, जो वायदो लिखेल कायदान पावोर नाह पुण चोखाला जीवान द्वारे हे, काहाकाय कायदो ते मारने, पुण जीव जीवाड़ ने।
केदी मुसान कायदो जान अक्सर डेगड़ा पोर लिखेल एता, एने न्या वोर चोमेकताला काय मुसान मुया पोर बोगवानान बोड़ाय ने उजालान कारेण जो गेटती जातालो, इस्राएली माणहे तान मुयाह देख नाह सेकताला। एने तो बोड़ाय खेतेम एय गियी, ते चोखाला जीवान सेवा वोदार चोमेकणार काहा नाय रेय? केदी माणहाह दोसी ठेरावणार सेवा चोमेकणार हे, ते माणहाह सुटकारो आपणार सेवा वोदार चोमेकणार काहा नाय रेय! एने नोवालो चोमेक जो जादा चोमेकणार हे, तान वोजेसे जुनालो चोमेक खेतेम ईती जाथे। काहाकाय केदी तो गेटणार उजालो एतो, ते तो जो कायेम रेन उंजु बी चोमेकणार काहा नाय एय!
तानकेरता आमु ओहली आसा मेलीन ईमोत हेऱ्या बोलतेह। एने मुसान गेत नाह जो तान मुया पोर पुड़दो टाकेल इतो, काय इस्राएली माणहे ता गेटणारा उजालाह खेतेम एतालो नाय देख सेकी? पुण तान मोन वातड़ो एय गीयो, काहाकाय आज वोर जुनालो नेम वाचणे बुखेत तान मोना पोर पुड़दो डापाय रिथे, तिहेचकेरीन आज बी हे। पुण जेवी केदी एगदो माणुह मसी माय जोड़ाथे, ते तो पुड़दो सिटो एय जाथे। काहाकाय आज वोर जेवी केदी मुसान पुस्तेक वाचाय जाथे, ते तान मोना पोर पुड़दो पुड़ेल रिथे। पुण जेवी केदी तान मोन मालीकान उगे फिरी ताहार तो पुड़दो सिटो एय जाय।1 बोगवान ते जीव हे, एने जा का बी बोगवानान जीव हे ता आजादी हे। पुण जेवी आपु आखान उगाड़ला मुया केरीन बोगवानान उजालो इहकेरीन देखहु, जिहकेरीन आरसा माय, ते बोगवानान द्वारे जो जीव हे, आमु तास चोमेकता वेह रूप माय थोड़ो थोड़ो केरीन बोदेलती जातेह।
Source notes (1)
- Footnote पुण ओड़नी; पुड़दो निकालाय जाय।
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.