Nahali Bible
1 कुरिंथीयो 12
चोखाला जीवान वरदान
एय बाय बोणहा, मी नाह हुदेत काय तुमू चोखाला जीवान वरदानान बारामाय एंजाणल्या रिवो। जेवी तुमू खेरला बोगवानाह नाह ओलेखताला, ते बात बातीन मुरतीन बोक्ती केरताला। तानकेरीन मी तुमूह इसारो आपथु, काय जो कुण बोगवानान जीवान उगे रेन बुलीह, तो नाह केत काय यीशु हाराप वालो हे, एने नाह कुण चोखाला जीवान बिगेर केय सिकेह काय यीशु मालीक हे। 1
वरदान ते जुलूम बातीन हेते, पुण जीव एकुस हे; एने सेवा बी जुलूम बातीन हेत्यु, पुण मालीक एकुस हे; एने चेकीत एय ओहला कामे जुलूम बातीन हेते, पुण बोगवान एकुस हे, जो एकेक माय आखी बातीन काम किरेह। पुण सोबाह फायदो पोचाड़णेन केरता एकेक माय बोगवानान जीव देखाथी। काहाकाय चोखाला जीवान द्वारे एकेकाह बुद्दीन वचन एने दिहराह इकेलान वचन जुड़ेह। एने एगदाह तोस जीव बुरहो केरनेन केरता एने एगदाह तास जीवा केरीन हुदारनेन वरदान आपाय जाथे। ओवतो एगदाह ताकेत ने काम केरनेन केरता सेक्ती, एने एगदाह बोगवानान खुबेर केणेन इकेल एने एगदाह जीवान वरदानाह पारेखणेन केरता, एने एगदाह एंजाणल्यु बाषा बोलनेन केरता, एने एगदाह बाषान मतलब केणेन केरता आपेल हे। पुण ज्या सोब लागणारे कामे एकुस तो बोगवानान जीव केरने, एने आलेग आलेग वरदान वाट दिथे जाह जो जुवे।
एक सेरीर मोकतास आंग
काहाकाय जीह केरीन सेरीर ते एक हे, एने तान आंग मोकतास हेते, एने तास एक सेरीरान सोब आंग मोकतास हेते, तीबी सोब मिलीन एकुस सेरीर हेते, तिहेस केरीन मसीन सेरीर बी हे। काहाकाय यहुदि, एने बिगेर यहुदि, एने पावोर, एने जो आजाद हे आपु आखा एकुस जीवान द्वारे एक सेरीर एणेन केरता बपतीस्मा लेदा, एने आपु आखाह एकुस जीव बोगवान आपेल हे।
तानकेरता सेरीर माय एकुस आंग नाह सोतो, पुण मोकतास हेते। केदी पाय केय, “मी आथ नाह सुतो, तानकेरता मी सेरीरान नाह सुतो,” ते तो जी कारेण सेरीरान नाय मीले काय? केदी कान केय, “मी डुलो नाह सुतो, तानकेरता मी सेरीरान नाह सुतो,” ते तो जी कारेण सेरीरान नाय मीले काय? केदी आखो सेरीर डुलोस रितो, ते होमेलनो का रेतो? केदी आखो कानुस सेरीर रितो, ते गेंद लेणो का रेतो? पुण बोगवान आंगाह तान मोरजीन गेत एक एक केरीन सेरीर माय मिलेल हे। केदी ता सोब एकुस आंग रेता, ते सेरीर का रेतो? पुण एवी ते आंग मोकतास हेते, पुण सेरीर एकुस हे। डुलो आथाह नाह केय सिकेत, “माहु तारी गिरेज नाह सोती,” एने नाह मुंड पायाह केय सिकेह, “माहु तारी गिरेज नाह सोती।” पुण सेरीरान ता आंग जा दिहराह रेन कोमजोर लागतेह, ताज ने जुलूम गिरेज हे; एने सेरीरान जा आंगाह आपु खाराब सोमेजतेह, ताह आपु होवटाह ढापीन मेलतेह, एने आपणा होबादार आंगाह ढापणेन गिरेज नाह सोती। तीबी आमरा होबादार आंगाह ज्यान गिरेज नाह, पुण बोगवान सेरीराह ओहलो बोणाव दियेल हे काय जा आंगाह आदर ने कोमी एती, ताहचे उंजु बी जुलूम आदार जुड़नो। काहाकाय सेरीरा माय फुट नाय पोड़ी, पुण आंग एका दिहरान बाराबोर चिन्ता केरी। तानकेरता केदी एक आंग दुख लिथे, ते सोब आंग ता हेऱ्या दुख लेतेह; एने केदी एक आंगान बोड़ाय ईथे ते, ता हेऱ्या सोब आंग खुसी केरतेह।
इहकेरीन तुमू आखा टुलो एन मसीन सेरीर हेते, एने आलेग आलेग तान आंग हेते; 3एने बोगवान मोंडली माय आलेग आलेग माणुह निवाड़ेल हे, पेल्ला प्रेरित, दिहरा जाणकारे, तीसरा हिक आपणारे, एने ताकेत ने काम केरनारे, एने हुदारणारे, एने दिहराह मोदेक केरनारे, एने तियार केरनारे, एने एंजाणल्ली बाषा बोलणारे। काय सोब प्रेरित हेते? काय सोब जाणकार हेते? काय सोब हिकाड़नारे हेते? काय सोब ताकेत ने काम केरनारे हेते? काय सोबाह हुदारनेन वरदान जुड़ेल हे? काय सोब एंजाणल्ली बाषा बोलतेह? एने काय सोब एंजाणल्ली बाषान अनुवाद केरतेह? पुण तुमू मोटला रेन मोटला वरदानान आसा माय रिवो,
पुण मी तुमूह उंजु बी आखाम हाजी वाट देखाड़थु।
Source notes (3)
- Cross-reference रोमीयो 12:6-8
- Cross-reference रोमीयो 12:4,5
- Cross-reference इफिसीयो 4:11
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.