Nahali Bible
1 थिस्सलुनिक्यो 2
थिस्सलुनिक्यो माय पौलुसान पारचारान काम
एय बाय बोणहा, तुमू खुद जाणतेह काय तुमू फाय आमरो आवणो वाये नाह एनो। 1पुण तुमू खुद जाणतेह काय थिस्सलुनिक्यो माय आवणेन पेल आमु फिलेपी हेयरा माय अपमान एने दुख विठेल। एने आमरो बोगवान आमुह ईमोत आपेल, काय आमु बोगवानान हाजाली खुबेर केठीण विरोद एन बी तुमूह होमलाड़ी। काहाकाय आमरो हिकवोण खाराब विचारा माय एने उशारी माय नाह एतो; पुण बोगवान आमुह लायकीन सोमजीन हाजाली खुबेर होपेल हे, एने आमु तिहेस केरीन केतेह, एने ज्या माय माणहाह नाह, पुण बोगवान जो आमरा मोनाह जाचेह, ताह खुस केरतेह। काहाकाय केदी बी तुमू हाजा हेते केरीन वातु केरनेन आमु नाह आवा, ज्यो तुमूह मालुम हे, एने पोयशान लोब ने केरता डोंगड़ा नाह केऱ्या, बोगवान गोवा हे; पुण आमु एगदा माणहा फाय रेन मान सम्मान नाह होदते, एने नाह तुमू फाय रेन होदते। 2एने आमु मसीन प्रेरित एणेन नाते तुमू पोर वोजो टाक सेकताला, पुण जिहकेरीन आहख सोरान पालेन पोषण किरेह, तिहेस आमु तुमरी हेऱ्या हुवाला रेना। एने आमुह तुमरी कालजी एती केरीन बोगवानान हाजाली खुबेर होमलावणेन ओलीस नाह, पुण आमरा जीवणान द्वारे तुमूह पुरी ताकेत से मोदेक जुड़ी। काहाकाय तुमू जुलूम मोंगाल्ला एता।
काहाकाय एय बाय बोणहा, आमरी मेहनेत एने तेकलीत खेरीच तुमूह मालुम एय, काय तुमू माय रेन कुणी पोर बी आमरो वोजो नाय पोड़ने जुवे केरीन आमु रात ने दिह काम दुंदो केरीन बोगवानान हाजाली खोबरीन पारचार किरेल। तुमू ज्यान गोवा हेते एने बोगवान बी गोवा हे काय आमरो वेवार तुमरी विची माय चोखालो, खेरलो, एने निर्दोस एतो। तुमू जाणतेह काय आमु तुमरी हेऱ्या तिहेकेरीन वेवार केरतेह, जिहकेरीन आबोख तान सोरा हेऱ्यो वेवारो किरेह, एने तिहेस केरीन आमु बी तुमू माय रेन आखाह हिकाड़तेन। काय तुमूह उत्साहित केरीन एने दिलासो आपीन सोमजाड़तेह, एने विन्ता केरतेह काय जो तुमूह बोगवानान बोड़ाय एने तान राज माय बाग लेणेन केरता हादिल हे। ताह होबे ओहलो तुमू जीवो।
तान केरता आमु बोगवानान दन्यवाद जेलेम केरतेह काय जेवी आमरी द्वारे बोगवानान हाजाली खोबरीन वचन तुमरी फाय पोचनो, ते तुमू ताह माणहान नाह पुण बोगवानान वचन सोमजीन स्वीकार किरेल, एने खेरीच ज्यो ओहलोस हे। तुमू जा विश्वासी हेते बोगवान काम किरेह। 3एय बाय बोणहा, जी वातु यहुदिया देसाम यीशु मसी माय बोगवानान त्यु मोंडल्यु हेऱ्यो एन्युह, त्युच वातु तुमू हेऱ्यु एणे बाजरेन्युह, जिहकेरीन यहुदि माणहान आथा केरीन जो सेताव वेठतेह, तिहेस केरीन तुमू बी तुमरा माणहान आथा केरीन सेताव वेठतेह। 4ता यहुदि मालीक यीशुह एने जाणकाराह मार दियेल, एने आमुह सेतावीन बाहेर काड़ दियेल। एने ता बोगवानाह नाराज केरतेह, एने आखा माणहान विरोद केरतेह। एने ता बिगेर यहुदि माणहाह बोगवानान खुबेर होमलाड़नेन केरता आमुह रोकतेह, जो सुटकारो लाव सिकेह। काय जेलेम तान पापान माप बोराती रेय; पुण ता पोर बोगवानान राग आव लागेल हे।
पौलुस थिस्सलुनिक्यो पोशो मिलनेन आसा केरने
एय बाय बोणहा, आमु मोनाम नाह पुण सेरीर माय तुमू फाय रेन थोड़ीक वार ने केरता आंगे एय जायेल एता, आमु तुमूह जुलूम इर किरेल एने पोशो मिलनेन कोसीत केरतेह। आमु तुमू फाय एक रेन होवटी वार आवणेन केरता कोसीत किरेल एने खास केरीन मी पौलुस, पुण सैतान आमुह रोक मिल्योह। आमरी आसा, खुसी, एने बोड़ायीन मुकूट कुण हे? काय जेवी आमरो मालीक यीशु मसी आवी तेवी तान ओंगाण तुमूच हेते ने। काहाकाय आमरी बोड़ाय एने खुसी तुमूच हेते।
Source notes (4)
- Cross-reference प्रेरितान काम 16:19-24; प्रेरितान काम 17:1-9
- Footnote तुमरी हेऱ्या एता तेवी आमु हास केरीन, आईख ने गेत; थोड़ाक लेख माय तुमरी हेऱ्या एता तेवी आमु सोरान गेत एता, आमु आईख ने गेत एता।
- Cross-reference प्रेरितान काम 17:5
- Cross-reference प्रेरितान काम 9:23,29; 13:45,50; 14:2,5,19; 17:5,13; 18:12
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.