Keuliakegai 4

Tinggim ga hegwangbam

1Ma aidungde cai Ih piegai, nah ainie, Tinggim ga kikam ge ngkei pwa bam! Ih makwa siu raitu de telui kwa ge nzwa acu mpau eh ranggai, “Aika hanglu, iciude ma aidungde cai teigwang kerabe Ih ncu lia zie.”1 2Zette Tinggwang Rabe acu kezeu teudi, nah ainie, tinggim ga hegwangbam ge kai zeu! Nah hegwangbam ga mige ntumbam.2 3Cika ntum kebambe de tangtsu pemi kewhung jasper nah carnelian nzwa. Tangningnaria tangtsu pemi kewhung emerald kenzwa ge ne hegwangbam de twagwa pwa bam.3 4Hegwangbam de hegwangbam ngkaiemdai ne twagwa pung bam, nah hegwangbamdung ga hangkiame ngkaiemdai, paiheni keha bah, nah kecak peurwa punglwe ntumbam.4 5Hegwangbam gade tingkehepik kebaa, nah tingceu kengyim kecu kwadung pet. Hegwangbam dwa ga mitaubung hena ntau pwa bam, cidungde au Tinggwang rabe henadung.5 6Hegwangbam dwa ga jaaidi zudageu kenzwa ge, crystal tsu nzwa mcigi bam. Hegwangbam sum ga, nah hegwangbam tu lule ailam ringkela kaune mdai, pedwa pecai pemiak puipung lwe twagwa bam.6 7Ringkela kaune keraibe cai hingho ge nzwa, ringkela kaune pekenabe cai hetumna ge nzwa, nah ringkela kaune pekecumbe cai mina zu ge nzwa, nah ringkela kaune pemdaibe cai helie limkela ge nzwa. 8Ringkela kaune mdaidung de pe hesiu herok bam kap, hegwale nah helungle de pemiakdung le puipung. Penui tingmui tingba mtak mene,

“Mci, mci mci Ngkiengtube Rampaube Tinggwang,

ndaa de kelabe, cude kebambe nah gwangdai kerabe de,” de rang bamla.7

9Ringkela kaunedung, kelungta ringla kelabe, hegwangbam ga kebambe de kendu, kerüt nah hetwa kepeu dau,8 10hangkiamedung ngkaiemdai de, hegwangbam ga kebambe9 dwaga keumie delwe kelungta ring kelabe de reca. Penui hegwangbam dwa gage penui hegwang peurwa lwakgai eh ranggai,10

11“Anui Rampaube nah anui Tinggwang,

nang au kendu, hetwa nah kengkieng ngaulu kebuibe,

kedanemene nang ma pelane damgai,

nah n lungning gade cidungde de damgai nah lunghlu.”