Solomon Lei 3

Mipui be pekatei pecu rang kebam

1Tingmui a zeu ga

a kubepei de Ih nsung bam;

Ih pecu peei, dede Ih pecu ngaulu ma.1

2Ih akatei a dage rang, “Ih cuhlu zie nah namdi be ga huirwa zie,

puiceunadung nah puididung ga;

Ih a kubepei de peei zie.”

Ih pecu peei, dede Ih pecu ngaulu ma.

3Reketme namdi be ga hui gwang keladau acu ngaulu.

Ih penuide keteu gai, “Nnui a kubepei de ngau mi?”

4Ih penuide tetkah kedi mating tie de kemakne

a kubepei de Ih ngaulu.

Ih pecu tuilu nah pecu peu tetti ma

a pui kiga Ih pecu ngngwa gwanglu kemaktane,

acu nna kelube bung ga.

Mipui be mipui kedadung dage rang kebam

5Ih nnui de peu sampet gai neubam, Jerusalem napuimedung,

Luh ga pak keci helung nah hetidung zi gade sampet gailo,

nnui kemrai de tei ndeu mede tei mrak gaiso

pa neu kemaktane.

Mipui be pekatei pecu rang kebam

6Hetaideu gade nghang kela cide daino

mika tsia ge nzwa,

myrrh nah marim kehengui gele perim tei hengui kelu nzwa,

heli keteime ne pemütdung zwa kelu de?

7Pielo, cide au Solomon zeu;

reugwame riakherok cide de twagwalu,

Israel reugwame riakherok.

8Penui pelane kiengtie kepwa ciem ci nah penui au hereu tei kemnimme.

Penui kiengtie ramcau penui mbie ga bam la,

tingmui kengngi ziemne mtei pwabam.

9Hegwangpei Solomon pekatei pe ziemne rapwalu kela teibam ge

Lebanon gade tsing ngau kelube le teilu.

10Pe tsiadung rangkanggeu le teilu;

nah kecak le pe cai teilu, nah pe bam pai gieremang kecu ge le teilu.

Pe lungki au keku le pwa tei hezuyi gai

Jerusalem napuimedung ne.

Mipui be Jerusalem puidung de rang kebam

11Zion napuidung, hegwale mpetlu, delwe Hegwangpei Solomon de piegailo,

pe pui ne pe peu gage kai kebeu hegwang peurwa pung kebam

pe nautak benai,

pa pe suiyi kebam benai.