Nahali Bible
1 थिस्सलुनिक्यो 5:16
Verse 16 is marked below, with the whole chapter around it. Read from the start
यीशु पोशो आपणु हे केरीन तियार रेणु
एय बाय बोणहा, टेम एने कालान बाराम तुमूह लेखणेन कायच गिरेज नाह सोती। 1काहाकाय तुमूह पाक्को मालुम हे काय जिहकेरीन राती चोर आवीह, तिहेस केरीन मालीकान दिह आवण्यो हे। जेवी माणहे केती, “सान्ती एने कायच बी बिय नाह सोती,” ते जिहकेरीन पेटावाली बायकु पोर उचकाहुच पिड़ा आव पुड़ीह, तिहेस केरीन ता पोर बी उचकाहुच पिड़ा आव पोड़ी, एने ता वोच नाय सेकती। पुण एय बाय बोणहा, तुमू ते आदारा माय नाह सोता काय तो दिह तुमू पोर चोर जीहे आवीह तिहेस आव पोड़ी। काहाकाय तुमू आखा उजालान सोरा एने दिह्यान सोरा हेते; नाह आपु रातीन हेते, एने नाह आदारान। तान केरता आपु दिहरान गेत हुवते नाह रेता, पुण जागती एने जोगवीन रेता। काहाकाय जा हुवतेह ता रातीच हुवतेह, एने जा पितेह ता रातीच पिन दुंदवाय रेतेह। 2पुण आपु जा दिह्यान हेते, बोरहान एने मोंगान कवच पेरीन एने सुटकारान आसान टुपो पेरीन जोगवीन रिवो। काहाकाय आपु पोर बोगवानान राग आवी केरीन नाह, पुण आपणा मालीक यीशु मसीन द्वारे आपणो सुटकारो एय, केरीन बोगवान आपुह निमेल हे। यीशु आपणे केरता मुरनो, ज्यानकेरता काय आपु जीवताला रेहु नाहते मोर जाहु, जेवी यीशु पोशो आवी तेवी आखा मिलीन ताच हेऱ्या जिवी। तान केरता एका दिहराह तुमू दिलासो आपु एने एका दिहरान वोड़तीन कारीन बुणो, एने जिहकेरीन तुमू केरतेह बी।
सेवली हिकवोण
एय बाय बोणहा, आमु तुमूह विन्ता केरतेह काय जा तुमू माय मेहनेत केरतेह, एने मसी जीवणाम तुमरा अगुवा हेते, एने तुमूह हिकाड़तेह, तान तुमू मान सम्मान किरो। एने तान कामान कारीन मोंग जुलूम केरीन तान मान सम्मान आपु, एने एका दिहरा हेऱ्या ईलीमिलीन रिवो। एय बाय बोणहा, आमु तुमूह सोमजाड़तेह काय जा माणहे आलह्या हेते ताह सोमजाड़, एने बितऱ्याह ईमोत आपु, कोमजोराह होमालु, आखान सेहेन किरो। होमालीन! कुण बी एगदाह बुरायीन बोदले बुराय नाय केरी; एने कायेम एका दिहरान एने आखान हाजो केरती रिवो। कायेम खुसी माय रिवो। कायेम विन्ता माय लागीन रिवो। एने आखी वातु माय बोगवानान दन्यवाद किरो; काहाकाय यीशु मसी माय तुमरो जो जीवणो हे, बोगवानान मोरजी जीज हे। चोखाला जीवान आक्ठो मा उलवो। बोगवानान उगे रेन आवणेवाली खोबरीह खाराब मा जाणु। आखी वातुह पारखो; एने जी हाजी हे तीह देरीन रिवो। एने आखा बातीन बुरायीह रेन वोचीन रिवो।
सेवल्यो बोरकेत
सान्ती आपणार बोगवान खुद तुमूह पुरो चोखो केरी; एने तुमरो चोखालो जीव एने जीवाह एने सेरीराह आपणा मालीक मसी यीशुह आवणे वोर पुरी रिते से निर्दोस एने होमालीन मेली। तुमूह हादणार बोरहावालो हे, एने तो ओहलोस केरी। एय बाय बोणहा, आमरे केरता विन्ता किरो। आखा बाय बोणहा बोगवानान चोखाला मोंग माय नमस्कार किरो। मी तुमूह मालीकान आदिकार माय विन्ता केरथु काय ज्यो पोत्रो आखा विश्वासीन केरता वाचाय जाय। आपणा मालीक मसी यीशुन गीण तुमू पोर इती रेय।
Source notes (2)
- Cross-reference मत्ती 24:43; लुका 12:39; 2 पतरस 3:10
- Cross-reference इफिसीयो 6:13-17
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.